Yob 15

1Te Teman teŋa boraa Elipaz la lerege yeti, 2Yamdaana wan lɛregera yɛla ge ka tɛn'ɛha, bii a perɛ a mɛŋa la yam en ane wo sabeeo? 3Yamdaana wan ŋmɛ'ɛra nɔkpe'ene la yetɔgɔyooro, bii a tɔgɔra yele se'a n kan soŋɛ en? 4Ge hom ka bote ho zɔ Yenɛ, bii ho tɛn'ɛhɛ baanlam la Yenɛ, 5Ho ganlom la ho tɔgɔre la bala. Ho loe la ponpɔrɔma zɛleŋa. 6Ho mɛŋa nɔɔrɛ n sagom hɔ ge dagɛ mam. Ho mɛŋa nɔɔrɛ en tuluge ho. 7Hom n de saaleba woo bikeema bii? Hom keem zɔya wa mɛ? 8Ho kelehe Yenɛ kan'ama? Hom tɛn'ɛhe hom ma'an n sɔe yam? 9Hom mi' la bem te tomam ka mina? Hom bɔkerɛ dela la denɛ te tomam ka tara? 10Zu peelodoma, sɛba n korogɛ gon'oha, boe tomam zen'an mɛ, Ba gane ho sɔ mɛ. 11Yenɛ n bogole ho suunre se'em la pɔ'ɛ bo hom mɛ, bii tomam n tɔgɔre se'em baanlam la ho wa dela zaŋa bo hom? 12Bene te ho bahɛ te ho suunre ihegera bala? Bene te ho bahɛ nini mɔ'ɛ bala? 13Te ho sea zabera la Yenɛ, ge bahɛ te yele ana zɛ'ɛta ho nɔɔrɛ poan na? 14Saaleba dela bene kan tara tuure? Ba dɔgɛ nɛra la wane te a wan dɛna tontɔɔ? 15Yenɛ pon ka nam a soŋoreba la n boe la en saazuo ha la. Saazuo ha dagɛ fa'a a nɛŋan 16bii hom se'em n de be'em lɔkɔ, perɛ la piŋa, nyuura ganleŋɔ perɛ ho mɛ wo ko'om n perɛ nɛra puurɛ se'em la. 17Hom yeen kɛleha mam te n pa'alɛ ho. Mam nyɛ sɛla te mam yɛta ho wa. 18Yamdoma n tɔgɛ sɛla yehe la ba yaabdoma pa'alegɔ poan na, te ba sogɛ. 19Bama n de sɛba te ba pɔhɛ dekɛ teŋa wa bo ba te saana ka gɛnregɛ ba. 20Potɔya boe too poan a vom dabeha zan'an, te nɛre wuruba yuuma zan'an dela namehegɔ ma'an. 21Dabeem yɛla ma'an te a toba wona. A na'am saŋa, te potɔya la ne wa'ana sagom ba. 22A boe la a lika mea poan. A ba'ahegɔ dela so'a. 23A tuuni mɛ ɛɛra dia, sɔkera yeti, Dia boe la bɛ? A mi' te lika dabaherɛ la paɛ ba. 24Sunsagaŋɔ la too n tare a dabeem. Yele ana wa digere en mɛ wo naba n yehe pɛɛntɛɛnrɛ la 25a zabere la Yenɛ la zuo ge a zaberɛ la Gaŋɛ Zan'an Yenɛ la zuo 26kaanbɛ suunre zabera la en la zaba tɛ'ɛlega la zuo! 27En yaga kanregɛ yula, te a seehe ɔgɔlom la zan'an, 28a kɛn'ɛra daboto teŋhe poan yikeenha poan, daboto te nɛreba ka kɛn'ɛra to poan. 29A kan malom tara, a tarega kan yuura a nu'uhen, bii a ba' nyɛga teŋa wa zuo. 30A kan malom peɛn lika, bugum wan di a yila. Yenɛ nɔɔrɛ sabeeo wan pebele en bahɛ. 31Da bahɛ te a dɛla sabeeo, pan'aha a mɛŋa. Zaŋa n ta dɛna a yɔɔrɛ. 32A wan to'e de me'en ge te de saŋa la nya paɛ. A yile ka boe wan malom puhe voen. 33A wan miim a wɔla la kanha bahɛ wo tiihe wɔla la, ge suuɛ a puuro bahɛ wo kaam tia la. 34Se'ere n sɔe la, sɛba n ka zote Yenɛ lagaŋɔ ka tare biile, te bugum dita sɛba n to'ohere mu'ure bo'olom yiya. 35Ba nyɔkɛ la ponpɔrɔŋɔ puurɛ, dɔgɛ be'em, te ba sunya me kɔ'ɔn maahom la ponpɔrɔŋɔ ma'an.

will be added

X\