Yob 42

1Te Yob lerege Na'ayenɛ yeti, 2Mam mi' te ho ta'an eŋɛ sɛla woo, te sɛla woo te ho eta, nɛra kan ta'an gu de. 3Hom Yenɛ yeti, ane n bala tara gɔɔnɛ yetɔgom lila kan'aŋɔ wa? Mam mi' te n tɔgɛ la se'ere te n pon ka mina, n yele la yelese'a n gane mam. 4Hom Yenɛ n yele mam te n kɛleha te ho tɔgɛ. Ho wan soke mam te n ton pa'alɛ hɔ. 5Mam Yob wom ho yele la awomtoba, ge nananawa, mam nini n nyɛ. 6Mam le dagana sɛla, mam vaɛ tentɔnɔ, la tampegelom yele en mɛŋa te mam tee n suunre. 7Na'ayenɛ n tɔgɛ bo Yob ba'ahɛ la, Na'ayenɛ yele Teman teŋa boraa Elipaz la yeti, Mam sunsunyiim taɛ bahɛ hom la ho zɔdoma bayi' zuo, la yamam ka tɔgɛ mam yele soŋa wo Yob n tɔgɛ se'em la. 8Bala, nyɔkɛ lɔlehe seyopɔe, la piihe seyopɔe, keŋɛ mam yameŋa Yob zen'en, ta kaanbɛ nyɔ'an bo'olom kaanbegɔ bo ya mɛŋa, ge te mam yameŋa Yob la sonhɛ bo ya. Enŋa sohoga te mam wan kelehe kan eŋɛ ya wo ya yetɔgɔyooro la n nare n eŋɛ ya se'em la, ge n kan kelehe yamam. Se'ere n sɔe la, ya ka tɔgɛ mam yele soŋa wo n yameŋa Yob wa. 9Bala te Teman teŋa boraa Elipaz, la Suah teŋa boraa Bildad, la Naama teŋa boraa Zopar, keŋɛ te eŋɛ Na'ayenɛ n yele ba se'em la, te Na'ayenɛ to'e Yob sohoga la. 10Yob n sohɛ bo a zɔdoma la ba'ahɛ la, te Na'ayenɛ lebehe Yob lɔgɔrɔ la zan'an bo en. Na'ayenɛ lebehe a lɔgɔrɔ la zan'an la sugumnɔɔren boyi' boyi' bo en. 11Te a sɔɔnrɔ, la a tanpa, la sɛba woo n daa mi' en la bibige na, te ba zan'an zin'ire a yire la poan di, ge nyu', ge bogolɛ a suunre, la yeletooro se'a te Na'ayenɛ bahɛ te a paɛ en la. Ge te ba zan'an bo Yob ligiri, la sanlema nu'toa nu'toa. 12Te Na'ayenɛ kan' bahɛ Yob pooren dabeha la gana a yia, dabeha la, te Yob nyɛ piihe tuha pia, la anaahe, yogoma tuha ayoobe, lɔlɔkɔɔrehe kɔɔhom tuhure, la bonhe yan'ahe tuhure. 13Te Yob tara dayɔɔhe seyopɔe, la pugunto totan'. 14Te a segɛ yia pugula la Yemima, se'em n tagalɛ la Kezia, se'em n tagalɛ botan' la Keren Hapuk. 15Teŋa la poan zan'an, pɔka ka boe bini te ka soŋa yɛ'a Yob pɔyɔɔhe la poan na. Te Yob tɔnrɛ zen'enhe bo bama, la ba tanpa la. 16Yele ana wa n tole ba'ahɛ la, Yob vɔ paɛ la yuuma kɔbega, la yuuma pihinaahe pa'ahɛ, nyɛ a kɔma la yaan naahe buuri. 17Yob korogɛ paɛ mɛ, kɔrɔgɛ ta gan'an zɔŋen ge nya ki'.

will be added

X\