Yosua 1

1Na'ayenɛ yameŋa Moses n ta ki la, Na'ayenɛ yele Nun dayɔa Yosua n de Moses tontona yeti, 2Mam yameŋa Moses ka le bɔna. Bala, maahom ho mɛŋa te hom la Israel nɛreba la zan'an yakɛ Yordan Kolaa la, la ya kɛn' teŋsɛka te n dekera bɔ'ɔra ba wa. 3N wan dekɛ teŋa wa zen'sɛka woo te ya na'arɛ nɛ bo ya wo mam n pon yele Moses se'em la. 4Ya beene wan ze'ele la pɔgɔtia nɔɔrɛ bɔba la tare bala ta paɛ Lebanon zɔya la n boe zuɔ bɔba la, dekɛ zɛ'ɛta Euprates kolaa kantɛ la n boe dapɔya bɔba ha la tare bala ta doohe Hitidoma teŋa la poan ta paɛ Mɔgɔrɛ Kantɛ la n boe nɛŋa bɔba la zan'an. 5Te ho vom poan, nɛra ka boe wan ze'ele la ho. N wan bɔna la ho wo mam daa boe la Moses se'em la. N kan malom bahɛ ho bii n zagahɛ ho. 6Kpeŋe ho mɛŋa ge tara potɛn'ɛrɛ! Se'ere n sɔe hom n de se'em wan dɛna ba nɛŋadaana te ba zin'ire teŋsɛka te n pon biŋe nɔɔrɛ la ba yaabdoma te n wan dekɛ bo ba la poan. 7Kpeŋe ho mɛŋa ge tara potɛn'ɛrɛ! Ma'ɛn ho mɛŋa dɔla mam pa'alegɔ zan'an te mam yameŋa Moses bo ho la. Da ŋmɛregɛ a poan lebe gɔbega bii zuɔ, te la wan bo ho nyaŋerɛ zen'an woo te ho yɛ'a. 8Behɛ soŋa te ho kaanlɛ Pa'alegɔ Gɔŋɔ wa daarɛ woo. Zamehɛ kɔ bolika la yu'uŋɔ, ge behɛ soŋa nana sɛla woo n golehɛ bɔna ko poan la. Bala wan bahɛ te ya panrɛ. 9Tɛnra soŋa te n bo ho nɔɔrɛ te, kpeŋe ho mɛŋa ge tara potɛn'ɛrɛ! Da zɔta dabeem bii ho giinla kɔ'ɔhɛ. Se'ere n sɔe Yenɛ ho Na'ayenɛ la wan bɔna la ho zen'an woo te ho yɛ'a. 10Te Yosua bo kpɛ'ɛndoma la nɔɔrɛ yeti, 11Doohe nɛreba la gan'ahegɔ zen'enhe la woo yele ba te nɛra woo maahom a dia soŋa ze'ele, ge dabeha atan' daarɛ, to yeti to yakɛ la Yordan Kolaa wa, la to fan' teŋsɛka te Na'ayenɛ dekera bɔ'ɔra to la sɔna. 12Ge Yosua yele Areubendoma la Gaddoma la Manase yizuo koyema la yeti, 13Tɛnre ya nɔse'ere te Na'ayenɛ yameŋa Moses bo ya la te Na'ayenɛ ya Yenɛ la bo'ore ya la vo'ohogo ge dekera teŋkana wa bɔ'ɔra ya. 14Ya pɔgɔba la ya kɔma la ya dunhe la wan yee teŋa te Moses daa bo ya Yordan Kolaa dapɔya bɔba poan, ge te ya pɛɛntɛɛnreba sɛba n pon maahom zɛ'a wa wan tole nɛŋa yakɛ ta pa'ahɛ ba Israel sɔɔn la. Ya wan soŋɛ ya sɔɔn 15te ba nyaŋɛ zin'ire teŋsɛka n boe Yordan yakenɛ ha te Na'ayenɛ ya Yenɛ dekɛ bo ba la poan. Na'ayenɛ han ta bo Israel buuri la woo vo'ohogo wo a bo yamam, ya nya lebe na bɔna ya mɛŋa teŋa wa n boe Yordan pooren na te Na'ayenɛ yameŋa Moses daa tɔnrɛ bo ya la. 16Te ba lebehe Yosua yeti, Sɛla woo te ho yele to te to eŋɛ, to wan eŋɛ. Ge zen'an woo te ho tom to, to wan keŋɛ. 17To wan nana ho daarɛ woo wo to daa nana Moses la. Ge Na'ayenɛ ho Yenɛ la wan bɔna la ho wo a daa boe la Moses se'em la. 18Se'em woo te ho tɔgɛ te a lebehe bii ho tɔgɛ te a ka nam hɔ, to wan lobe en la kuga ko. Bahɛ te ho iŋa kpeŋɛ ge tara potɛn'ɛrɛ!

will be added

X\