Yosua 17

1Yosef dayɔkeema Manase tɔntɛ n wana te ba tɔnrɛ bo Manase dayɔkeema Makir. Makir n de Gileaddoma la sɔyaaba, te a tɔntɛ dɛna Gilead la Basan teŋhe la, Makirdoma wa n ba dɛna pɛɛntɛɛnreba gaŋɛ la zuo. 2Ge Manasedoma se'a n gee me to'ohe ba tɔntɛ ba yire yire n wana: Abiezer la Helek la Asriel la Sekem la Heper la Semida. Yosef dayɔa Manase yaahe n bala ba yire yire. 3Manase n dɔgɛ Makir, te Makir dɔgɛ Gilead, te Gilead dɔgɛ Heper, te Heper dɔgɛ Zelopehad. Te Zelopehad ka tara bodibila ge gee la pugunto ma'an. A pɔa yu'ura dɛna Mala la Noah la Hogla la Milka la Tirza. 4Ba keŋɛ Eleazar n de malemadaana la Nun dayɔa Yosua la keendoma la nɛŋan ta yeti, Na'ayenɛ daa bo Moses nɔɔrɛ te a bo to sɔ'ɔlom la to sɔɔnrɔ la. Te Yosua aan ba sɔɔnrɔ la sɔ'ɔlom la poan bo ba wo Na'ayenɛ n bo a nɔɔrɛ se'em la. 5Manase tɔntɛ dela samana pia n lɛm la Gilead la Basan teŋhe bɔna Yordan Kolaa la dapɔya ha. 6Se'ere n sɔe la Manase buuri la pɔyɔɔhe n lagom to'e tɔntɛ ba sɔɔnrɔ la sɔ'ɔlom la poan la, Gilead teŋa la n gee la zan'an dela Manase buuri se'a woo n gee la denɛ. 7Manase sɔ'ɔlom la pɔhɛ la Aser tɛnregɛ ta yehe Mikmetat teŋa n boe Sekem teŋa dapɔya bɔba ha la. Beene la ze'ele la bilam dɔla gɔbega nɛŋa bɔba ta ta' nɛresɛba n boe En Tapua teŋa poan la. 8Manase ta' la Tapua sɔ'ɔlom, ge Tapua mɛŋa en yage Manase beene zuo la dela Epraimdoma teŋa. 9Beene la kelom dɔla la gɔbega mea ta paɛ Kanah Kolaa. Teŋhe boe Manase sɔ'ɔlom la poan dɛna Epraimdoma teŋhe, ge Manase beene boe la mɔgɔrɛ la zuɔ, tare na bahɛ ko'kantɛ la poan. 10Ge gɔbega bɔba ha dela Epraimdoma sɔ'ɔlom gan'arɛ to'oha Manase na. Manase sɔ'ɔlom keŋɛ ta du la ko'kantɛ la, te a zuɔ beem la Aser, te a dapɔya beem la Isakar. 11Manase teŋse'ehe n boe Isakar la Aser teŋasoka dela Bet San la Ibleam la Dor nɛreba la Endor la Taanak la Megido teŋhe, la se sɔ'ɔlom zan'an yu'urɛ se'ere n tagalɛ botan' la dela Napot. 12Ge Manasedoma wa ka nyaŋɛ to'e ba teŋhe la. Se'ere n sɔe la Kanaandoma la kɔ'ɔn maahom mɛ te ba kan yehe teŋa la poan. 13Te Israeldoma wa ta zo'e na kpe'em, nya pɛnregɛ Kanaandoma wa te ba toona toonse'a n kpe'em, ge ba ka dige ba teŋa la poan zan'an. 14Te Yosefdoma la soke Yosua yeti, Bene n sɔe te ho bo tomam tɔntɛ deyena sɔ'ɔlom boyena poan? To ba' zo'e mɛ ge te Na'ayenɛ me kan' bahɛ to zuo zo'e zo'e. 15Te Yosua lebehe ba yeti, Ya han ba' zo'e, te Epraim teŋa la n yage zoore zuo la pɔ'ɛ bo ya, kɛn' ya Perizi la Arepadoma mɔen la poan ta maalɛ zen'enhe bilam bo ya mɛhe. 16Yosefdoma la lebehe yeti, Zoore zuo teŋa la kan seke to. Ge Kanaandoma sɛba n me boe paberɛ poan la tare la zaba toroto zabera, basɛba n boe Bet San teŋa poan la ka sɔ'ɔlom zan'an la sɛba n boe Yezreel bɔn'en ha la ane la bala mea. 17Ge Yosua lebehe yele Yosefdoma wa n de Epraim la Manasedoma wa yeti, Ya zo'e ya ge me kpe'em. Ya kan tara tɔntɛ deyena ma'an, 18ge zoore zuo la n de mɔɔ la dela ya denɛ. Maale ya ko yalega te ko beena la woo dɛna ya denɛ. Kanaandoma wa kpe'em mɛ ge tara zaba toroto zabera, ge bala zan'an ya wan dige ba te ba yehe teŋa la poan.

will be added

X\