Yosua 11

1Hazor naba Yabin n ta wom wana wa la, a tom sɔɔleŋa bo Madon naba Yobab la Simron nadoma la Aksap. 2A me bo la zuɔ nu'o bɔba nadoma se'em te ba teŋhe yaga zɔya zuto la Arabah n boe Kineret Mɔgɔrɛ gɔbega bɔba la nɛŋa bɔba zɔya la tilain la Napot Dor n boe nɛŋa bɔba ha la. 3A me bo Kanaandoma la n boe dapɔya la nɛŋa bɔba la zan'an la Amoridoma la Hitidoma la Perizidoma la Yebusdoma sɛba teŋa en yage zoore zuo la Hivdoma sɛba n boe Hermon Mizpa teŋa fehegan la. 4Te ba zan'an yehe na la ba pɛɛntɛɛnreba la ba zaba yiri la zaba toroto kekeko la ba pɛɛntɛɛnreba la zo'e wo kolaa tentɔnɔ la. 5Nadoma bama wa zan'an lagom la taaba la ba pɛɛntɛɛnreba ta tiihom Merom ko'om la nɔɔrɛn te ba zabɛ la Israel. 6Na'ayenɛ yele Yosua yeti, Da zɔta dabeem la ba. Se'ere n sɔe beere wana ma'an te n kɔrom ba zan'an mɛ eŋɛ Israel nu'uhen. Yamam toonɛ dela ya dɔla kagɛra ba yiri la duma ge nyɔ'anra ba zaba toroto la. 7Te Yosua la pɛɛntɛɛnreba la zan'an ihege wa'ana din'ɛn ba Merom ko'om la nɔɔrɛn pɔhɛ zabega la ba. 8Te Na'ayenɛ dekɛ ba eŋɛ Israeldoma la nu'uhen. Te ba nyaŋɛ ba dige ba bala ta paɛ Sidon Kanten tole Misrepot Maim tare bala ta paɛ Mizpa Bɔn'ɔn la n boe dapɔya bɔba la, ko ba zan'an te nɛre voa ka gee. 9Yosua eŋɛ ba mɛ wo Na'ayenɛ n pa'alɛ en se'em la. A kagɛ ba yiri la duma ge nyɔ' ba zaba toroto la. 10Ze'ele bilam te Yosua ŋmɛregɛ lebe ta zabɛ nyaŋɛ Hazor teŋa ko ka naba. Hazor teŋa wa n daa de teŋhe la zan'an teŋkantɛ. 11Ba kɔrom nɛra woo n boe ka poan mɛ. Ba sagom teŋa la zan'an zan'an ka gee bonvɔa ka poan. Ge te a nya nyɔ' Hazor teŋa bahɛ. 12Yosua to'ohe teŋkanra sena wa mɛ zan'an la se nadoma kɔrom ba. A sagom teŋhe la zan'an wo Na'ayenɛ yameŋa Moses n bo en nɔɔrɛ se'em la. 13Ge Israeldoma wa ka tabelɛ nyɔ' teŋa te ba mɛ zɔya zuto, han dagana Hazor teŋa wa ma'an te Yosua nyɔ' la. 14Te Israeldoma wa ne vaɛ teŋhe la woo lɔgɔrɔ la se dunhe tara, ge ko se poan nɛreba zan'an ne kɔ'ɔn sagom se zan'an zan'an ka gee nɛra yene me se poan. 15Wo Na'ayenɛ n daa bo Moses a nɔɔrɛ se'em la, denɛ mea te Moses me daa dekɛ bo Yosua, te Yosua me tom dɛ. A ka gee se'ere yelese'a te Na'ayenɛ daa bo Moses nɔɔrɛ te a tom la poan bahɛ. 16Yosua n to'e teŋa la zan'an se'em n bala. Teŋse'ehe n yage zɔya zuto la teŋse'ehe n boe zen'se'ehe n Negev la Gosen sɔ'ɔlom la zan'an la zanɔya bɔba zɔya tilain teŋhe la Arabah pɔgɔtia poan la Israel zɔya la ba zɔya bibihe la zan'an. 17Ze'ele Halak Zoore la n to'ohere Seir Zoore la, ta paɛ Baal Gad n boe Lebanon Bɔn'ɔn la n boe Hermon Zoore la teŋa nɔɔrɛ bɔba la, Yosua nyaŋɛ zen'sena nadoma la zan'an mɛ ko ba zan'an. 18Yosua zabɛ la teŋhe sena wa nadoma wa yuue mɛ. 19Han dagana Hivdoma n boe Gibeon teŋa poan la ma'an, teŋa la kayena me ka boe biŋe sunma'ahom nɔɔrɛ la Israeldoma n zabɛ nyaŋɛ teŋhe la zan'an la. 20Na'ayenɛ mɛŋa n kaanbɛ teŋhe sunya te se zabera la Israeldoma wa, te a doohe bala sagom ba kɔ'ɔ sagom ba ge da zɔ ba ninbɔn'ɔn wo Na'ayenɛ n daa bo Moses a nɔɔrɛ se'em la. 21Saŋkaŋa mea poan te Yosua doohe sagom Anakdoma la n boe teŋhe la n yage zoore zuo la. A ze'ele la Hebron ta' Debir la Anab, ta ta' Yuda teŋa la n yage zoore zuo la Israel teŋhe la woo n yage zoore zuo la zan'an. Yosua kɔ'ɔn sagom ba mɛ la ba teŋhe la zan'an. 22Anak nɛra ka gee bɔna Israel teŋa, han dagana Gaza la Gat la Asdod teŋa poan te basɛba gee bɔna bini. 23Te Yosua to'e teŋa la zan'an wo Na'ayenɛ n daa pa'alɛ Moses se'em la. Te a tɔnrɛ ka bo Israeldoma ba yizuto ba yizuto te ka dɛna ba sɔ'ɔlom. Bilam te teŋa la nya vo'ohe zaba poan.

will be added

X\