Yob 40

1Te Na'ayenɛ yele Yob yeti, 2Zɛrɛgerɛ daana wan ta'an ŋmɛ'ɛra nɔkpe'ene la Gaŋɛ Zan'an Yenɛ wa? Hom se'em n ŋmɛ'ɛre nɔkpe'ene la Yenɛ soni ho tara leregere. 3Te Yob lerege Na'ayenɛ yeti, 4Mam ka mi' sɛla, n yeti n lerege ho la wane? Mam mum n nɔɔrɛ mɛ. 5Mam tɔgɛ la boyena, ge n kan ta'an lerege. N wan pa'ahɛ ne boyi', ge n kan pa'ahɛ. 6Te Na'ayenɛ lerege Yob sabeeo kantɛ la poan na yeti, 7Bobe ho sɛganɛ ihege ze'ele boraanɛ, te n soke ho te ho pa'alɛ mam. 8Hom n wan ton yele mam te mam tue mɛ? Hom n wan ton yaalɛ mam ge nyɛ zuo? 9Hom paŋa zone la Yenɛ, bii hom koa wan ta'an tanhera wo Yenɛ? 10Dɛla paŋa, la birikinte poan, ge bagɛ ho mɛŋa la soŋa, la nyanka. 11Ka'ɛ ho sunsunyiim la biŋe na, ge behɛ sɛba n pa'ale ba mɛhe la, la ho sigehe ba teŋa na. 12Behɛ pa'ale mɛŋadoma la la ho sigehe ba teŋa, ge zan' be'emdoma la n boe zen'an la bahɛ na. 13Vaɛ ba zan'an ta pin' teŋa, la ho pin' ba teŋa ha te ba da nyɛta, 14Te mam me sakɛ bo ho yeti, Ho me tare ho mɛŋa paŋa n wan ta'an fan' bahɛ. 15Behɛ mɔɔdaana wa, mam naam mɛ wo mam naam hom se'em la, te a ɔbera yaama wo nahɔ la. 16A paŋa boe la a sea poan, te a kpe'eŋo bɔna a pooren. 17A zoorɛ tan' ŋmɛɛlona mɛ wo mɔlɔsonɔ tia la, te a na'ma giinla ta' taaba, 18A konba kpe'em mɛ wo nyɔgom kurugo la, te a na'ma ana wo kuto la. 19Enŋa n de lɔgɔkantɛ seko te Yenɛ naam yia, a naana la ma'an n wan ta'an ko en la so'a. 20A dia boe la zɔya zuto, zen'an te dunhe woo dɛ'ɛna. 21A gan' la tuntuuro teŋa. A gan' la ko'om nɔɔrɛn man'aherɛ mɔwɔgɔrɔ poan. 22Tuntuuro la en bo'ore en ma'ahom, te bɔgɔhe poan tiihe kae en. 23Kolaahe han pon perɛ, dabeem ka tare en. Yordan han pon perɛ ŋmɛ'ɛra en la se'em me, dabeem ka tare en. 24Se'em wan ta'an bɛnre en la baŋa a ninin, bii ho lo' a nyɔrɛ la baŋa?

will be added

X\