Yeremia 5

1Doohe Yerusalem teŋa sɔrɔtɔ la zan'an kae, kae ka zen'an woo behɛ, ɛ ka sengehe woo poan behɛ. Ho han nyɛ nɛrepeeleho te a dɛna birikina, ete sɛla n nare, ge bɔta yelemɛŋɛrɛ, n wan di suguru bo Yerusalem teŋa wa, nɛre enŋa daana la ma'an zuo. 2La ban ne pon pɔ' yeti, N pɔ' Na'ayenɛ se'ere n sure beha wa la, ba pɔa la woo ne dɛna la ponpɔrɔŋɔ. 3Na'ayenɛ, hom nini ka eere la sera ma'an? Ho ŋmɛ nɛreba wa mɛ, ge ba ka wom too la. Ho muguhe ba mɛ, ge ba ka sakɛ ba tee. Ba malom bobe ba nɛhe mɛ kaŋkaŋe, ka bɔta teere. 4Te mam tɛn'ɛhɛ yeti, Bana n de taromdoma la, ba gerege mɛ. Se'ere n sɔe la, ba ka mi' Na'ayenɛ sore la, bii Yenɛ ze'elego la. 5Bala n wan keŋɛ dakanpa wa zen'an, ta tɔgɛ bo bama. Bama wan ba'ahom mina ba Na'ayenɛ la sore la, la ba Yenɛ ze'elego la. Ge ba zan'an dela boyena, ba ba zan'an kɔ yɔgɔhɔga la te mam dekɛ yɔgɛ ba la mɛ, ba zooe beene se'ere te mam dekɛ beŋe ba la mɛ. 6Bala zuo, gbegenɛ wan ze'ele mɔen na aanhom ba, sanheŋa wan ze'ele mɔen na sagom ba. Gbegenbaa n gan' ba teŋa la pigira ba. Se'em woo n yehe ba poan na, wan aanhom zɔnra zɔnra. Se'ere n sɔe la, ba ganleŋɔ la ba' gaŋɛ mɛ. Ba pobirega la gaŋɛ mɛ. 7Na'ayenɛ lebehe yeti, Bene zuo te mam wan di suguru bo ya? Ya kɔma zagahɛ mam mɛ, ge tare la yena n dagɛ Yenɛ la pɔta. Mam n bo ba sɛla woo te ba bɔta la, te ba kelom yaala ge bibigera yalomdoma yiya poan. 8Ya kanrege me saalom saalom wo yiri n dite tegera la, nya tara koŋkoma'ahom la taaba pɔgɔba. 9N ka tare sore te n namehe ya yele ana wa zuo? N ka tare sore te n lebehe yɔ teŋsɛka n tone toon ana taaba mɛ yoi? Na'ayenɛ yele se'em n bala. 10Dima wa, doohe a tiihe va'am wa lɔɔhe wa poan, kɛn' ta sagom, ge da kɔ'ɔn sagom en zan'an zan'an. Aanhom tiihe yila la bahɛ. Ba dagɛ Na'ayenɛ denɛ. 11Israel la Yuda yiredoma wa ka tare sake, sera la mam, la fiin wa mɛ. Na'ayenɛ yele se'em n bala. 12Ba parom mɛ bo Na'ayenɛ, ge a yeti, a kan eŋɛ to se'ere. Be'em kan sige to zuo na. So'a kan kɔrom tɔ, bii kom ko tɔ. 13Mam nɔtɔgɔheba la dela sabeeo, Na'ayenɛ yelehom la ka boe ba poan. Lan wan eŋɛ ba se'em n bala. 14Bala zuo, Pɛɛntɛɛnreba Na'ayenɛ la yeti ya, Nɛrebana wa n yele wana wa zuo, n wan dekere n yelehom la eta la hom Yeremia nɔɔrɛn, te bo dɛna bugum, te nɛrebana wa wan dɛna dɔɔrɔ, te mam yetɔgom la n boe ho nɔɔrɛn la, dɛna bugum di ba. 15Israel yiredoma wa, n yeti n maahom la sateŋa kayema, te ka wa'ana zabɛ la ya. Na'ayenɛ yele se'em n bala. Ka dela teŋa n zɛnkɛ. Ka dela teŋsɛka, ka dela teŋa n kpe'em te la ka tan'na eta, teŋsɛka yetɔgom te ya ka wona, bii bɔkera. 16Ba logoro kɔ'ɔn dɛna la yabega ma'an, te ba pɛɛntɛɛnreba la zan'an tare kpe'eŋo. 17Ba wan wa'ana fan' ya samana zuo di, la ya dia woo n boe. Ba wan fan' ya dayɔɔhe, la ya pɔyɔɔhe. Ba wan fan' ya nii, ya piihe, ya tiihe dia, la ya kenkama tiihe zan'an. Ba wan dekɛ so'a sagom teŋkanra la la te ya dekɛ ya mɛhe delom se la. 18Ge Na'ayenɛ yeti, Dabeha aŋa mea poan la, n kɔ'ɔn kan sagom ya zan'an zan'an. 19La han ta eŋɛ wana, te ho nɛreba la nya sɔkera yeti, bene zuo te Na'ayenɛ to Yenɛ wa, bahɛ te yele dena wa sige to zuo na wa? Ho lebehe yele ba te yamam n zagahɛ mam, tona bɔ'ɔra baga ya teŋa wa poan la. Bala mea te ya wan loŋɛ teŋsɛka n dagɛ ya teŋa, ta tona bɔ'ɔra nɛresɛba te ya ka mina. 20Yele bala bo Yakob yiredoma la, mɔɔlɛ dɛ bala Yuda teŋa poan. 21Wom ya yele dena wa soŋa, geto n kɔ'ɔn gerege ka tara bɔkerɛ wa, ya tare nini, ge i ka nyɛta, tara toba, te a ka wona. 22Na'ayenɛ yeti, Ya ka zɔta mam? Ya ka gbe'era la dabeem mam nɛŋan? Baŋɛ ya te mam n de se'em n biŋe tentɔnɔ la, te to dɛna beene bo ko'kantɛ la, beene la kɔ'ɔn gan'an la bala, te ko'mi'inhe ŋmɛ'ɛra, ge kan malom yakɛ dɛ le. Ko'mi'inhe ta'an ŋmɛ'ɛra na, ge bo kan malom ta'an yakɛ, ba ta'an dame na, ge ba kan malom yakɛ beene la. 23Ge nɛrebana wa tare la pobirega sunkanberɛ, ba bire la ba pɔya bahɛ mam, ge tuuna yɛ'ɛha ba mɛhe n bote zen'an. 24Ba ka malom kan'ana ba mɛhe ba sunya poan yeti, Bahɛ ya te to zɔta Na'ayenɛ to Yenɛ la, bɔ'ɔra to saa ka nia saŋa la, ge bɔ'ɔra tɔ sigisaahe, la salurugo la, ge bɔ'ɔra tɔ saŋa te to nyaŋera buna to dia la. 25Ya tuure la gu' yelesoma ana wa bahɛ mɛ. Ya be'em la gu' ya mɛ te ya kan nyɛ som. 26Potɔpa boe mam nɛreba wa poan mɛ, faanra nɛreba lɔgɔrɔ. Ba bɛnte la bɛntɔ wo mɔ kɛn'ɛra n bɛnte niiŋa la, nyɔgera nɛresaaleba. 27Wo niiŋa deo n perɛ la niihe se'em la, bala te pan'ahegɔ perɛ mam nɛreba wa yiya poan, Ba nyaŋɛ pan'ahɛ nɛreba mɛ, lebege kpɛ'ɛndoma, dɛna bontateba. 28Ba kanregɛ mɛ saalom. Ba kɔ'ɔn ka tare ba bahɛ be'em sore la. Ba ka gankere keebega la narehom, te la soŋɛ en. Ba ka bo'ore nahadoma boorɔ gankerɛ poan. 29N da namehe ba dena wa zuo? N da tare sagaŋɔ wa'an teŋa n ane wana zuo na? Na'ayenɛ yele se'em n bala. 30Toonfɛn'ɛherɛ n tare paleŋ'ɛnka n tom teŋa kana wa poan. 31Mam nɔtɔgɔheba la pote la ponpɔrɔŋɔ yɛla ma'an. Te malemadoma la me dɔla nɔtɔgɔheba la n yeti se'em la, te mam nɛreba la me poorɛ pee la bala. Ge ba'ahegɔ daarɛ la, ya yeti ya ta eŋɛ?

will be added

X\