Yob 1

1Boraa n wa bɔna Uz teŋa, te ka yu'urɛ yi'ira Yob. Boraa wa ka tare gbelegere ka vom poan, ge dɛna nɛre tontɔɔ, dɛna se'em n zote Yenɛ, ge yɛhera a mɛŋa sɛla n de be'em poan. 2Te a tara dayɔɔhe seyopɔe la pɔyɔɔhe setan', 3ge tara piihe tuha ayopɔe la yogoma tuha atan' la lɔlɔkɔɔrehe loa kɔbehe senuu la bonhe kɔbehe senuu, la yamehe zo'e zo'e, dɛna dakanrɛ gana nɛresɛba woo n kɛn'ɛre la en dapɔya bɔba la. 4Te Yob dayɔɔhe la kena taaba yiya eta de'eŋɔ, ge ne tom yi' ba tanpa ba tan' la te ba wa'ana te ba lagom nyu' ge di la taaba. 5Ba de'eŋɔ dabeha la ne han ta tole, Yob ne tom yi' ba mɛ na, te a pee ba. A ne wan ihege bolika yu'uŋyu'uŋɔ kaanbɛ nyɔ'an bo'olom kaanbegɔ, a kɔma la kanlɛ n de se'em la. Yob ne yeti, N ka mi' daanse'ere n kɔma wa tom be'em, zɛrɛgɛ Yenɛ ba sunya poan. Saŋa woo Yob en ete se'em n bala. 6Daarɛ deyema te Yenɛ dayɔɔhe lagahɛ te ba dekɛ ba mɛhe pa'alɛ Na'ayenɛ. Te Dima lagom wa'an bini na. 7Te Na'ayenɛ yele Dima yeti, Hom ze'ele la bɛ na? Te Dima lerege en yeti, Mam boe ne la teŋparɛ zuo ha ɛɛra ka zuo. 8Te Na'ayenɛ yele en yeti, Ho baŋɛ mam yameŋa Yob la? Nɛra ka boe teŋparɛ la zuo ana wo enŋa. A dela nɛra n ka tare gbelegere a vom poan, ge dɛna nɛre tontɔɔ, dɛna se'em n zote Yenɛ, ge yɛhera a mɛŋa sɛla n de be'em poan. 9Te Dima lerege Na'ayenɛ yeti, Yob zote hom la yoo? 10Hom ka mɛ la dangoone kae enŋa la a yire la zan'an, la sɛla woo te a tara la? Ho kan' bahɛ a nu'o tooma woo poan mɛ, te a lɔgɔrɔ wi'ira teŋa la poan. 11Ge ho han foe ho nu'o a lɔgɔrɔ la poan nananawa, a wan zɛrɛgɛ ho kan ge ho zen'an. 12Te Na'ayenɛ yeti, Behɛ, a sɛla woo boe la ho nu'uhen, ge da kalom a vom. Te Dima ze'ele Na'ayenɛ nɛŋan keŋɛ. 13Daarɛ deyema te Yob dayɔɔhe, la a pɔyɔɔhe la tara ba de'eŋɔ a dayɔkeema la yire, nya dita ge nyuura. 14Te nɛra ayema wa'ana yele Yob yeti, Lɔlehe la kɔɔre ne mɛ, te bonhe la me bɔna bilam bɔba ɔbera, 15te Sebadoma bibige na kɔrom ho yamehe la, ge pe'e dunhe la zan'an keŋɛ. Mam ma'an n peɛn wa'ana te n yele ho wa. 16Enŋa n boe bini tɔgɔra la, te ayema me n bala kɛn' na yeti, Bugum n ze'ele Yenɛ zen'an lu na, di piihe la la ho yamehe la zan'an ko. Mam ma'an n peɛn wa'ana te n yele ho wa. 17Enŋa n boe bini tɔgɔra la te ayema me n bala kɛn' na yeti, Kaldeadoma n maahom ba mɛŋa tansuga atan' bibige na, kɔrom ho yamehe la, ge pe'e yogoma la keŋɛ. Mam ma'an n peɛn wa'ana te n yele ho wa. 18Enŋa n boe bini tɔgɔra la te ayema me n bala kɛn' na yeti, Ho dayɔɔhe la, la ho pɔyɔɔhe la boe ne la ho dayɔkeema la yire, dita ge nyuura, 19te saabeeokeŋɔ ze'ele teŋpɔgɔtia wa bɔba vuke na, luri yire la zan'an, te de lu din' kɔma wa zan'an te ba ki. Mam ma'an en peɛn wa'ana te n yele ho wa. 20Te Yob ihege, aanhom a futo seto te a yɛ la, siie a zuo, wa'ana zin'ire pɔnrɛ na'ma na'ahɛ. 21A yeti, Mam ze'ele n ma pooren yehe la beele na, n wan lebe la beele mea. Na'ayenɛ n bo, Na'ayenɛ n le to'e. Na'ayenɛ yu'urɛ dela som ma'an. 22Yele ana wa woo poan la, Yob ka tom be'em, bii a nyɔna, Yenɛ te a tom enŋa la be'em.

will be added

X\