Yeremia 6

1Benyamin teŋadoma wa, zɔ ya fan' ya mɛhe bahɛ. Zɔya yehe Yerusalem teŋa wa poan. Peebe tentanɛ la Tekoa teŋa poan, ge zɛnkɛ ya zaberɛ danlehom la Bet Hakerem teŋai. Se'ere n sɔe la, sagaŋɔ kantɛ n ze'ele zuɔ nu'o bɔba teŋhe la poan kena na. 2N wan sagom Zion. Zion ane soŋa wo mɔpɔlɔgɔ n puhure bon'en la. 3Duŋkeema wan wa'ana zabɛ la hɔ. Ba wan wa'ana tin' ba sogora kae hɔ. Bahɛ te ba dunhe la obe ho yaama la n boe ho poan la zan'an. 4Maahom ya zabɛ la en. Ihege ya te to keŋɛ ya wontɛɛŋa ta zabɛ la en. Wontɛɛŋa pon luto mɛ n bala. Lika gee la paarɛ wa. 5To keŋɛ yu'uŋɔ ta zabɛ la en, sagom a yaama la zan'an. 6Pɛɛntɛɛnreba Na'ayenɛ la yeti, Kɔ'ɔn ŋma ya a tiihe la. Tin' dɔtɔ kae a dangoone la. Doohe zom sige teŋa la poan. Teŋkana dela ka nyɛ namehegɔ. Muguhego ma'an n perɛ ka poan. 7Wo loa n bule ko'somɔ se'em baha na la, bala mea te Yerusalem teŋa wa bula be'em. Gbirigere, la sagaŋɔ ma'an n boe ka poan damena. A bahɛ te ban'ahe, la pogoleŋɔ ma'an n gan'an mam nɛŋan saŋa woo. 8Yerusalem, wona kan'ama, han dagana bala, n wan ŋmɛregɛ la sunsunyiim, ge bahɛ hɔ te ho lebege daboo, te nɛre beeliho kan kɛn'ɛra ho poan. 9Pɛɛntɛɛnreba Na'ayenɛ la yeti, Dima la wan doohe tagehɛ Israel buuri la, wo nɛra n dole tageha tan'ahe la. 10N lebehe tii, Ane te n wan tɔgɛ bo, bii kan'an, te a daana wom? Ane n wan kelehe mam? Ba toba la le' mɛ, te ba kan ta'an wom sɛla. Ba kɛhere Na'ayenɛ yelehom la mɛ. Ba ka tare popeelom la Na'ayenɛ yelehom la. 11Mam perɛ mɛ la Na'ayenɛ sunsunyiim. Mam taregɛ mɛ, la n tara bɔ n puuren ha. Na'ayenɛ yeti, Ka'ɛ bɔ bahɛ kɔma n boe teŋa la poan la zuo, ge ka'ɛ bo bahɛ bonbilipaalehe n lagene zen'an woo, la ka sereba la pɔgɔba la bonkoroba woo zuo. 12Bahɛ te nɛreba sɛba sɔe ba yiya la ba vatɔ la ba pɔgɔba sɔna. Mam yeti n zabɛ mɛ la teŋkana wa nɛreba wa. Na'ayenɛ yele se'em n bala. 13Pɔhɛ ba bonbila, ta paara ba bonkotɛ, ba zan'an nini mɔ'ɛ mɛ la piŋa bonborɛ, ze'ele nɔtɔgɔha, ta paara malemadaana, ba zan'an zamehɛ la pan'ahegɔ. 14Ba tebere mam nɛreba la nɔra la bama mɛŋa n bote se'em. Ba yɛta tii, sunma'ahom, sunma'ahom, ge te sunma'ahom ka malom bɔna. 15Ba tone la nyanɛ tooma, tona dɛngerɔ tooma, ge te vi ka tare ba la fiin me. Bala zuo, ba wan lagom ki la sɛba n kiiri la. N han ta yeti n namehɛ ba, ba wan lu ki gan'an. Na'ayenɛ yele se'em n bala. 16Na'ayenɛ yele a nɛreba yeti, Ze'ele ya sɔrɔɔ puuŋa poan behɛ, soke ya ya sɔyaabdoma sɔya la yele, soke ya sɔrɔɔ soŋɔ la n gan' zen'an, la ya kena koŋɔ poan, ge koŋɔ poan te ya seehe wan nyɛ vo'ohogo bo ya mɛhe. Te ya zagahɛ ge yeti, tomam kan kena sɔrɔɔ koŋɔ poan. 17Te n le bo ya guruba yeti, Kelehe ya, ge nana ya tentanɛ la n peebere la. Ge ya zagahɛ te yamam kan kɛleha, bii ya nana tentanɛ la n peebere se'ere zuo la. 18Bala zuo, teŋhe wa, wom ya, nɛreba wa, mini ya sɛla n wan eŋɛ nɛrebana wa. 19Teŋa wa, wom te n tare la sagaŋɔ yɛ'a ba zuo na, ba etegɔ la wɔla n bala. Se'ere n sɔe la, ba ka kelehe mam yelehom la, ge me zagahɛ mam pa'alegɔ la te mam pa'alɛ ba la. 20Sheba teŋa ko'ɛnka la, te ya tara kena na bɔ'ɔra mam, la dela bene bo mam? Bii yan tare dia se'a n zan'anhom zɛ'ɛta sateŋhe kena na bɔ'ɔra mam la dela bene bo mam? Mam ka to'ore ya nyɔ'an bo'olom la te ya bɔ'ɔra mam la. Ya kaanbegɔ la ka tare mam konrehe. 21Na'ayenɛ yeti, Behɛ, n dekere la taŋa biŋera nɛreba wa nɛŋan, taŋsɛka te ba wan nɛɛra sɛrena luta. Sɔdoma la kɔma la sɔɔnrɔ la zɔdoma wan nɛɛra taŋa wa zuo sɛrom lu bɔregɛ. 22Na'ayenɛ yeti, Behɛ, pɛɛntɛɛnreba n bala ze'ele zuɔ nu'o bɔba teŋhe kena na la. Teŋkpe'eŋɔ n maahom ka mɛŋa gbirige kena na la. 23Ba yɛ la ba logoro, zanla ba tiini, la ba kana. Ba dela nɛreba te ba puurɛ tɔna, te ba ka tara nɛra giinle. Ba kene na te la damena mɛ wo ko'kantɛ n ŋmɛ'ɛre la. Ba yage la yiri n ane wo pɛɛntɛɛnra la zuto, yɛ'a na te ba zabɛ la hom Zion wa. 24Tomam n wom ba yele la, tomam giinla n kɔ'ɔhɛ, te to nu'uhe wa ki yula tɛlema. Ɛnregɔ n kɛn' tomam, te la wona tomam wo pɔka n virige te la wona ka se'em la. 25Se'em da yehe keŋɛ va'amen, bii ho ɛɛra sore zuo. Se'ere n sɔe la, dima la tare la so'a, te zen'an woo nya kɔ'ɔn perɛ la dabeem. 26N nɛreba wa, yɛ ya sunsagaŋɔ futo, gan'anrɛ teŋa bilom. Kaahe ya tagurehe wo nɛra dayɔba'arɛ n ki'. Se'ere n sɔe la, la kan yuue, te sagona la sige ya zuo na. 27Mam eŋɛ hom Yeremia te ho dɛna la se'em n wan magaha, ge yelehɛ n nɛreba wa behɛ, wo sanlema te ba ne yelehɛ se'em la. 28Mam lebe yeti, Ba zan'an sunkanbadoma, dɛna pobiregadoma, dɔla sagona nɛreba yu'ura. Ba zan'an dela nyɔgom, la kuto. Ba zan'an pini mɛ. 29Bugum wan ta'an yehe dɛngerɔ sanlema poan bahɛ, ge mam nɛreba wa be'em wa kan ta'an yehe ba poan. 30Ba dela sanlenpeelega te nɛra ka bɔta. Se'ere n sɔe la, Na'ayenɛ mɛŋa n zagahɛ ba la zuo.

will be added

X\