Yeremia 8

1Na'ayenɛ yeti, Saŋkaŋa poan, ba wan be'ehe yɔɔrɔ, vaɛ Yuda teŋa nadoma la kpɛ'ɛndoma la malemadoma la nɔtɔgɔheba la Yerusalem teŋa nɛreba konba yehe na. 2Ba wan lobe ba bahɛ te ba gan'an wontɛɛŋai la ŋmarega la ŋmarebibihe la woo n boe saŋgbanɛ wa zuo te ba daa nɔŋɛ ge tona bɔ'ɔra ge dɔla ge po'ohera. Nɛra ka boe wan kan'ahɛ konba la, bii lebehe pin'. Ba wan gan'an teŋa zuo wo sɔgɔrɔ la. 3Kum wan nyana vom, bo yamam potɔpa buuri wa, ya sɛba fiin n wan yee bɔna teŋa wa zuo zen'sɛka woo la. Pɛɛntɛɛnreba Na'ayenɛ yele se'em n bala. 4Yele nɛreba wa yeti, Na'ayenɛ yeti, nɛreba han ne lu, ba ne ka ihege? Nɛreba han ne ta tue, ba ne ka lebe na? 5Ge bene n sɔe te nɛrebana wa kɔ'ɔn kena ha? Bene n sɔe te Yerusalemdoma wa kɔ'ɔn bita poore saŋa woo wa? Ba gin' la pan'ahegɔ kaŋkaŋe. Ba zagahɛ te ba kan lebena. 6Mam yu'ɛ la n toba kɛleha ba, ge ba ka yeti sɛla n de ma'an. Nɛra ka boe ba poan tɛɛra a pototooma la poan, bii pon sɔkera a mɛŋa yeti, n ton eta la bene wa? Nɛra woo boe la a sore zuo yɛ'a wo yeho n aanre kɛn'ɛra zaberɛ poan se'em la. 7Tankɔne n ɛngere saazuo mi' a saŋa mɛ. Te dayene la laaleŋa la alili n ɛngere saazuo mi' saŋsɛka te ba wan ɛnkɛ lebe mɛ. Ge mam nɛreba wa ka mi' mam Na'ayenɛ malema la. 8Yamam wan ta'an yele ya mɛhe yeti, to dela yamdoma, te Na'ayenɛ pa'alegɔ la bɔna to poan, ge mina te ye pa'ale ba la tuluge yelemɛŋɛrɛ la mɛ, te de lebege ponpɔrɔŋɔ. 9Nyanɛ wan kɛn' yamdoma la, ba wan bɛnrɛ nyɔkɛ ba tare keŋɛ. Se'ere n sɔe la, bama n zagahɛ Na'ayenɛ yelehom la, bene yam te ba wan tara? 10Bala zuo, n wan degehɛ ba pɔgɔba bo borase'ehe, ge degehɛ ba vatɔ bo nɛreba sɛba n wan zabɛ nyaŋɛ ba. Pɔhɛ bonbila ba poan, ta paara bonkotɛ, ba zan'an nini mɔ'ɛ mɛ la fan' bon bɔrɛ. Nɔtɔgɔheba, la malemadoma la dela boyena, ba zan'an zamehe la pan'ahegɔ. 11Ba tebere mam nɛreba la nɔra la bama mɛŋa n bote se'em. Ba yeti, sunma'ahom, sunma'ahom, ge te sunma'ahom ka malom bɔna. 12Ba tone nyanɛ tooma, ganlom ba mɛŋa la dɛngerɔ tooma. Ge la bala zan'an, vi, ka tare ba la fiin wa me. Ba nini ka mɔ'ɛ mɛ, te ba yehe ba vi tooma la poan. Bala zuo, ba me wan ki la sɛba n wan ki la, saŋsɛka te n ta nameha ba la, ba wan lu. Na'ayenɛ yele se'em n bala. 13Na'ayenɛ yeti, Mam han ne yeti n go'ohe ba, n ka nyɛte sɛla tia la zuo, bii kenkama bɔna kenkaŋa zuo, se vɔntɔ la suɛ mɛ. Sɛla te mam pon dekɛ bo ba la n wan to'e ba nu'uhen. 14Bene n sɔe te to zin'an wana baanlam wa? Bahɛ te to lagahɛ taaba zɔ loŋe teŋkanra wa poan ha, la to ta ki bilam ha. Se'ere n sɔe la, Na'ayenɛ to Yenɛ la dekɛ to tuunle la sagaŋɔ, a bo to la yabega te to nyu', to be'em la zuo. 15Tomam tɛn'ɛhere la sunma'ahom yele, ge te ka nyɛ som la fiin me. Tomam gure la to kelehe, ge paleŋ'ɛnka yɛla ma'an te to nyɛta. 16Tomam wone dima la yiri n fɔɔnhere Dan teŋa baha na, te ba yiri kanra mea sin'iŋɔ, bahɛ te teŋa la zan'an miina la dabeem. Ba wa'ana te ba vagɛ la teŋa la, la ka sɛla woo, ba sagom ka teŋkantɛ la, la sɛla woo n boe ka poan. 17Behɛ ya, n tom la diŋdoma ya zen'an, zaŋkanhe se'ehe te ya kan nyaŋɛ ko se, te se kɛ' ya. Na'ayenɛ yele se'em n bala. 18Mam lebe yeti, Mam nyeema tole ya, ninbɔn'ɔn ma'an te mam dita, te mam suunre fɔlɔgera. 19Kelehe n nɛreba wa n de taromdoma wa kaahega wa, te ba bɔna teŋse'ehe n zaan, ge kɛla bɔ'ɔra ho na wa. Na'ayenɛ ka boe a Zion poan? A Naba ka le bɔna? Na'ayenɛ yeti, Bene n sɔe te ba tara baga, teŋhe sese'ehe baga, nyiiha mam suunre? 20Buŋa saŋa tole ya, te sazɔɔhɔga me ba'ahɛ, ge tomam ka nyɛ faanrɛ. 21Mam nɛreba wa n pogoleŋɔ la, dela mam pogoleŋɔ n bala. Mam kele mɛ, ge te dabeem gin' mam. 22Tiim ka boe Gilead teŋai? Tebera ka boe bini? Bene n sɔe te mam nɛreba wa nɔra la ka bɛn'ɛn?

will be added

X\