1 Bahɛ, mam nini nyɛ yele ana zan'an mɛ, mam toba wom mɛ, ge bɔkɛ. 2 Hom mi' sɛla la, mam me mi' a mɛ, ya ka gane mam. 3 Ge mam wan tɔgɛ bo la Gaŋɛ Zan'an Yenɛ wa, mam la enŋa wan tɔgɛ mɛ n yele wa poan. 4 Han dɛna yamam, ya dela ponpɔrɔŋdoma. Ya dela tebeyoodoma. 5 Ya han sini ne, bala n de ya de yamdoma. 6 Kelehe ya n nyɔyɔm se'em, ge kelehe ya n nɔɔrɛ fabelegɔ wa. 7 Yamam wan parona bɔ'ɔra Yenɛ? Yamam wan pan'aha bɔ'ɔra Yenɛ? 8 Yamam wan ta'an eŋɛ som bo Yenɛ? Bii ya zabɛ bo en? 9 Yenɛ han yeti, a ɛ ya sunya wa poan la wan ana ya soŋa? Bii ya wan ta'an pan'ahɛ Yenɛ wo nɛreba n pan'ahe taaba se'em la? 10 Ya han yeti, Ya tom som bo en, a wan tanhɛ ya. 11 A kpe'eŋo la kan tara ya dabeem? A sunsunyiim sige ya zuo na? 12 Ya yam la dela magaha yooro, sɛla te ya tara gu'ura ya mɛŋa la dela yɔyɔrɔ. 13 Ane ya baanlam, ge te n tɔgɔra te sɛla n wan wa'ana la wa'ana, 14 Bene zuo te mam wan ponhera n nyɔrɛ? Bene zuo te n wan zanla n vom n nu'uhen? 15 Behɛ, a yeti a ko mam mɛ, ma ka le tara potɛn'ɛrɛ. Ge mam wan tɔgɛ gu' n mɛŋa la bala ta paɛ a nɛŋan. 16 Sɛla n wan ana mam soŋa dela, be'emdoma da paɛ en. 17 Yenɛ, kɛleha n tɔgom wa soŋa, Bahɛ te mam yeti se'em wa kɛn' ho toban. 18 Mam maahom yele wa mɛ. Mam mi' te n wan nyɛ vo'ohogo, 19 Ane n boe wan pagera la mam? La han wan dɛna bala, mam wan ana baanlam ta ki? 20 Yenɛ, bo mam yɛla ayi' ma'an, te n da sogora n mɛŋa ho zan'an. 21 Pakɛ ho kpa'aherɛ la n zuo, ge da bahɛ te ho sunsunyiim la bo mam dabeem. 22 Ge nya yi', ge n wan sakɛ. Bii ho bahɛ te n tɔgɛ, te ho lerege mam. 23 N tuure, la n be'em kanle dela wane? Bahɛ te n baŋɛ n tuure, la n be'em. 24 Bene te ho bahɛ mam, ge dekɛ mam lebege ho dima? 25 Hom n wan vuunha mɔɔ te sabeeo kanra yɛ'a, bii ho digera sɔgɔrɔ? 26 Hom golehɛ la mam yeletooro biŋe, ge bahɛ te mam kɛ'ɛra n bonbilomen be'em yɔɔrɛ. 27 Hom ba' mam na'ma la dɔɔ poan, ge beha mam dole sɔrɔɔ seko woo zuo, ge kaanlɛ mam na'ma n nɛɛre se'em. 28 Mam beregere mɛ wo sɛla n pɔn'ɛn la, ana wo fuo te mɔka mɔgɔra la.
