Yob 41

1Hom n wan nyaŋɛ nyɔkɛ ɛnbega la zimbaŋa, bii ho dekɛ guŋo lo a zɛleŋa dooe na? 2Hom n wan nyaŋɛ dekɛ mi'an lo ɛnbega nyɔya, bii ho dekɛ baŋɛ lo' a kareyɛ'a. 3Ɛnbega wan belom ho mɛ yoi? A wan tɔgɛ la ho baanlam? 4A wan biŋe nɔɔrɛ la ho te ho dekɛ en te a dɛna ho yameŋa yɛ'ɛha? 5Ho wan nyaŋɛ dɛ'ɛna la ɛnbega wo niiŋa, bii ho dekɛ mi'an yɔɔɛ a nyugela te a kena la ho pɔyɔɔhe? 6Da'areba wan di a da'a? Ba wan tɔnre en bo kɔɔhereba? 7Ho wan nyaŋɛ lobe a iŋa la kanɛ, bii ho voregɛ a zuo la pɛɛnhɔ? 8Ho han yeti ho gin' ɛnbega, ge tɛn'ɛhɛ lan wan ana se'em, ho kan le kalom en. 9Behɛ, ho potɛn'ɛrɛ la parom mɛ, dabeem ka tare hɔ la ho lɛm en? 10Se'em ka boe kpe'em wan sakɛ ze'ele la en. Ane n de enŋa wan ta'an ze'ele la mam? 11Ane n tabelɛ bo mam te n wan lerege en? Sɛla woo n boe teŋparɛ wa zuo dela mam denɛ. 12N kan sogɛ ho a na'ma n kpe'em se'em, bii a paŋa, bii a iŋa la n kpe'em se'em. 13Ane n wan nyaŋɛ siie a ganɛ la? Ane n wan nyaŋɛ voregɛ a ganɛ la en tagalom boyi' la? 14Ane n wan nyaŋɛ siie a nɛŋa ganɛ la? A nyɛna tare la dabeem. 15A poore ganɛ nyareha nyareha n de a pa'ale mɛŋa. Ba wɔgɛ la taaba gu'ura en. 16Nyareha nyareha la ba' lɛm la taaba te sabeeo pon ka ŋmɛ'ɛra tɔla. 17Ba kɔ'ɔn naɛ la taaba, gɛnrɛ taaba kan ta'an yelehe. 18A han fɔɔnhɛ, bugum n yehere na, te a nini ana wii wo yentule n ye sigera la. 19Bugum n ze'ete a nɔɔrɛn na, bugum panrehe n ɛngere a nɔɔrɛ poan na. 20Zun'uhe n ze'ete a nyɔya poan na wo dokɔ n kɔte bugum zuo la, bii mɔɔ te bugum dita la. 21A vo'ohogo ma'an wan bahɛ te bugum saana taɛ, bugum n ze'ete a nɔɔrɛn na. 22A nyugela dela paŋa ma'an, te a zen'an woo tara dabeem. 23A nɛnɔ kohe mɛ, ta' taaba ka tana yelegera. 24A sunsure ku'e mɛ wo kugure la, ku'e wo nɛɛrɛ la. 25A han ne ihege ze'ele, dabeem ne kɛn' panhedoma mɛ, n wɔnrega la zuo te ba tuluna. 26So'a han pon paɛ en, ka kan kɛn', bii saanbega, bii kanɛ, bii lea kan ta'an eŋɛ en sɛla. 27Kurugo dela mɔɔ a nɛŋan, te nyɔgom kurugo dɛna keŋkanrɛ. 28Pɛɛma kan ta'an bahɛ te a zɔ. Kalɔbega kugure dela sɔkɔ bo en. 29Gambama dela yoo, te sɔŋmatega dameŋa dɛna yelɔ'ɔrɔ bo en. 30A pulin ŋmatɛ mɛ wo sayɛɛhɛ la. A ne yeregɛ a mɛŋa biŋe bɛngerɔ poan, te la din'inhe te a naanɛ la gan'an. 31Ane bahɛ te ko'om la teŋa ha damena mɛ wo ko'om n kɔte la, te fulunfuka to'e ko'kantɛ la zan'an. 32N boe ko'kantɛ la poan la, ko'om la ŋmɛ'ɛre mɛ fugkura, pelege wo bonkɛka zonto la dɔla a poore. 33A tadaana ka boe teŋparɛ wa zuo. A dela duŋa en ka tare dabeem. 34Enŋa n kpe'em gana bonvɔa woo. A dela pa'alɛ mɛŋa woo naba.

will be added

X\