Yob 39

1Hom mi' mɔen boohe n dɔgɔre se'em ma'an? Hom mi' ɛɛɔ n dɔgɔre se'em ma'an? 2Hom mi' ban ne dekɛ ŋmarehe se'em tun, la ban ne dɔgɛ saŋsɛka poan? 3Ban ne virige se'em ma'an te ba dɔgɛ, la ba dɔgɔre ba'ahɛ. 4Ba kɔma ka yuure zo'ore, ba zo'ore la mɔɔ mea poan, ta zo'e ba'ahɛ keŋɛ. 5Ane n bahɛ te mɔen boŋa ɛɛra fai la? Ane n lorege boŋa wa bahɛ? 6Mam bo en la pɔgɔtia te la dɛna a yire, te yaarom paberɛ dela a kɛn'a zen'en. 7Teŋa poan voole ka paare ka, duŋkeema dunhe pe'ere tanhega ka paare ka. 8Ka eere la zɔya zuto ɔbera, segeha yaam paala ma'an ɔbera. 9Mɔen nahɔ wan sakɛ tona bɔ'ɔra hom? Bo wan sakɛ gan'arɛ ho nagadeene poan yu'uŋyeŋɔ ma'an? 10Ho wan nyaŋɛ yɔgɛ bɔ? Ho wan nyaŋɛ dekɛ bɔ kɔ ho samanɛ? 11Hom n wan dekɛ ho mɛŋa delom mɔen nahɔ wa te bo tare paŋa, ge dekɛ ho tooma bo bo? 12Ho wan tara sakerɛ te bo wan bɔna la hɔ, ziira ho ki kena dia tɔa zen'an la na? 13Taataa kelompagehe ŋmɛ'ɛre la pakapaka, ge a wan nyaŋɛ paɛ la bɛ? 14A ka lobere gɛla uma a, a ne dekɛ a bahɛ mɛ te teŋa tuluga uma a. 15A ne tamɛ te a na'arɛ ta'an nɛ ba wɔnrɛ, bii mɔen duŋa nɛ ba wɔnrɛ. 16A ete a kɔma mɛ vɛngela vɛngela wo ba dagɛ la a kɔma la, te a namehegɔ la ta'an ta bahɛ yoo. Ge la bala zan'an, la ka pakɛ en. 17Se'ere n sɔe la, Yenɛ ka bo en yam, a ka tare tɔntɛ bɔkerɛ poan. 18Ge a han ihege saazuo te a zɔ, yiri la i ban'areba ka lɛne en. 19Hom bo yeho bo paŋa wa? Hom bagɛ bo nyugela la lom la? 20Hom ne bahɛ yeho te bo ɛngera wo bonɛngela la? Te bo paŋa fɔɔnhera tara dabeem. 21Bo kanrɛ la teŋa ge nyeena la bo paŋa la. Ba yehere mɛ to'oha zaba lɔgɔrɔ. 22Dabeem dela yelɔ'ɔrɔ bo bo, te bo ka zɔta sɛla. Bo ka zote so'a. 23Loko zan'anɛ, kanɛ, la kanɛ woko la duure la a loga. 24Bo nini ku'e mɛ, te bo kanra teŋa, bo han wom tentanɛ peebego, bo ka tai' zɛ'ɛta. 25Tentanɛ ne han peebe, bo ne sin'im mɛ. Bo wone zaberɛ nyuŋo, la zaba nɛŋadoma tanhega la la zen'an n zaan ha. 26Hom eŋɛ selega te ka tana suŋera na, ge ne yeregɛ ka kelompagehe ɛngera kaara la? 27Hom ne bo nɔɔrɛ te tuguho ɛngera saazuo, ge tɛ'ɛra ko teko saazuo ha? 28Tuguho kɛn'ɛre la tanhe poan ha, zen'an te nɛra kan paɛ bini, tɛ'ɛra ko teko la taŋsɛngehe poan. 29Ko boe la bilam ge beha ko wan di sɛla. Ko nini wan nyɛ nɛŋɔ la te ko boe la zen'an n zaan ha. 30Ko kɔma nyuunre la ziim. Zaberɛ n boe zen'an te kɔrɔŋɔ bɔna, ko boe la bilam.

will be added

X\