Yob 29

1Te Yob le tɔgɔra a yetɔgom la, 2Mam wan ta'an ana wo ŋmarehe la dabahese'a n tole te Yenɛ daa behera mam te la ana se'em la. 3A bugum n daa nɛɛ mam zuo, nɛɛhom bomo te mam tara dɔla lika poan tɔla. 4Lan dene la se'em ma'an te mam sɔna n mɛŋa, te Yenɛ zɔtɔ daa bɔna n sogorɛ poan la. 5Saŋsɛka te Gaŋɛ Zan'an Daana la bɔna la mam, te n kɔma daa bɔna la mam la. 6Se'em ma'an te mam daa kenɛ zen'an woo tara som, te tanhe ka'aha kaam ba poan bɔ'ɔra mam na la. 7Mam n daa yehe teŋa la zanɔɔren na zin'ire n koka zuo, 8te bonbilipaalehe ne nyɛ mam te dabeem tara ba, te bonkɛgehe ne nyɛ mam dɔnbeta teŋa la. 9Te nɛrekanra daa koŋɔ yetɔgom ge dekɛ ba nu'uhen pin' ba nɔya. 10Te nabiihe koŋɔ yetɔgom ge ana digi digi, te ba zɛlehe ka tana lakera ba nɔya poan. 11N wom yɛla wa, la ne pɛngera mɛ, te n nyɛ bala la, la de tɔgɔre la yetɔgom somɔ. 12Se'ere n sɔe la, mam daa faanre nahadoma woo n kaahere baha mɛ, ge soŋora keebega woo n ka tare soŋora. 13Nɛra n kiire ge daa kan'ara som bɔ'ɔra mam, ge n bahɛ te pɔkɔnpa suunre perɛ la popeelom yooma. 14Mam daa yɛ la tontɔɔ yɛla wo fuo la, te yelemɛŋɛrɛ gankerɛ dɛna n fuwoko la sapibire. 15Mam n daa behere bɔ'ɔra fɔɔhe, ge kena bɔ'ɔra kɔɔrɔnɔ. 16Mam n daa de nahadoma sɔ, ge to'e saama yɛla tɔgɔra bɔ'ɔra ba. 17Mam daa kɔ' be'emdaana nyɛna bahɛ, ge bahɛ te a okɛ sɛla te a nyɔkɛ te a obe la bahɛ. 18Mam daa tɛn'ɛhe te n wan ki la n mea yire poan, te n dabeha ka tare kan'alɛ wo tentɔnɔ la. 19Mam nyɛga daa tɛɛn paɛ ko'om, te mɛgelom luta n yila zuo yu'uŋɔ woo. 20Mam na'ahegɔ wan dɛna paalega bɔna mam poan daarɛ woo, te n tanhɔ kelom dɛna paalega n nu'uhen. 21Nɛreba daa kelehe la mam ge tara potɛn'ɛrɛ ana baanlam ge gura mam kan'aŋɔ la. 22Mam tɔgɛ ba'ahɛ la, ba daa ka lebehe tɔgɛ. Mam yetɔgom la lu' ba toba poan mɛ boga boga. 23Ba daa gura mam wo saa la, ge ya'ɛ ba nɔya maahom gura mam yetɔgom wo teŋa n maahom gura salurugo la. 24Mam han ta la'ara la ba, ba daa ne ka sakɛ sera. Mam bɔŋa la ba dela yelesonɛ. 25Mam daa loe la sore bo ba, ge dɛna naba zin'a, bɔna la ba wo naba n boe la a pɛɛntɛɛnreba se'em la. Mam daa ane wo se'em n bogole kooma suunre la.

will be added

X\