Yob 28

1La de sera, sanlenpeelega boko boe mɛ, te sanlema nyɛlegerɛ zen'an bɔna. 2Ba nyɛte kuto la zigi poan, ge tun'ura kuga teŋa nyɛlegera nyɛta nyɔgom. 3Sanlema tun'ureba tare bugum mɛ sanlema boko poan. Ba tun'ure kena yɛ'a la zen'an n zaan, kɛn'ɛra lika n ane gbarete poan, ɛɛra sanlema. 4Ba ne lo la mi'inhe sige teŋa teŋa ha, zaan la nɛreba. Ba lo la mi'inhe yula dɔɔra ge lɛbera, te nɛreba ka lɛm la ba. 5Dia bute la teŋparɛ wa zuin na, ge te ka teŋa teŋa ha ane mɛ wo bugum la. 6Ka poan te kuga poonhogɔ bɔna, ge te ka tentɔnɔ tara sanlema. 7Niiŋa ka mi' zen'kaŋa, te selega niho ka nyɛ bilam. 8Mɔɔen dunhe se'ehe n wekɛ ka nɛ zen'senhe poan, bii gbegenɛ doohe se zuo tole. 9Sanlema tun'ureba nu'uhe n wɔnte tanhe, ge tun'ura zɔya paara a tilain. 10Ba ŋmate la yogoro tanhe poan, sɛla woo n tare toolom, ba nini nyɛte mɛ. 11A sige kolaahe ko'om poan mɛ, bemehe ko'om la te bo ka zɔta, te a tara sɛla n sogɛ yɛhera na. 12Ge yam boe la bɛ? Bɔkerɛ yire boe la bɛ? 13Saaleba ka mi' sose'ere n dole yɛ'a ba zen'an, ba me ka kɛn'ɛre la vɔpa. 14Teŋa teŋa ha yeti ba ka boe enŋa poan, te ko'kantɛ me yeti enŋa ka nyɛ ba. 15Ba ka boe sanlema poan, te sanlenpeelega me kan ta'an da ba. 16Opir teŋa salensoma la kan ta'an da' ba. Kugu ponpɔnrɔsabelega bii poonhogɔ kan ta'an da'. 17Sanlema bii beheŋa kugure kan paɛ ba, bii nonɔm banhe ta'an dekɛ tee ba. 18Kugu peela la am kuga ka yɔe ba, yam da'a tɔe gane kuga mɔlebagenɛ. 19Kus teŋa kuga mɔlɔdɔɔnrɔ ka zone la yam wa, bii ho dekɛ sanlema makɛ la ba. 20Bala, yam wa ze'ete la bɛ na? Bɔkerɛ yire boe la bɛ? 21Bonvɔa woo niho ka nyɛte en, niihe n ɛngere saazuo ka tabelɛ seke en. 22Kum teŋa, la yɔɔ poan yeti, Bama yeen wom a yele la awomtoba. 23Yenɛ ma'an n mi' yam sore, ge mina a zen'an. 24Se'ere n sɔe la, Yenɛ behe nyɛta teŋparɛ wa zen'an woo mɛ, ge nyɛta sɛla woo n ete teŋparɛ wa zuo mɛ. 25Enŋa n daa magahɛ sabeeo wa tebehom bo bo, ge magahɛ ko'om wa gan'aregɔ zen'an bo bo, 26ge pa'alɛ saa n wan dɔla se'em, ge bo saa tanhega ka sore. 27Ge yam wa, Yenɛ n maalɛ yam, mina bo sɛla woo. 28Ge yele nɛresaaleba yeti, yam n de Daana la zɔɔlom, te be'em bahega dɛna bɔkerɛ.

will be added

X\