Yob 16

1Te Yob lerege yeti, 2Mam wom yele ana taaba zo'e mɛ, Yamam zan'an malom tara la sunkpɛnlega kɛn'ɛha mam. 3Yetɔgɔyooro mea ka ba'ahere? Bii bene n daane ya te ya kelom tɔgɔra wa? 4La han tee ane ne la yamam wo lan ane mam se'em wa, mam me ta'an tɔgɔre ne wo yamam n tɔgɔre se'em wa. N mi' ne mam wan degehɛ yɛla naɛ taaba se'em tɔgɛ bahɛ ya zuo mɛ, ge lɔbera n zuo ya nɛŋan. 5Mam wan ton dekɛ ne n nɔɔrɛ wa maalɛ ya, n nɔgbama wa wan bogelɛ ne ya iŋtoo wa. 6N han tɔgɔra, n iŋtoo wa ka bahere. N han sina ko yeti ko keŋɛ la bɛ? 7La de sera, te Yenɛ nya ba'ahɛ mam mɛ en bala, a yeregɛ mam zɔdoma woo bahɛ. 8A bahɛ te mam ku'e mɛ, te la dɛna seradaana bo mam Mam baanlom la zan'an, la ka sogɛ. 9Yenɛ dekɛ la a sunsunyiim yaɛ mam, ge toonhɛ mam zɔnra zɔnra. A obere la a nyɛna la mam, mam dima la nini en mɔ'ɛ la mam. 10Nɛreba kɛhere mam mɛ la'ara, lɔbera mam pɛgehe te la dɛna toorɛ, naɛ taaba zabera la mam. 11Yenɛ n dekɛ mam eŋɛ sɛba n ka zote Yenɛ nu'uhen, ge dekɛ mam eŋɛ be'emdoma nu'uhen. 12Mam boe ne la fai, te a kɔ' mam yema yema, a gin' la mam nyugela, zan'an mam ture, kɔ'ɔ mam buuri buuri. A dekɛ mam lebege la a pɛɛma daka tia. 13A so'ahe en kae mam mum, te a larigɛ mam paɛ mam sɛyiga, ka'ɛ pooren lɔgɔrɔ bahɛ teŋa na, te ninbɔn'ɔn ka tara en. 14Daarɛ woo, a sunsunyiim sigere mam zuo la bala, te a digera mam wo pɛɛntɛɛnra la, 15Mam pɛ la sunsagaŋɔ fuo pin' n iŋa, te mam paŋa bahɛ yoo. 16Mam kaahɛ mɛ te mam nɛŋa fuuhom, te kum bɔna mam ninin. 17La mam nu'uhen en ka tare dɛngerɔ te n sohoga woo dɛna tontɔɔ la zan'an. 18Teŋparɛ wa, da di n ziim, da bahɛ te mam kaahega wa nyɛ gan'aregɔ zen'an. 19La mam n pon zɛ'a nananawa, mam seradaana boe la saazuo, se'em n tɔgɔre bɔ'ɔra mam boe la zuin ha. 20Mam zɔdoma kɛhere mam mɛ, te mam nini ka'ara la nintam Yenɛ nɛŋan, 21Sore han bone te nɛresaala wan ta'an ne tɔgɛ la Yenɛ, wo nɛra n nyɛ yele la a tadaana te ba tɔgɔra se'em la. 22Yuuma fiin han pa'ahɛ, mam wan doohe la sɔrɔɔ seko en ka lebere na la zuo keŋɛ.

will be added

X\