Yob 38

1Te sabeeo kantɛ vukura, te Na'ayenɛ lerege Yob sabeeo la poan na yeti, 2Ane n bala tara gɔɔn yetɔgom lila kan'aŋɔ wa? 3Lo' ho sɛganɛ soŋa soŋa, ihege ze'ele wo boraa la, te n soke ho te ho pa'alɛ mam. 4Saŋsɛka te mam biŋera teŋparɛ wa ɛnberɛ la te hom boe la bɛ? Ho han tara bɔkerɛ ho yele mam. 5Ane n magahe teŋparɛ wa, mam mi' te ho wan ba'ahom mina. Bii se'em n lo mi'an makɛ ka? 6Teŋparɛ wa fehega yage la bene zuo. Bii ane n daa biŋe ka ɛnberɛ, se'em 7ma'an te bolika belomŋma'arɛ nyankera la, te Yenɛ dayɔɔhe nyeena la yooma la? 8Ko'om en tanhɛ teŋa wo tɔlonto'a la, ane n nyaŋɛ gu' bo? 9Se'em ma'an te mam maalɛ saŋgbanɛ wa te de ana wo fuo bo ko'kantɛ wa, te lika kantɛ ana wo fukantɛ bo bo la, 10ge pa'alɛ bo beene, ge maalɛ kuto la kolehe kɛn'ɛhɛ bo, 11ge bo bo nɔɔrɛ yeti, Hom n wan kena paara zen'an beene n wana, kalam te ho ko'mi'inhe wan ŋmɛ'ɛra tɛkera la, te ane n boe? 12Hom ihege daarɛ, ho tabelɛ yi' bolika te ka wa'ana, bii ho tabelɛ pa'alɛ sɔɔnrom bo zɔŋa zen'an? 13Sɔɔnrom wa n ne gorɛ teŋparɛ wa kpa'ahɛ ka wo soŋɔ la te be'emdoma la ta zogɛ zan'an. 14Teŋparɛ wa gomehere mɛ wo yɔgɔrɔ n boe yagombaha nu'uhen la. Ka sɛla woo nɛɛ mɛ wo fuo en pin sɛla te la naanɛ nɛɛ se'em la. 15Be'emdoma kan nyɛ nɛɛhom. Ba paŋa ba'ahɛ ya. 16Hom mi' ko'kanra en ze'ete zen'an na pɛta ko'kantɛ wa, bii ho wan ta'an sige bo teŋa teŋa ha ɛɛra kaara? 17Ba tabelɛ yu'ɛ kum nayaŋa pa'alɛ hɔ, bii ho nini nyɛ lika teŋa nayaŋa? 18Ho mi' teŋparɛ wa yaleŋa beene? Ho han mina ho yele mam. 19Sɔrɔɔ kone en dole yɛ'ɛha nɛɛhom wa n boe zen'an la? Lika boe la bɛha 20te ho baŋɛ a yire sore, tare en kule a teŋa? 21Hom mi'? Bala ma'an te ba dɔgɛ hɔ? Ho yuue ya? 22Hom tabelɛ kɛn' ko'om en gerɛ lebege kugure lɔgɔrɔ biŋere bɔ'ɔ la poan, ho kɛn' saakuga lɔgɔrɔ biŋere bɔ'ɔ la, 23te mam tara gura daaŋɔ la zaberɛ daarɛ la poan? 24La eŋɛ la wane te bugum tɔnta paara zen'an woo wa? La eŋɛ la wane te sabeeo zɛ'ɛta dapɔya bɔba lɔbera paara zen'an woo? 25Ane n kebegɛ yoko te saakanra wa niira, bii saa tanhera? 26Ane n bahɛ te ka niira zen'sɛka te nɛra ka bɔna ka poan, pɔgɔtia teŋa te nɛra ka bɔna bini? 27Te ka ma'alɛ zen'yoo wa n gan ka ma'an la, ge bahɛ te mɔɔ puha teŋa la poan la? 28Saa tare sɔ, bii mɛgelom tara dɔgɔra? 29Ane puuren te saakugure kanra wa ze'ele yehe na? Ane n dɔgɛ pika wa n boe saazuo wa? 30Ko'om ne ku'e mɛ wo kugure la, te ko'kantɛ wa ma'ɛn girɛ. 31Ho wan ta'an ba' ŋmarebili sagebiinha la kuto, bii lorege min'se'ehe n lo' ŋmarebili belomŋma'arɛ bahɛ na? 32Nɛra wan ta'an bahɛ te ŋmarebibihe yehe se saŋa poan na, te a pa'ala se wan dɔla se'em, bii dɔla ŋmarebila Anoa la ka bia. 33Ho mi' malema se'a n sogɛ saazuo wa ha, bii ho ta'an bahɛ te ba paŋa bɔna teŋparɛ wa zuo? 34Ho wan ta'an tɔgɛ te la paɛ saazuo ha te ko'om ka'ɛ pin' ho na? 35Ho wan ta'an tom saa bugum te bo nyagera, ge yele ho yeti tomam n wana? 36Ane n dekɛ yam kɛn'ɛhɛ asaala poan, bii bɔ'ɔra asaala potɛn'ɛrɛ bɔkerɛ? 37Ane n wan ta'an dekɛ a yam kaanlɛ saŋgbana wa, bii a ka'ɛ saazuo ko'yoore wa bahɛ na? 38Wane ma'an te puuhugo ne lagom taaba kpile lebege kugure, bii yaka kpilom naɛ taaba? 39Ho wan nyaŋɛ nyɔkɛ nɛŋɔ bo gbegenyan'aŋa, bii ho diihe gbegenbibihe 40n boe ba yoko poan, bii se'em ma'an te ba gan'an pigira sɛla te ba nyɔkɛ la? 41Ane n dogore goɔn dia bɔ'ɔra kɔ, se'em ma'an te ko kɔma ne kaaha bɔ'ɔra Yenɛ, te kom tara ba te ba nyaanra bɔta dia la?

will be added

X\