Yosua 10

1Yerusalem naba Adoni Zedek wom te Yosua zabɛ nyaŋɛ Ai teŋa sagom ka zan'an bahɛ, ge eŋɛ Ai teŋa wa la ka naba wo enŋa n eŋɛ Yeriko teŋa la ka naba la se'em la, ge wom te Gibeondoma eŋɛ la sunma'ahom nɔɔrɛ la Israeldoma ge zin'an lɛm ba la. 2Te la eŋɛ enŋa la a nɛreba la pakerɛ. Se'ere n sɔe la, Gibeon dela teŋkanra la kayema wo ka dela nakanra doma la teŋa kayema. Ka ge me kanregɛ gana Ai te ka boraahe pɛɛma ka lute teŋa. 3Bala te Yerusalem naba Adoni Zedek soolom bo Hebron naba Hoham la Yarmut naba Piram la Lakis naba Yapia la Eglon naba Debir. 4A yele ba yeti, Zom ya na soŋɛ mam te n zabɛ Gibeondoma wa. Se'ere n sɔe la ba biŋe la sugure nɔɔrɛ la Yosua la Israeldoma la. 5Te Amori nadoma banuu la, Yerusalem naba la Hebron naba la Yarmut naba la Lakis naba la Eglon naba, gan'ahɛ lagom taaba pɛɛntɛɛnreba zan'an. Ba keŋɛ ta gilige Gibeon teŋa mum pɔhɛ zabera la ba. 6Te Gibeondoma la nya tom soolom bo Yosua n tiihom la a nɛreba n tiihom bɔna Gilgal teŋan, la yeti, Da zagahɛ ho yamehe wa. Wa'an kalam kalam na fan' to bahɛ. Soŋɛ to te Amori nadoma la woo teŋhe n boe zoore zuo la eŋɛ la nɔɔrɛ deyena wa'ana zabera la to la zuo. 7Te Yosua ihege Gilgal teŋa la a pɛɛntɛɛnreba la zan'an la a borase'ehe pɛɛma n ka lute teŋa la zan'an te ba keŋɛ zom bini. 8Te Na'ayenɛ yele Yosua yeti, Da bahɛ te dabeem tara ho. Mam dekɛ ba eŋɛ la ho nu'uhen. Ba se'em ka boe wan ta'an ze'ele la ho. 9Te Yosua la a nɛreba ze'ele Gilgal keŋɛ yu'uŋɔ la zan'an ta din'e ba. 10Te Na'ayenɛ bahɛ te tuluŋɔ lu ba poan Israeldoma la nɛŋan, te Israel nyaŋɛ ba zan'an zan'an Gibeon teŋa poan. Israel dige ba doohe sɔrɔɔ seko n dole zɔna Bet Horon teŋa poan la kɛ'ɛra ba lɔbera sose'ere n dole yɛ'a Azeka la Makeda teŋhe poan la zuo. 11Ban ta zɔta le'eha Israeldoma la dɔla Bet Horon sore la en dole yɛ'a Azeka la, te Na'ayenɛ mɛŋa bilom saakuga kanra saazuo bahɛ ba zuo na, te saakuga la n ko ba se'em la gane Israeldoma n zabɛ ko ba se'em la. 12Daanden daarɛ te Na'ayenɛ n dekɛ Amoridoma wa eŋɛ Israeldoma nu'uhen la, Yosua ze'ele Israeldoma la nɛŋan yele Na'ayenɛ yeti, Wontɛɛŋa wa, zɛ'a Gibeon teŋa wa zuin bala. Ŋmarega wa, hom me yee Aiyalon ha. 13Te wontɛɛŋa seren zɛ'a bala ka sigera, te ŋmarega me ka zom, tara tara te ba ta ba'ahɛ ba diŋdoma la zan'an wo lan golehɛ eŋɛ Yasar gɔŋɔ poan. Wontɛɛŋa kɔ'ɔn zɛ'a la zuo teŋasoka ka kena te la wɔna te la wona la dabaherɛ mune la. 14Dabaherɛ ka tabelɛ wona la daan dena bii Na'ayenɛ kelehe nɛra po'ohegɔ te la ana wo daan dena wa. Yelemɛŋɛrɛ, Na'ayenɛ mɛŋa n zaberɛ bɔ'ɔra Israeldoma. 15Te Yosua la Israel nɛreba zan'an nya lebe ba tiiheŋɔ zen'an Gilgal teŋa poan. 16Nadoma banuu la zɔ mɛ ta taŋa yoko poan Makeda teŋa poan. 17Te ba ta yele Yosua yeti, Nadoma banuu la sogɛ la yoko n boe Makeda poan. 18Te a lebehe ba yeti, Bilom ya taŋkanra ta le' yoko la nɔɔrɛ ge loe boraahe te se zɛ'a bini gura ko. 19Da ze'ele ya, kɔ'ɔn tabele ya ya diŋdoma la poore, da pon bahɛ ya te ba paɛ teŋkanra poan. Se'ere n sɔe Na'ayenɛ dekɛ ba eŋɛ la ya nu'uhen. 20Te Yosua la Israel nɛreba la sagom ba zan'an ge ta wona te ba gee la nɛra yene ma'an ge basɛba fiin n gee la zɔ paɛ ba teŋkanra la poan peɛn. 21Te pɛɛntɛɛnreba la zan'an ŋmɛregɛ la iŋma'ahom lebe ta paɛ Yosua, ba tiiheŋɔ zen'an Makeda teŋa poan. Te nɛra ka bɔna ya'ara nɔɔrɛ tɔgɔra la Israeldoma wa. 22Te Yosua yeti, Yu'ɛ ya yoko wa nɔɔrɛ wa fɔ nadoma banuu la n boe bini la yehe na. 23Te ba fɔ nadoma banuu wa yehe na, Yerusalem la Hebron la Yarmut la Lakis la Eglon nadoma. 24Ban tare nadoma wa na bo Yosua la, a lagahɛ Israel nɛreba la zan'an, ge yele zaba nɛŋadoma n doohe la en wa'ana la yeti, Tole ya na la ya dekɛ ya na'ma nɛ nadoma wa nyugelehe. Te ba tole na dekɛ ba na'ma nɛ ba nyugelehe. 25Yosua yele ba yeti, Da zote ya dabeem. Da bahɛ ya te ya giinla kɔ'ɔhɛ. Kpeŋe ya iŋhe ge tara potɛn'ɛrɛ. Na'ayenɛ wan eŋɛ diŋdoma sɛba woo te ya wan zabɛ la ba la se'em n wana. 26Yosua nya ko nadoma wa degehɛ ba lo yule tiihe senuu zuo te ba yula bilam tara tara te yene ta lu. 27Yene ta lu ba'ahɛ la, Yosua bo nɔɔrɛ te ba yulihe ba tiihe la zuto lobe ba kɛn'ɛhɛ yoko seko poan te ba soge ne la. Te ba bilom taŋkanra ta le' yoko la nɔɔrɛ te se kelom bɔna bini la zina. 28Daanden daarɛ te Yosua fan' Makeda teŋa ge sagom teŋa la ka nadoma zan'an, sagom nɛra woo n boe ka poan la so'a bahɛ ka gee nɛra. A eŋɛ Makeda teŋa nadoma la wo a daa eŋɛ Yeriko teŋa nadoma la se'em la. 29Yosua la Israel nɛresɛba la zan'an n boe la en la nya ze'ele Makeda teŋa keŋɛ Libna ta zabɛ la ka. 30Na'ayenɛ me dekɛ teŋkaŋa la ka nadoma eŋɛ Israeldoma nu'uhen. Te Yosua ko teŋa la nɛresɛba woo n boe ka poan la, ko ba zan'an la so'a ka gee la nɛra. A eŋɛ ka nadoma wo a daa eŋɛ Yeriko teŋa nadoma se'em la. 31Te Yosua la Israel nɛresɛba woo n boe la en la, nya ze'ele Libna yɛ'a Lakis te a bahɛ te ba woo maahom soŋa te ba zabɛ la ka. 32Na'ayenɛ dekɛ Lakis eŋɛ Israel nu'uhen te Yosua nyaŋɛ teŋa la dabeha ayi' daarɛ. A ko teŋa la nɛresɛba woo n boe ka poan la zan'an la so'a wo a daa eŋɛ Libna teŋa se'em la. 33Ge bala ma'an te Gezer naba Horam zom mɛ la a nɛreba na te a soŋɛ Lakis teŋadoma. Te Yosua lagom nyaŋɛ enŋa la a nɛreba la zan'an ko ba ka gee bonvɔa la ayena. 34Yosua la a nɛreba la nya ze'ele Lakis teŋa yɛ'a Eglon maahom ba mɛŋa soŋa ta paɛ zabɛ la ka. 35Ba nyaŋɛ ka de daarɛ mea sagom ka kɔrom ka poan nɛreba woo wo ban eŋɛ Lakis teŋa se'em la. 36Yosua la Israel nɛreba la n dole en la zan'an nya ze'ele Eglon yɛ'a Hebron ta zabɛ la kaŋa me nyaŋɛ ka. 37Ba to'e teŋa la kɔrom ka nɛreba zan'an la ka naba la ka teŋbibihe nɛreba la nɛreba la zan'an n boe ka poan la. Ba ka gee bonvɔa bini wo ban kɔ'ɔn sagom Eglon teŋa la ka nɛreba zan'an se'em la. 38Te Yosua la Israel nɛreba n boe la en la zan'an ŋmɛregɛ zabɛ la Debir teŋa. 39Ba to'e teŋa la ka naba la ka teŋbibihe zan'an kɔrom ba. Ba sagom sɛla woo n boe ka poan ka gee bonvɔa. Ba eŋɛ Debir teŋa wa wo ban eŋɛ Libna teŋa la ka nadoma la Hebron teŋa se'em la. 40Yosua nyaŋe teŋhe la se'em n bala, ta' la teŋse'ehe n yage zɔya zuo la Negev pɔgɔtia la zanɔya bɔba zɔya tilain la se'ehe woo n boe zɔya tilain la zan'an la se nadoma. A ko ka gee bonvɔa. A ko se poan saala woo n vo'ohere mɛ wo Na'ayenɛ Israel Yenɛ la n bo a nɔɔrɛ se'em la. 41Yosua nyaŋe ba ze'ele la Kades Barnea paɛ Gaza ge doohe Gosen sɔ'ɔlom zan'an ta paɛ Gibeon. 42Yosua ihege la ihegere boyena ma'an nyaŋɛ nadoma bana la ba teŋhe la zan'an. Se'ere n sɔe la Na'ayenɛ Israel Yenɛ la n zaberɛ bɔ'ɔra Israel. 43Te Yosua la Israel nɛreba la zan'an nya lebe ba tiiheŋɔ zen'an la Gilgal teŋa poan.

will be added

X\