Yeremia 52

1Zedekia ta paɛ la yuuma pihiyi' la deyema, ge di na'am, behɛ Yerusalem teŋa, yuuma pia, la deyena. A ma yu'urɛ dela Hamutal, dɛna Yeremia, se'em n de Libna teŋa nɛra la, pɔyɔa. 2Zedekia yuun tone la toonbe'ero Na'ayenɛ nɛŋan, wo Yehoiakim la, 3Yerusalem, la Yuda teŋa ba' nyiihe Na'ayenɛ suunre mɛ, la ba toonbe'ero seto te ba naɛ taaba tona la, te Na'ayenɛ bo sore, te dima wa'ana sa'ɛ ba ba teŋhe la poan bahɛ. Te Zedekia ka nana Kaldea naba. 4Bala, a na'am dia yuuma awae' poan, ŋmarehe pia, dabeha pia poan, te Kaldea Naba Nebukadnezar, ihege la a pɛɛntɛɛnreba, wa'ana gum Yerusalem teŋa, tin' dɔtɔ kae ka dangoone la, gbi'ira dɛ. 5Ba gan' gura teŋa wa la bala, ta paɛ Zedekia na'am dia yuuma pia, la deyena poan. 6Ŋmarehe senaahe poan, ka dabeha awae' daarɛ, te kom nya ba' sige Yerusalem teŋa wa poan gaŋɛ, te dia ka bɔna bo teŋa la poan nɛreba. 7Te ba nya tin' dɔtɔ te pɛɛntɛɛnreba la doohe bilam ban' dangoone la, yehe na, doohe koleŋa sɛka n boe dangɔɔma ayi' la poan la, lɛm la naba va'am la, zɔ yehe yu'uŋɔ. Kaldea teŋa pɛɛntɛɛnreba wa daa kae Yerusalem teŋa wa mum mɛ, gan'an gura ka, ge te ka poan pɛɛntɛɛnreba wa le'ehɛ yehe na, dekɛ ba nɛhe tɔ mɔen sore la ha yehe zɔ. 8Te Kaldea teŋa pɛɛntɛɛnreba wa, digera naba Zedekia, ta nyɔkɛ en Yeriko teŋa bɔn'ɔren la, te a pɛɛntɛɛnreba la zan'an zɔ yerom ge bahɛ en. 9Te ba nyɔkɛ naba Zedekia bilam, tare en na bo Kaldea naba, Aribla teŋa la n boe Hamat teŋa poan la, te naba la gankɛ en. 10Te Kaldea naba wa, ze'ele naba Zedekia nɛŋa, kɔrom Zedekia dayɔɔhe, ge kɔrom Yuda, la Aribla teŋhe kpɛ'ɛndoma la woo. 11Ge kpegɛ naba Zedekia ya nini, ge nya ba' en, tare en lebe Kaldea poan, ta pagɛ en, te a ta ki bini. 12Kaldea Naba Nebukadnezar na'am dia yuuma pia la awae' ŋmarehe senuu, dabeha pia daarɛ, te Nebuzaradan, se'em n de pɛɛntɛɛnreba la nɛŋadaana la, kɛn' Yerusalem teŋa poan na. 13A kɛn' na nyɔ' Na'ayenɛ Yenɛ yire la, la naba yire woo la yire woo la yikantɛ woo n boe Yerusalem teŋa poan. 14Te pɛɛntɛɛnreba sɛba woo n boe la ba nɛŋadaana wa la, gbi' Yerusalem teŋa dangoone la n kae teŋa la mum la bahɛ. 15Te Nebuzaradan wa, nya nyɔkɛ nɛresɛba woo n daa yee teŋa la poan la, la nahadoma la, la taromdoma sɛba n daa dekɛ ba mɛhe eŋɛ Kaldea naba nu'uhen la, la sɛba n mi' golega la zan'an, tare ba lebe Kaldea poan. 16Ge a bahɛ teŋa la nahadoma la basɛba, te ba yee teŋa la poan, tona tiihe se'ehe n wone wala la, ge dɛna kaareba teŋa la poan. 17Te ban kɛn' Na'ayenɛ Yenɛ yire la poan, ba dekɛ nyɔgom zɛnya la ze'elehe la nyɔgom laa se'em te ba yi'ira Ko'kantɛ la n ze' bini la, wɔnrɛ ba bura bura, nya vaɛ ba tare lebe Kaldea poan. 18Ba me lagom vaɛ dogorɔ la vaahe la kuto seto n tare tona bugum poan la tanhe laahe la bɛ'ɛhe la lɔgɔseto woo te ba dekɛ nyɔgom maalɛ tara tona Yenɛ yire poan tooma la. 19Ge te nɛŋadaana wa, kelom bahɛ te ba vaɛ laahe bibihe la lahe se'ehe n tare dogora la tanhe laahe la dogorɔ la butolela ze'elehe la bɛ'ɛhe la laditihe la laahe se'ehe n tare tona daam tooma. Ba dekɛ sɛla woo te ba dekɛ sanlema la sanlenpeelega maalɛ se la. 20Ge han dɛna zɛnya la a yi la laa se'em te ba yi'ira ka te Ko'kantɛ la lɔlehe pia la seyi' la te laa la suga ba zuo la ze'elehe te Naba Solomon daa dekɛ nyɔgom n zo'e, ge tebegɛ maalɛ la ze'ele Na'ayenɛ Yenɛ yire la poan la woo, tare keŋɛ. 21Han dɛna zɛnya la bama ayena ayena woko dela santira pia la a nii, te ba ko'olom me dɛna santira pia la ayi', te ba maalɛ ba te ba ko'olom, te nyɔgom la te ba dekɛ maalɛ ba la takenɛ wan zona la nu'dibihe senaahe n ta, taaba. 22Zɛnya ayi' wa woo tare la lihe, te se saazuo woko dɛna santira anuu, te ba dekɛ golɛ *pomegranate wɔla eŋɛ lihe mea zuo, ge golɛ bala mea eŋɛ kayema la me liŋa la zuo. 23Ba golɛ *pomegranate wɔla pihiwae' la bayoobe eŋɛ liŋa woo zuo, nyɔgom sebo te ba dekɛ golɛ *pomegranate wɔla la eŋɛ lihe la zuo la tebehom dela kɔbega. 24Te zaba nɛŋadaana wa, dekɛ Seraiah, se'em n de malema nɛŋadaana la, la Zepania, se'em n tage a poore la, la sɛba ba tan' n ne zɛ'a gura Yenɛ yire la nɔɔrɛn la, lagom keŋɛ. 25Ge lagom dekɛ zaba nɛŋadaana ayema, la kan'aneba bayopɔe n daa kelom bɔna teŋa la poan saŋkaŋa la, zaba nɛŋadaana la gɔŋgoloha se'em n daa kan'ahere nɛreba la teŋa la poan la, la teŋa la nɛreba sɛba n daa kelom bɔna teŋa la poan saŋkaŋa la, ba nɛre pihiyoobe, tare keŋɛ. 26Te Nebuzaradan wa, tare nɛrebana wa woo wa'an Kaldea naba la zen'an Aribla teŋa poan na, 27te Kaldea naba wa, bahɛ te ba kɛ' ba zan'an Aribla teŋa wa n boe Hamat teŋa poan wa ko'. Ba pɛnregɛ Yuda teŋa wa se'em loŋe teŋa n bala. 28Naba na'am dia yuuma ayopɔe la, Nebukadnezar pɛnregɛ Yuda teŋa nɛreba loŋe a teŋa la poan. Ba kanlɛ dela nɛre tuha atan', la nɛre pihiyi', la batan'. 29Nebukadnezar na'am yuuma pia la anii poan, nɛre kɔbehe senii, la nɛre pihitan' la bayi', te a pɛnregɛ ba Yerusalem teŋa, loŋe a teŋa la poan. 30Te a na'am dia yuuma pihiyi' la atan' poan, te a zaba nɛŋadaana, Nebuzaradan mɛ pɛnregɛ Yuda teŋa nɛreba kɔbehe seyopɔe, la nɛre pihinaahe la banuu tare loŋe Kaldea poan, te ba zan'an lagom taaba dɛna nɛre tuha anaahe, la kɔbehe seyoobe. 31Ban pɛnregɛ Yuda teŋa keŋɛ Kaldea poan la, a bɔŋa bilam yuuma pihitan', la ayopɔe poan, ŋmarehe pia, la seyi' poan dabeha pihiyi', la anuu daarɛ, te Kaldea naba te ka yu'urɛ dɛna Evil Merodak, zɔ naba Yehoiakin ninbɔn'ɔn, ge yehe en paka deo la poan bahɛ na, 32eta en soŋa, ge zɛnkɛ enŋa gana nadoma sɛba woo n lagom bɔna la n Kaldea la poan la. 33Ge yɛɛhɛ Yehoiakin paka deo lɔgɔrɔ la bahɛ, ge bo en sore, te a kena zin'ita la en dita, gura a kum. 34Te Kaldea naba wa, bo nɔɔrɛ, pa'alɛ dia n wan zona se'em te ba bɔ'ɔra Yehoiakin daarɛ woo, gura a kum.

will be added

X\