Yob 21

1Te Yob lerege yeti, 2Kelehe mam yeti se'em wa, la ho dekɛ pan'ahɛ ho mɛŋa. 3Nyɔkɛ ho mɛŋa la mam, ge bahɛ te n tɔgɛ, te n han tɔgɛ ba'ahɛ, ho nya ta'an kɛhɛ mam. 4Han dɛna mam yele wa, mam nyɔne bɔ'ɔra la nɛresaala yoi? Wane te n wan eŋɛ suguru? 5Beha lan ane mam se'em wa te ho nɔɔrɛ yalegɛ, te ho pin' ho nɔɔrɛ. 6Mam han ne tɛn'ɛhɛ, dabeem ne tara mam, te ɔmi'iha kɛn'ɛra mam. 7Be'emdoma me vɔe bo? Kpe'em, ge vɔna yuura wa? 8Te ba kɔma nyɛta zin'ihere ba nɛŋan, te ba kɔma ɛɛra fai ba nɛŋan. 9Sɛla ka daane ba yiya, te Yenɛ kpa'aherɛ ka bɔna ba zuo. 10Ba lɔlehe ka malom kɔŋera nii zɔŋa, te ba nagayan'ahe ka malom dɔgɔra baha. 11Ba kɔma ne yehe mɛ na wo duŋbɔɔnlɔgɔ la, te ba kɔma wa'ara. 12Ba kɔma ne yoone mɛ la senyagarɛ, ge ŋmɛ'ɛra kɔnlɔgɔ, te yiihe pɛɛbera te ba dɛ'ɛna fai. 13Be'emdoma wa vom dabeha woo dele tarega, te ba ne ta sige ba yɔɔ poan la iŋma'ahom. 14Ba ne yele Yenɛ yeti, Bahɛ to baanlam. Tomam ka bote to mina ho sore la. 15Gaŋɛ Zan'an Yenɛ dela ane te tomam tona bɔ'ɔra en? To yeti to sohɛ n nyɛ la bem? 16Ba tarega la dagɛ la ba mɛŋa murugere bonɔ? Mam ya' la nɔɔrɛ la be'em wa yele wa. 17Be'emdoma wa bugum kiŋire la bolɛ? Nɔyalegerɛ paare be'emdoma la bolɛ? Bolɛ te Yenɛ eta sunsunya la ba, sagona ba? 18Bolɛ te ba ana wo sɔgɔrɔ n boe sabeeo poan, ana wo urugo te sabeeo kanra yɛ'a? 19Hom yeti, Yenɛ tare ba ganleŋɔ la gura la ba kɔma. Yenɛ ton dekɛ yɔ ba mɛŋa te ba mina. 20Bahɛ te ba mɛhe nini nyɛ ba sagaŋɔ. Bahɛ te ba nyu' Gaŋɛ Zan'an Yenɛ la sunsunyiim la. 21A dabeha han ba'ahɛ, a yiya en yee pooren yɛla pakɛ en mɛ yoi? 22Se'em wan ta'an pa'alɛ Yenɛ yam, ge mina te enŋa n gankere sɛba n boe saazuo ha wa? 23Ayema dela a dakanrɛ, bɔna fai te sɛla ka daana en, te a ta ki, 24te a puurɛ perɛ la di soŋa, te a konba poan perɛ la kaam. 25Te ayema me bɔna sunkpɛnlega poan, ka di nyɛlom makɛ, ge ta ki' 26Ba zan'an lagom sigera la teŋa boyena, zunzunya n wan di ba zan'an. 27Mam mi' ya potɛn'ɛrɛ, la yan maahom te ya pɔgɔlom mam se'em. 28Se'ere n sɔe la, hom soke nya, nabia la yire la bɛɛ? Be'emdaana la bɔŋa zen'an la bɛɛ? 29Ho ka soke sɛba n dole sɔya, ho ka sakɛ bo ba nini n nyɛ sɛla la? 30Nɔyalegerɛ ka paare be'emdaana, ge te Yenɛ sunsunyiim ka paara en la? 31Ane n de enŋa wan tɔgɛ en ete sɛla, bii a yɔ en n tone sɛla la? 32Ba han pin' en, nɛra n ne gura a yɔɔ la. 33Tentɔnɔ la n zan'are pin'ira n la ane la soŋa bo en. Nɛra woo wan ba'ahom doohe la a poore bala mea. Sɛba n pon tole ka tare kanlɛ. 34Hom yeti ho eŋɛ la wane dekɛ yetɔgɔyooro wa bogelɛ mam suunre? Sɛla ka boe ho leregere la poan ponpɔrɔŋɔ ma'an.

will be added

X\