Yob 34

1Te Elihu pa'ahɛ yeti, 2Yamdoma wa, kelehe ya. Mi'ilomdoma wa, enŋa ya toba kɛli. 3Toberɛ en yelehe yɛla, wo zɛleŋa en lemine dia se'em la. 4Bahɛ ya te to loe yelemɛŋɛrɛ, te behɛ ya to mɛhe poan, sɛla n ane soŋa. 5Yob yeti, mam ka tare taalɛ, ge Yenɛ n fan' mam boorɔ, 6te mam n de yelemɛŋɛrɛdaana la, nya lebege ponpɔrɔma, te mam nɔtɛ la ka malom bɛn'ɛnra, la mam pon ka tara be'em la zan'an. 7Ane n boe ana wo Yob, nyuura kɛhega wo ko'om, 8dɔla la be'emdoma, ge kena la potɔpa? 9A yeti, Ho bɔna la Yenɛ ka tare yɔɔrɔ bo nɛra. 10Bala, yamdoma wa, kelehe mam, Yenɛ ka tone be'em Gaŋɛ Zan'an Yenɛ wa ka tuure. 11Yenɛ yɔɔre ba la ba tooma yɔɔrɛ, ban ete se'em la en dole ba. 12Yelemɛŋɛrɛ Yenɛ kan tom be'em. Gaŋɛ Zan'an Yenɛ wa ka tare ninkɔɔra. 13Ane n loe Yenɛ te a beha teŋparɛ wa, bii ane n dekɛ teŋparɛ wa eŋɛ a nu'uhen. 14Yenɛ han lebe to'e a sea la, ge lebe kan'ahɛ vo'ohom woo lebe a mɛŋa zen'an. 15Bonvɔa woo wan mɛlom, saaleba woo wan lebege tentɔnɔ. 16Ho han tara bɔkerɛ, baŋɛ dena wa, kɛleha mam yeti se'em wa. 17Se'em n ka bote som wan dɛna naba? Ho wan ta'an gankɛ tontɔɔ la kpe'eŋo daana wa? 18Ane n wan ta'an yele naba yeti bonyori wa, bii yele nabiihe yeti potɔpa? 19A ka sogore nabiihe, bii a beha bontateba gana nahadoma. Se'ere n sɔe la ba zan'an dela a nu'uhe tooma. 20Po'e fiin wa, te ba ki mɛ. Yu'uŋɔ te la damɛ, te nɛreba ki, te panhedoma tole te nɛresaala nu'o ka kalom ba. 21Yenɛ nini gan' saala woo dɔlɔga zan'an mɛ. Yenɛ nyɛte ban kene se'em mɛ. 22Lika tooma bii paŋa zen'an ka boe te be'emdoma wan sogɛ ba mɛhe. 23Yenɛ ka eere nɛra paɛ en na te a nya gankɛ en. 24A ne le' panhedoma nɔya mɛ ge nan pon ka vɛɛnhɛ ba yele la behɛ, ge tee sɛba ze'ele ba na'arɛ. 25Enŋa n mi' ba yele la zuo, yu'uŋyeŋɔ ma'an te a sagom ba ba'ahɛ. 26Yenɛ namehere ba mɛ nɛreba ninin ba be'em la zuo. 27Se'ere n sɔe la, ba bahɛ Yenɛ dɔlɔga mɛ, ge ka dekɛ a sɔya la yi' sɛla, 28nya bahɛ te nahadoma kaahega la zom paɛ Yenɛ, te a wom lan wone sɛba la kaahega la. 29Yenɛ han sina, ane n wan sɔe sagom? Yenɛ han sogɛ a nɛŋa teŋa, bii nɛra zen'an, ane n wan nyɛ en? 30Yenɛ wan ta'an gu' sɛba n ka zote en, bii sɛba n de bɛnregɔ bo nɛreba la te ba da beha teŋa. 31Nɛra ŋmɛ'ɛre a nyɔn'ɔn mɛ te a kan le tom be'em. Mam han tue ne mɛ, n kan le tue yɛ'ɛha. 32Sɛla te n ka mina, pa'alɛ mam. Mam han tue ne mɛ, n kan le tue pa'ahɛ? 33Hom eŋɛ bala la, Yenɛ nya wan tee sɛla n ane soŋa bo ho la hom n zagahɛ be'em la? Hom n wan loe ge dagɛ mam? Bala, yele hom mi' se'ere. 34Sɛba n de yamdoma la, yamdoma sɛba n wom mam yetɔgom wa wan yele mam yeti, 35Yob ka tɔgɔre la yam, a tɔgɔre ge ka tɛn'ɛha. 36Yob nare ne la ba tɔgɛ ne a yele wa ta paɛ de paarɛ. Se'ere n sɔe la, la leregere la woo dela be'emdoma leregere. 37Yob dekɛ la tobekperega pa'ahɛ a be'em la poan, kpa'aha a nu'uhe to teŋasoka, malom tɔgɔra zabera la Yenɛ.

will be added

X\