Yona 1

1Te Na'ayenɛ yetɔgom wa'an Amitai dayɔa Yona zen'an na yeti, 2Ihege keŋɛ Nineveh teŋkantɛ la poan, ta mɔɔlɛ teŋa la n ete se'em la. Mam nyɛte ba toonbe'ero la n ane se'em. 3Te Yona tɛn'ɛhɛ a suunre poan te a le'ehɛ zɔ fɔnregɛ Na'ayenɛ nɛŋan keŋɛ Tarsis teŋa. Bala, a keŋɛ la Yoppa teŋa ta nyɛ te ɔɔnrɔŋɔ kantɛ maahom te ko keŋɛ enŋa n ye'ehe zen'an la. Te a yɔ a ligiri ge zom, nya le'eha Na'ayenɛ yɛ'a enŋa n ye' zen'an la. 4Te Na'ayenɛ tom saabeeokeŋɔ ko'om la poan. Te sabeeo la lɔbera te ɔɔnrɔŋɔ la gee la ko wɔnregɛ. 5Te dabeem kɛn' sɛba woo n boe ko poan la, te nɛra woo kaaha yi'ira a yenɛ a yenɛ. Te la mɔ'ɛ te ba gbɛ'ɛra lɔgɔrɔ seto woo n boe ɔɔnrɔŋɔ la poan tebegɛ la bahɛ ko'om la poan te la bahɛ te ɔɔnrɔŋɔ la fakɛ. Ge bala ma'an la te Yona sige la golon gokɔ poan ha ta gan'an ginha. 6Te se'em n behere ɔɔnrɔŋɔ la sige paɛ en ha soke en yeti, Hom n wan eŋɛ la wane ginha? Ihege yi' ho me yenɛ. Daanse'ere a wan zɔ te ninbɔn'ɔn la a fan' to bahɛ. 7Te sɛba woon boe ɔɔnrɔŋɔ la poan la nya yele taaba yeti, Wa'an ya na te to ŋmɛ' gbaŋa behɛ nya ane n sɔe te yele dena wa paara to wa? Te ba ŋmɛ' gbaŋa la, te la nyɔkɛ Yona. 8Te ba nya soke en yeti, Yele to, ane zuo te yele dena wa paara to na wa? Hom tone la bene tooma? Ho ze'ele la bɛha na? Buuri dene poan te ho ze'ele na? 9Te a lebehe ba yeti, Mam dela Hebru nɛra, mam na'ahere la saazuo Na'ayenɛ wa n de Yenɛ maalɛ ko'kantɛ wa la teŋparɛ wa la. 10Te yele dena wa ɛnkɛ nɛreba la paleŋa te ba soke en yeti, Hom eŋɛ la bem? Ba daa baŋɛ te a zote le'eha la Na'ayenɛ. Se'ere n sɔe la, a mɛŋa pon deŋɛ yele ba me. 11Te ko'om la kɔ'ɔn malom gbirigera gana bala. Te ba soke en yeti, Te nya wan eŋɛ ho la wane te ko'om wa ma'ɛn bo to? 12Te a lebehe yeti, Nyɔkɛ ya mam lobe bahɛ ko'om la poan ge bo wan man'ɛ. Mam mi' te mam zuo te ko'om wa gbita wana la ya wa. 13Te nɛreba la bahɛ bala, ge zegera te ba ŋmɛregɛ ɔɔnrɔŋɔ la lebe doone. Ge la ka ta'an eŋɛ bala. Se'ere n sɔe la, ko'om la nya daa ba' gbirigera me. 14Te ba daa kaahɛ bo Na'ayenɛ yeti, Na'ayenɛ, da bahɛ te nɛra wa kum taala dɔla to. Da bahɛ te ho suunre nyie la tɔ, la tomam n ko' nɛra se'em n ka tare taalɛ wa. Hom mɛŋa Na'ayenɛ n tom hom bote se'em. 15Ge nya gin' Yona, zɛnkɛ en lobe bahɛ ko'omen la, te ko'om la lebehe man'ɛ sim. 16Wana te Na'ayenɛ dabeem kɛn' nɛreba la, te ba nyɔ' kaanbeŋɔ bo'olom bo Na'ayenɛ, ge biŋe nɔya la Na'ayenɛ. 17Ge Na'ayenɛ bahɛ mɛ te ko'om poan bonsɛla vole Yona, te a bɔna a poorɛn dabeha atan', yu'uŋɔ la wontɛɛŋa zan'an.

will be added

X\