Yob 31

1Mam biŋe la nɔɔrɛ la n nini wa, mam wan eŋɛ la wane dekɛ i beha pɔka la kɔnre? 2Mam tɔntɛ dela denɛ Yenɛ zen'an? Bem te n to'e dɛna n tɔntɛ Gaŋɛ Zan'an Yenɛ wa zen'an la? 3Dagɛ nɔyalegerɛ n sigere be'emdoma zuo, te sagaŋɔ dɔla sɛba n ganlone la? 4Yenɛ ka nyɛte mam dole sose'a? A ka kaanla mam nɛ na'ma se'em? 5Mam han tabelɛ kena la ponpɔrɔŋɔ, bii n na'ma koreha la pan'ahegɔ, 6ba ye magahɛ mam behɛ, te Yenɛ mɛŋa behɛ n birikinte la n zone se'em. 7Mam han tabelɛ yehe a sore la poan, bii n potɛn'ɛrɛ n tabelɛ doohe la n nini, bii be'em lerom n nu'uhe, 8n borɛ, te ayema sɔe di. Bahɛ te ba voen sɛla n yehe dɛna mam denɛ bahɛ. 9Mam suunre wa han tabelɛ tara koŋkoma'ahom la pɔka, bii nɛ ayema pɔga soŋen, 10Mam pɔga me yi dɔla boraahe, te boraa nɛ ka soŋen. 11Yele dena ba' dɛna la yelebe'o, de dela yele fɛn'ɛherɛ se'ere te keendoma wan zin'ire namehɛ a daana de zuo. 12Bo dela bugum n dite koora, bo wan di mam, la n tare sɛla woo ta ba'ahɛ. 13Mam han tabelɛ zagahɛ n yameŋa n de boraa, bii n yameŋa n de pɔka soke mam sɛla yele, bii ba yele mam te n gee ba mɛ te n ka kelehe ba. 14Yenɛ han ta ihege la mam, n yeti n eŋɛ la wane? A han ta yeti a behɛ n etegɔ, n wan lerege en yeti bo? 15Dagɛ se'em n naam mam eŋɛ n mam puuren la en naam bama me? Dagɛ enŋa mea en naam to zan'an? 16Naha han tabelɛ sohɛ mam sɛla te n mɔŋɛ en, bii n eŋɛ pɔkɔɔnrɛ te de kele, 17bii vole n sagebonrɛ n ma'an, ge te keebega ka lagom la mam di. 18Se'ere n sɔe la, mam bonbilomen ha, mam ugure keebehe mɛ wo n dela ba sɔ la, ge pon beha pɔkɔnpa, te n nan boe la n ma pooren. 19Mam han tabelɛ beha nɛra te a ɛɛra beele ge te n ka yɛɛlɛ en, bii n nyɛ naha en ka tare sɛla wan pin' a mɛŋa, te n bahɛ en. 20Ane n ka kan'are bɔ'ɔra mam, ane te mam ka bo en fuo te pile gan'arɛ ginhe la popeelom? 21Mam han tabelɛ pim keebega, la mam mi' te n wan ta'an pim a boorɔ yetɔgom zen'an la zuo, 22Mam bɔgɔrɔ yi aanhom lu. N nu'o wa suke en kpenkpaŋ tɔnreŋa wa poan lu. 23Yenɛ n kɛn'ɛhɛ mam dabeem la nɔyalegerɛ. Mam kan ta'an ze'ele la a kpe'eŋo la. 24Mam han dekɛ la n mɛŋa delom sanlema, bii n potɛn'ɛrɛ dɛla sanlema, 25bii n nyeena la mam n panrɛ la, bii n nu'o tare zuo, 26bii mam han tabelɛ behɛ wontɛɛŋa wa, bii ŋmarega wa n yuli wa? 27te mam suunre pan'ahɛ mam, te mam pɔnrɛ na'ma ba nɛŋan. 28Bala me dela ganleŋɔ seko te gankereba nara ba namehɛ mam ko zuo. Se'ere n sɔe la, n zagahɛ la Yenɛ. 29Mam puurɛ han tabelɛ pee la n diŋdoma sagaŋɔ, bii be'em paɛ ba te n nyeena. 30Mam ka dekɛ n nɔɔrɛ wa sohɛ be'em bahɛ ba zuo, te la dɛna n tom la be'em. 31Sɛba n boe mam yire poan la han ka yɛta te, aai, to di Yob taregɛ mɛ. 32Saana ka tabelɛ gan'arɛ sore zuo. Mam yu'uhɛ n yire kolehe la bala bɔ'ɔra saama. 33Mam ka sogore n be'em wo sɛba n ete se'em la. Mam ka sogore en be'em n poan. 34Mam ka zote dabeem la nɛrekooŋɔ la. Mam ka zote Yizuto n wan zabera la mam se'em se'em. Mam ka yee deon ka yɛhera na, te ba wan kɛhɛ mam zuo. 35Mam han tare ne se'em n wan kelehe ne mam. Mam nu'o din'ire dela, Gaŋɛ Zan'an Yenɛ la lerege mam. Enŋa n zɛrɛgerɛ mam la, a golehɛ mam eŋɛ en se'em la enŋa gɔŋɔ poan. 36Mam wan to'e a yɛ, mam wan bobe a vuge wo muŋa la. 37Mam wan pa'alɛ en mam na'arɛ woo te mam zɛnkɛ keŋɛ zan'an. N wan ihege wo nabia la paɛ en. 38Ge mam han fan' la samanɛ, te de zagahɛ mam, te de poan vuguhe kaaha bahɛ en zuo. 39te mam di bo poan wɔla ge ka yɔ ligiri, bii bahɛ te sɛba n sɔe bo la ki. 40N han borɛ dia gɔn'ɔhe sɔe yehe na. N han borɛ sɛla mɔbiio sɔe yehe na. Yob yetɔgom ba'ahɛ ya.

will be added

X\