Yona 4

1Ge Yona suunre n sagom, te a poorɛ ka pee. 2Te a sohɛ Na'ayenɛ yeti, Na'ayenɛ, dagɛ mam daa pon nan bɔna yire ha ge yele se'em la n wana? Wana zuo te mam daa le'ehɛ ho kalam zɔta yɛ'a Tarsis teŋa la. Mam mi' te ho dela zo'ohogɔ la ninbɔn'zɔta Yenɛ, ka ete suunre tɔtɔ, perɛ la nɔŋerɛ la etesoŋɔ, tɛɛra ho potɛn'ɛrɛ sagaŋɔ saŋa woo poan. 3Na'ayenɛ, kɔ'ɔn dekɛ mam vom nananawa, mam kum nyane n vom. 4Te Na'ayenɛ soke en yeti, Ho tare sore te ho sunsunya nyie la mam? 5Te Yona yehe lebe teŋa la dapoore ha, ta tin' paka bilam, kɛn' zin'an ka poan ge gura Na'ayenɛ n wan eŋɛ teŋa la se'em. 6Te Na'ayenɛ n de Yenɛ bahɛ te gɛntɛ yehe a paka la zen'an, vuurom a paka la zuo, te nya zin'an ma'ahom la poan, te a sunsagaŋɔ la sige, te Yona poorɛ pee la gɛntɛ la. 7Ge yiimbeere bolika, te Yenɛ bahɛ te zunzunre wa'ana obe gɛntɛ la te de ki. 8Te wontɛɛŋa ta nyɛɛn na te Na'ayenɛ bahɛ te sabeeo tuluga ze'ele dapɔya na lobe te tuluga woŋɛ Yona te a ta gee fiin la a lige, nya yele a mɛŋa yeti, Mam kum nyane n vom. 9Te Na'ayenɛ soke Yona yeti, Ho tare sore te ho suunre nyie la gɛntɛ la? Te a lebehe en yeti, Ɛɛn, mam suunre pon nyie paɛ la zen'an te mam han pon ki ne la ane ne soŋa. 10Te Na'ayenɛ yele en yeti, gɛntɛ wa te ho zabera de zuo wa dagɛ hom borɛ dɛ bii hom bahɛ dɛ te de zo'e. De mɛŋa n yehe na, ge le ki. 11Nineveh teŋa tare nɛreba n gaŋɛ tuha kɔbega, la tuha pihiyi' mɛ n ka mina ba zuɔ la ba gɔbega, ge tara dunhe kekeko. N ka tare sore te n tɛn'ɛha teŋkana wa yele la n zɔ ka ninbɔn'ɔn?

will be added

X\