Yob 17

1Mam vom ba'ahe mɛ, mam dabeha ka la zaan. Yɔɔ ya' mɛ gura mam. 2Yelemɛŋɛrɛ, nɛre kɛhereba ma'an kaa mam mum, mam nini nyɛte ba ete se'em nyiiha n suunre la mɛ. 3Hom mɛŋa n wan pogolɛ nɔɔrɛ bo mam. Ane n wan ta'an ze'ele bo mam? 4Hom n yo' ba bɔkerɛ la, ho kan bo ba nyaŋerɛ. 5Se'emdaana n yehe a zɔ pooren te a nyɛ yɔɔrɔ, a kɔma namehegɔ n de a yɔɔrɛ. 6Yenɛ eŋɛ mam te mam dɛna la nɛreba bontoola, mam te ba tobeha nɔtɔɔnrom ma'ara. 7Ɛnregɔ n bahɛ te mam nini fɔ, te mam iŋa zan'an baanlom wo zanɔɔrɛ yilinyiliŋɔ la. 8Tontɔɔdoma la nɔɔrɛ maam mɛ la yele dena wa. Sɛba n ka tare tuure en zabere la sɛba n ka zote Yenɛ. 9Ge tontɔɔdoma la kelom gin' ba sore la la kaŋkaŋe, te sɛba nu'uhen en ka tare dɛngerɔ la malom nyɛta paŋa saŋa woo. 10Ge yamam wa, ya zan'an lebena, ge mam pon kan nyɛ yamdaana ya poan, 11Mam dabeha tole ya, mam potɛn'ya ba'ahɛ ya, mam suunre n bote sɛla woo ba'ahɛ ya. 12Ba dekɛ la yu'uŋɔ lebege wontɛɛŋa, te la han ta nyɔnlena, ba yeti la yelegere mɛ. 13Mam eere la yɔɔ te ko dɛna n yire, keŋɛ ta yeregɛ n soŋɔ ke'enteŋa, 14Mam yele yɔɔ yeti hom n de mam sɔ, ge yele teŋa zunzunya yeti yamam n de mam ma, bii mam tanpa, 15n potɛn'ɛrɛ bɛɛ ha? Ane n wan nyɛ mam me potɛn'ɛrɛ wa? 16N wan sige yɔɔ poan? Mam mɛŋa, la mam tɛn'ɛhe sɛla woo wa yeti to lebege la tentɔnɔ wa?

will be added

X\