Yob 9

1Te Yob lerege yeti, 2La de sera, mam mi' te la dela bala, ge asaala yeti a eŋɛ la wane kan tara tuure Yenɛ nɛŋan? 3Se'em han yeti a zabɛ la en, a han tɔgɛ tuhure, ho kan nyaŋɛ lerege yele yenɛ. 4A dela mi'ilom daana, ge kpe'em. Ane n boe tabelɛ zegɛ la en nyaŋɛ? 5A suunre ne han nyie, a ne vɔn' zɔya lobe bahɛ mɛ te zɔya la ka mina se'em n eŋɛ bala. 6Enŋa n ne damɛ teŋparɛ wa, te ka zɛnya zan'an miina. 7Enŋa n wan bo yentule wa nɔɔrɛ te de kan zom na. Enŋa n wan ta'an bahɛ te ŋmarebibihe kan yehe na. 8Enŋa ma'an n yeregɛ saŋgbanɛ wa, ge kena ko'mi'inhe zuo. 9Ane n maalɛ ŋmarebili buuri sugumnɔɔren botan' wa, te se'ehe bɔna gɔbega bɔba, te se'ehe bɔna zuɔ, te se'ehe me bɔna saŋgbanɛ zuo wa? 10A ete la yelekanra, la yɛla te a gana nɛra potɛn'ɛrɛ, ge tona toon nyalema n ka tare kanlɛ. 11Behɛ, a doohe mam zen'an tole ge te n kan nyɛ en. A kane mɛ, ge n kan baŋɛ en. 12A han fan' keŋɛ, ane n wan gu' en. Ane wan soke en yeti, Ho ete la bem? 13Yenɛ kan pakɛ a sunsunyiim la. Arahab soŋoreba gan' la a na'ma teŋa. 14N yeti n lerege Yenɛ yeti bo? Bii n tɔgɛ la en wane? 15La mam pon ka tara tuure wa, n kan ta'an lerege en. La dela n sohɛ se'em n gankere mam wa ninbɔn'zɔrɛ. 16Mam han yi' en te a pon sakɛ, mam ka tɛn'ɛhɛ a wan kelehe mam. 17A pa'ahere mam la too, ge malom pogolena mam yoo. 18A kan bahɛ te n vo'ohe, a malom peta mam mɛ la too. 19La han dɛna la paŋa magahegɔ, enŋa n de paŋadaana. La han le dɛna seradaana, ane n wan ze'ele la en? 20La mam pon ka tara tuure la, mam mɛŋa nɔɔrɛ wan gankɛ mam. La mam pon ka tara be'em la a wan pa'alɛ mam n tuure. 21Mam mi' te n ka tare tuure, ge n pon le dagana sɛla. Mam vom wa ka le pakɛ mam. 22Mam yeti, La zan'an dela boyena, Yenɛ sagone sɛba n ka tare tuure mɛ, ge sagona sɛba n tue. 23Sagaŋɔ han ne wa'ana koora, Yenɛ ne la'ara a ka tare be'emdoma nɔyalegerɛ la mɛ. 24Teŋparɛ wa dekɛ bo la potɔpa. Yenɛ pin' teŋparɛ wa yelegankereba nini mɛ. La han dagana Yenɛ, ane? 25Mam dabeha la kanbele gana zɔta mɛ. Dabeha la ɛnkere mɛ. A ka nyɛ som. 26Mam dabeha la kanbele gana oonɛ mɔɔ, a suŋere mɛ wo yebega n suŋere sigera sɛla zuo te a nyɔkɛ la. 27Mam han ne yeti n wan tamɛ n nyɔyɔm wa, n wan bahɛ n ninbɔn'ɔn wa ge lorege nɛŋa, 28mam ne behɛ n namehegɔ la, te dabeem n tara mam. Se'ere n sɔe la mam mi' te ho kan bahɛ mam naana. 29Mam yeti n nyɛ la sagaŋɔ. Bene te n ye wan nameha n mɛŋa yore? 30Mam han pon sɔ n iŋa la ki'ibo, pee n nu'uhe la naakenya, 31ge ho wan tɔnhegɛ mam bahɛ bɛngerɔ poan, te n futo fɛn'ɛra. 32Yenɛ dagɛ nɛresaala wo mam n de nɛresaala se'em wa, te n wan ta'an lerege en. A dagɛ nɛresaala te to wan ta'an keŋɛ naba yire. 33Yele maala ka boe to teŋasoka wan sɔna to bayi' la. 34A han wan bahɛ ne a kafɛɛbega la, ge ka vuunha mam, 35mam wan tɔgɔra te dabeem ka tara mam, ge la ka ane bala.

will be added

X\