Yob 33

1Ge Nananawa Yob, kelehe mam yetɔgom wa, eŋɛ sɛla woo te mam yɛta wa. 2Mam boe bini te n ya'ɛ la n nɔɔrɛ, mam yetɔgom boe la n zɛleŋa zuo. 3Mam yetɔgom wa ze'ele la tontɔɔ suunre poan na. Mam nɔɔrɛ tɔgɔre sera sebo te n mina. 4Yenɛ Sea n naam mam, te Gaŋɛ Zan'an Daana vo'ohom bɔ'ɔra mam vom. 5Ho han wan nyaŋɛ, lerege mam. Maahom ho yɛla soŋa ze'ele n nɛŋa nyɔna la mam. 6Mam ane mɛ wo hom ane se'em wa Yenɛ nɛŋan. Ba dekɛ la yɔkɔ yagom mam me. 7Da tara dabeem la mam te sɛla daan hɔ. Mam nu'o kan tebehegɛ ho zuo. 8Ge mam pon kelehe ne ho yetɔgom la. N wom yetɔgom aŋa mea. 9Ho yeti, Mam dela fa'a ka tara be'em. Mam ka dɛngɛ ge ka bɔna ganleŋɔ poan. 10Ge te Yenɛ tara yele la mam. A dekɛ mam lebege la a dima. 11A ba' la mam na'ma la dɔɔ. A behera mam sɔrɔtɔ woo poan mɛ. 12Ge mam yele ho, te dena wa poan ho ka tare boorɔ. Se'ere n sɔe la Yenɛ gane asaala woo. 13Bene n sɔe te hom nyɔna Yenɛ te a ka leregere nɛra yelehom? 14Se'ere n sɔe la Yenɛ tɔgɔrɛ, ge a han tɔgɛ dena, a me lebere la dena ha poan han dagɛna nɛra ka mi' bala. 15Zaanheŋɔ poan, bii yu'uŋɔ liligere poan, se'em ma'an te saaleba ginha, bii se'em ma'an te gɔɔm zɛɛra ba ba soŋɔ zuo la, 16Yenɛ wan tɔgɛ ba tobain, te dabeem kɛn' ba la a tanhega la, 17te nɛra wan ŋmɛregɛ yehe a be'em poan, ge go' en te a da pa'ala a mɛhe, 18ge go' a sea boko poan, ge go' a vom te ba da ko' en la so'a. 19Yenɛ bo nɛra la tobedɔnlegerɛ a soŋɔ poan, te la wuna en a kɔnba poan ha, 20te a vom pon ka ta bɔta dia, te dia ka tara ba kɔnrehe. 21A iŋa sagom baha yoo, te a kɔnba n daa sogɛ la, nya nɛɛ gan'an. 22A sea pɔnra la boko poan, te a vom bɔna kooreba nu'uhen. 23Bala, te Yenɛ soŋora han pon ze'a a zen'en dɛna nu'po'ɔ ŋmɛ'ɛra, ayena han yehe tuhure poan na te a yele nɛra sɛla n de ma'an bo' en, 24te a zɔ nɛra wa ninbɔn'ɔn ge yeti, yehe ya nɛra wa boko la poan bahɛ, ge mam yɔ mɛ bo en. 25Te nɛra iŋa ana wo bonbilipaalomen, la le ana wo dabehese'a te a dɛna bodibilipaalega la. 26A sohɛ Yenɛ nyɛ zo'ohogɔ a zen'en, a nyɛ Yenɛ nɛŋan ge vole la nyeema te Yenɛ lebehe bo en a tontɔɔ vom la zuo. 27Nɛre ena daana nya wan yoona bɔ'ɔra nɛreba yeti, Mam daa tom la be'em, zagahɛ sɛla n de sera, ge la bala zan'an Yenɛ ka dekɛ bala yɔ mam. 28Yenɛ fan' mam sea n sige mɛ boko poan bahɛ, ge mam wan vɔna nyeena a nɛɛhom la. 29Yenɛ ete yele ana wa woo bɔ'ɔra nɛra la sugumnɔɔren boyi' le botan' poan, 30te a go' nɛra sea boko poan bahɛ te vom nɛɛhom wan nɛɛ a zuo. 31Nyɔkɛ ho mɛŋa Yob ge kɛleha mam. Ana baanlam te n tɔgɛ. 32Ho han tara se'ere ho tɔgɛ. Lerege mam ge tɔgɛ te mam bote ho nyɛ la boorɔ. 33Ge han dagana bala, kɛleha mam. Ana baanlam ge n wan pa'alɛ hɔ yam.

will be added

X\