Yeremia 51

1Na'ayenɛ yeti, N wan gbirige sabeeo tuule Kaldea, la Leb Kamai teŋadoma wa na, te ko sagom ba. 2N wan tom saama Kaldea na, te ba wa'ana yeele en wo ki' la. Kaldea daaŋɔ dabeha la, daanse'ere te n wan bahɛ te nɛreba gum en kae la, ba wan sagom a sɛla woo, ge gee n voore ze'ele. 3Da bahɛ te pɛɛntɛɛnra la kɔ'ɔn ba' a tanhɔ la bala, ge yɛ' a zaba lɔgɔrɔ la. Da bahɛ ya a bodibinpaalehe la peɛn. Sagom ya a pɛɛntɛɛnreba la zan'an. 4Kaldea pɛɛntɛɛnreba la wan ki, te basɛba pɔgɔlom gan'an Kaldea teŋa sɔya zuto. 5Israel la Yudadoma Yenɛ la n de Pɛɛntɛɛnreba Na'ayenɛ la, ka bahɛ ba, la ba teŋa la n pon ganlom Israeldoma Fa'adaana la nɛŋan. 6Zɔ ya yehe Kaldea wa poan, fan' ya mɛhe bahɛ. Da bahɛ ya te be'em sagom ya. Se'ere zuo, Na'ayenɛ leregere saŋa n wana, te a lebehe yɔɔra Kaldea wa, kan tom sɛla la. 7Kaldea wa daa dela sanlema wanɛ, bɔna Na'ayenɛ nu'uhen. Teŋa la bahɛ te teŋparɛ buge. Teŋhe nyuura ka daam. Se'ere n sɔe la ba lebege zɔlɔ. 8Te Babilon wan lu wɔnro. Kele ya bo en. Tare ya kaam na ma' a nɔtɛ la, daanse'ere de wan bɛn'ɛn. 9Tomam zegɛ te to tebɛ Kaldea wa mɛ koŋe. Bahɛ en, te a sagom, te to zan'an yeregɛ lebe to teŋhe. A be'em la zo'e mɛ, paɛ saazuo ha te gankerɛ nya yɛ'a a zuo na wa, 10Na'ayenɛ n nya bo tomam, to vo'ohogo wa. Wa'an ya na, te to keŋɛ Zion, la to ta mɔɔlɛ Na'ayenɛ n tom se'em la. 11Paarom ya pɛɛma. Perɛ ya logoro. Na'ayenɛ n gbirige Media teŋa nadoma la suunre, te a dekɛ bama sagom Kaldea wa. Na'ayenɛ leregere la n bala, te a lɛregera Kaldea a Yire la zuo. 12Tin' ya kura Babilon dangoone wa poan. Gure ya kaŋkaŋe. Degehɛ ya nɛreba ze'ele ze'ele te ba gura. Se'ere n sɔe la, Na'ayenɛ pon maahom, ge tom enŋa n pon yeti sɛla wan eŋɛ Kaldea nɛreba wa la mɛ. 13Hom se'em ne bɔna ko'kanra nɔɔrɛn fai, panrɛ la, ho sagaŋɔ saŋa la paɛ ya. Ba ŋmaɛ ho vom mi'an la bahɛ. 14Na'ayenɛ pɔ' la a mɛŋa yeti, N wan bahɛ te pɛɛntɛɛnreba perɛ ho teŋa wa wo sim la. Ba wan sakɛ nyaŋerɛ sakerɛ ho poan. 15Na'ayenɛ n dekɛ a mea paŋa, maalɛ teŋa wa. A dekɛ a yam ze'ele teŋa wa, ge dekɛ a bɔkerɛ yeregɛ saŋgbanɛ wa. 16A han ne tɔgɛ, ko'om n ne gbirige saazuo ha. A bahɛ te saa saŋgbana yula teŋa wa zen'an woo. Enŋa n bahɛ te saa tara bugum nyagera, ge yu'ɛ sabeeo a baanrɛ poan bahɛ na. 17Nɛresaala woo gerege mɛ, ka tara yam. Nyanɛ wan di sɛba n tare sanlema maala baga. Se'ere n sɔe la, ba baga la ka tare sera, te vo'ohom ka bɔna ba poan. 18Ba dela yoo, pan'ahegɔ tooma n de ba. Namehegɔ saŋa han ta paɛ na, bama woo wan mɛlom. 19Na'ayenɛ se'ere n de Yakob Tɔntɛ la, ka ane wo baga wa. Enŋa n maalɛ sɛla woo, ge loe Israel buuri la te ba dɛna a nɛreba. A yu'urɛ dela Pɛɛntɛɛnreba Na'ayenɛ. 20Hom n de mam zaberɛ doore, dɛna mam zaberɛ lɔkɔ. Hom te mam dekɛ wɔnrɛ teŋhe sagom sɔ'ɔlom doma. 21Hom te mam dekɛ wɔnrɛ yiri la i ban'areba, ge wɔnrɛ zaba toroto la sɛba n tukure to la. 22Hom te mam dekɛ wɔnrɛ boraa la pɔka, ge wɔnrɛ boraa yan'aŋa la bonbilipaalega, ge wɔnrɛ bodibila la pɔgɔsɔɔ. 23Hom te mam dekɛ wɔnrɛ duŋkeema la ba piihe, ge wɔnrɛ kaareba la ba lɔlehe. Hom te mam dekɛ wɔnrɛ teŋa teŋbehegadoma la ba kpɛ'ɛndoma. 24Na'ayenɛ yeti, N wan lerege Kaldea la Kaldea teŋadoma wa ya ninin, la ban tom Zion be'em sebo la. 25Na'ayenɛ yeti, Mam zaberɛ mɛ la hom zoore se'ere n sagone teŋa wa la. N wan zɛnkɛ n mea nu'o zabɛ la hɔ n ze'ele saazuo la ha zan'ɛn hɔ bahɛ teŋa na. Ho wan lebege zoore se'ere te bugum di sagom de sɛla woo. 26Kugure kan bɔna ho poan ana soŋa wan dɛna ɛnberɛ kugure, bii sɛnka poan kugure. Ho wan dɛna la tampogerɛ gan'an. Na'ayenɛ yele se'em n bala. 27Maahom teŋa wa nɛreba te ba zabɛ! Doohe teŋhe la poan peebe zaberɛ tentanɛ la, te ba zabɛ la Kaldea wa. Lagahɛ nɛreba la na te ba zabɛ la a sɔ'ɔlom teŋhe Ararat la Mini la Askenaz. Loe pɛɛntɛɛnra nɛŋadaana bahɛ se poan. Bahɛ te ba yiri bibige ba wo sim la. 28Maahom teŋhe te se zabɛ la en: Media teŋa nabiihe la ba teŋbehegadoma la kpɛ'ɛndoma woo la teŋsɛka woo te ba behera. 29Teŋa la miine mɛ. Se'ere n sɔe la, Na'ayenɛ maahene mɛ, te a zabɛ la Kaldea wa, la a sagom ka te ka gan'an voore, te nɛra ka bɔna ka poan. 30Kaldea pɛɛntɛɛnreba n bala zagahɛ zabega la. Ba yee la ba soka zen'enhe la ha baanlam. Ba paŋa la ka paɛ. Ba lebege la pɔgɔhe. Teŋa la yiya n bala taɛ bugum dita, ge ba nayahe ka nayahe kuto la kɔ' ya. 31Ba nyɔnte la taaba zɔta kena Kaldea naba zen'an, te ba yele en te, dima la nyaŋɛ teŋa la zen'an woo mɛ. 32Ba nyaŋɛ fan' ko'om nɔgbɛma la woo te ɔɔnrɔnɔ bɔna la mɛ, ge nyɔ' ko'om nɔgbɛma bɔn'ɔrɔ la la bugum, te pɛɛntɛɛnreba la nya pabegɛ la dabeem. 33Pɛɛntɛɛnreba Na'ayenɛ la n de Israel Yenɛ la yeti, Kaldea wa ane mɛ wo dia towa zen'an la n maahom gan'an la, la kan yue la a dia kɛ'a saŋa n paɛ. 34Kaldea Naba Nebukadnezar n obe mam, enŋa n wɔnregɛ mam, enŋa n bahɛ te mam zɛ'a voore wa, a ya'ɛ la a nɔɔrɛ wo bon nyogela la, vole mam, a obe la mam perɛ a poorɛ, nya ogɛ en ka bote n zen'se'ehe la bahɛ. 35Ba lerege Kaldea wa, la kaŋa n aanhom mam la zuo, Zion buuri la wan yeti, ba lerege Kaldea buuri wa, la ban ka'ahɛ mam ziim la zuo. Yerusalem teŋa n wan ya yele se'em n bala. 36Bala zuo la, Na'ayenɛ yeti, N wan po'e hɔ ho yele wa poan, n wan lerege bo ho. N wan bahɛ te ko'kantɛ wa ku'e, te la bahɛ te Kaldea kolehe woo ku'e. 37Kaldea wan lebege tampogerɛ, ge dɛna sanhe bɔŋa zen'an, ka wan lebege dabeem, la sen'ehegɔ lɔkɔ, te ka nɛreba kan bɔna ka poan. 38Babilon nɛreba wan wuulena wo gbegenbibihe la. 39Ba sunsunya han ta nyie dita wo bugum la, n wan nya tare ba namehɛ la wo daam la na, bahɛ te ba nyu' ta buge, ginhe kan ihege le yɛ'ɛha. Na'ayenɛ yele se'em n bala. 40N wan pe'e ba wo piihe, la boohe n de ba, te en pɛ'ɛra yɛ'a dunhe koa zen'an na, te ba ko ba la. 41Behɛ ban nyaŋɛ Sesak wa n pa'ale ka mea gana teŋhe wa woo la se'em. Behɛ Babilon wa n lebege dabeem lɔkɔ bo teŋhe wa woo se'em 42Ko'kantɛ n ihege zabera la Babilon wa, te ko'mi'inhe pin' ka. 43Teŋkanra se'ehe n daa ne bɔna Babilon wa poan la, nya lebege la daboo, dɛna teŋhe n ku'e gan'an, lebege pɔgɔtia zen'an, te nɛnɛra ka bɔna se poan, bii nɛresaala dɔla se poan tɔla. 44N wan namehɛ Bel bagarɛ la n boe Babilon poan la, pɛnregɛ ka, te ka ogɛ kaŋa n vole sɛba la woo bahɛ na. Teŋhe kan le zɔta kena ka poan na, Babilon dangɔɔma la lu ya. 45N nɛreba wa, yehe ya ka poan na, la ya fan' ya vom bahɛ Na'ayenɛ sunsunyiim la poan. 46Da bahɛ ya te ya sunya daana, bii ya paleŋa ɛngera, la dameŋa seko n damene teŋa la poan la, yuunɛ poan, dameŋa koyema n dam, le tagela yuunɛ, te dameŋa koyema me le damɛ. Teŋa gbirigere, la nadoma n zaberɛ la taaba, n boe teŋa la poan. 47Dabeha la seren kene na, te n wan namehɛ Kaldea baga wa, n wan bahɛ te nyanɛ di Kaldea wa, ba wan kɔrom ka nɛreba biŋe ka poan. 48Te saazuo ha, la teŋa wa, la sɛla woo n boe ba poan, wan nyeena la popeelom, Kaldea wa n lu la zuo. Dima la, wan maahom a mea ze'ele zuɔ nu'o bɔba wa ha, yehe na zabɛ la Kaldea wa. Na'ayenɛ yele se'em n bala. 49Kaldea wan seren lu', la kaŋa n kɔrom Israel teŋa, la teŋa wa zuo nɛreba la zuo. 50Yamam sɛba n peɛn so'a bɔna teŋse'ehe n zaan wa, tɛnreya ya Na'ayenɛ la teŋse'ehe te ya bɔna se poan la, ge tɛnra Yerusalem teŋa yele. 51Nyanɛ n tare tomam, tomam wom ban toore tɔ se'em, nyanɛ ma'an n pin' tomam. Se'ere n sɔe la, saama n kɛn' Na'ayenɛ fa'a teŋa la poan na. 52Na'ayenɛ yeti, Saŋa la kene na, te n wan doohe teŋa la woo poan namehɛ baga la n boe ka poan la. Sɛba n pɔgɔlom la wan unha. 53Kaldea han pon bɔta ka zɛnkɛ ka mɛŋa zom saazuo, ka han pon bɔta ka malom kpemehe ka mɛŋa kpe'em la se'em me, n bahɛ te dima ze'ele n zen'an na, sagom en. Na'ayenɛ yele se'em n bala. 54Kelehe ya kaahega n bala sigera Kaldea poan la. Sagaŋɔ kantɛ n sige Kaldea teŋa poan. 55Na'ayenɛ maahom mɛ te a sagom Kaldea wa, ge bahɛ te ka nɔɔrɛ ma'ɛn suram. 56Dima la kinkima n bala damena wo ko'mi'inhe la, ba sagaŋɔ lɔgɔrɔ la n bala damena na la. Dima n zaberɛ la hom Kaldea wa. Ba nyaŋɛ Babilon pɛɛntɛɛnreba la mɛ, kɔ' ba tiini la bahɛ. Se'ere n sɔe la, Na'ayenɛ n de leregere Yenɛ. 57N wan bahɛ te ka pɛɛntɛɛnreba la ka nɛresɛba n kan'ane en la ka teŋbehegadoma la ka kpɛ'ɛndoma la ka pɛɛntɛɛnreba zan'an buge. Ban wan gan'arɛ ginhe kan le ihege. Naba sɛka yu'urɛ n de Pɛɛntɛɛnreba Na'ayenɛ yele se'em n bala. 58Pɛɛntɛɛnreba Na'ayenɛ la n yele se'em n wana, Kaldea dangoone kantɛ la n mɛ kaa ka mum la, wan lu saalom saalom. Te ka nayahe wɔgɔrɔ la, taɛ bugum di. Ka nɛreba la namehe ba mɛhe la yore, teŋhe la namehere se mɛhe bɔ'ɔra la bugum. 59Saŋsɛka poan te ba daa le vaɛ sɛba n daa yee la, la Yuda teŋa naba Zedekia tare keŋɛ Kaldea poan la, naba Zedekia wa na'am gɔŋɔ zuo yuuma anaahe poan n bala, te nɔtɔgɔha Yeremia pa'alɛ Maseiah dayɔa Neria me dayɔa, Seraiah, yelese'a n wana. Seraiah toonɛ dela, a ɛɛra gan'aregɔ zen'an bɔ'ɔra sɛba te ba tara lɔŋera teŋa la. 60Te Yeremia golehɛ sagaŋɔ seko woo n wan wa'an Kaldea poan na la, yelese'a n de Kaldea yɛla la, eŋɛ ganɛ poan. 61Yeremia yele Seraiah yeti, Ho han ta paɛ Kaldea poan, ho kaanlɛ yele ana wa zan'an. 62Ho yeti, Na'ayenɛ, hom mɛŋa n tɔgɛ yeti, ba wan ŋmaɛ zen'kana wa bahɛ, te nɛresaala, bii duŋa kan bɔna ka poan, ka wan gan'an voore saŋa woo. 63Ho han ta kaanlɛ dɛ ba'ahɛ, ho dekɛ kugure lo' ta' ganɛ la, lobe dɛ bahɛ Euprates Kolaa la poan. 64Ge la ho yeti, sagaŋɔ la han ta wa'an Kaldea wa zuo na, ka wan muhe la wana, kan malom le pukɛ na. Teŋhe la namehere se mɛhe bɔ'ɔra la bugum wa. Yeremia n tɔgɛ yelese'a n bala.

will be added

X\