Yeremia 46

1Na'ayenɛ tɔgɛ teŋhe yele bo Yeremia se'em n wana. 2Mizraim teŋa naba Faro Neko pɛɛntɛɛnreba la, n wan ta tiihom Euprates Kolaa la zen'an, Karkemis teŋa, te Kaldea naba Nebukadnezar wa'ana zabɛ nyaŋɛ ba, se'em ma'an te Yosia dayɔa Yehoiakim dɛna Yuda teŋa naba, a yuuma anaahe poan la. 3Zaberɛ saŋa paɛ ya, maahom ho zaba tɛ'ɛlega, la ho yehe zaberɛ na. 4Lo' ho yiri, la ho maahom ho kana, vuge ho zuowanɛ, ge yɛ ho zaba lɔgɔrɔ, la ho yehe ze'ele. 5Mam behɛ ya te dabeem n tare ba, ba zɔ mɛ, ba ŋmɛ'ɛre ba pɛɛntɛɛnreba la mɛ, te ba zɔ mɛlom. Ba zɔ mɛ pon ka ŋmɛregɛ poore, Dabeem ma'an n kɛn' ba. 6Sɛba n tan' koreha la ka ta'an peɛn, bii se'em n mi' zaberɛ, zabɛ to'e a mɛŋa. Ba nyaŋɛ ba la pɛɛm bɔn'ɔn la n boe Euprates Kolaa la zuɔ nu'o bɔba la. 7Ane n de ena peta wo Nile Kolaa wa? Peta wo mɔga ko'om n perɛ gaŋɛ wa? 8Mizraim teŋa n bala peta wo Nile Kolaa la, perɛ gaŋɛ wo mɔgɔrɛ n perɛ gaŋɛ la. Nya yeti, Bahɛ te n uue teŋhe wa ha, la n sagom teŋhe, la se nɛreba. 9Bahɛ te ho yiri ɛnkɛ gɛnregɛ ba ha! Sɛba n tukure yiri toroto, keŋɛ soŋa soŋa! Pɛɛntɛɛnreba la, zabera tɔla na, Kus la Put pɛɛntɛɛnreba n zanla ba zaba tɛ'ɛlehe, Lud boraahe n maahom ba tiini la ba pɛɛma. 10Daanden daarɛ wa dela To Daana Pɛɛntɛɛnreba Na'ayenɛ la dene, lerege dabaherɛ, daanse'ere te a wan lerege a diŋdoma. So'a wa kɔrom tegɛ de daarɛ mɛ, ge nyu' ba ziim la tegɛ de daarɛ. To Daana Pɛɛntɛɛnreba Na'ayenɛ la, yeti a kaanbɛ la a kaanbegɔ Euprates Kolaa zuɔ nu'o bɔba la poan ha. 11Mizraim teŋa pɔyɔa wa, ho han pon bɔta ho keŋɛ Gilead teŋa ta da' tiim, ge la dela yoo, tiim ka boe, wan tebɛ hɔ. 12Teŋhe la woo wom ho nyanɛ yele la mɛ. Ho kɛlega wa paɛ teŋa wa zen'an woo mɛ. Se'ere n sɔe la, kansaŋka n to'ohɛ kansaŋka te ba zan'an lagom lu'. 13Te Na'ayenɛ tɔgɛ Kaldea Naba Nebukadnezar n wan wa'ana zabɛ la Mizraim teŋa la yele bo nɔtɔgɔha Yeremia yeti, 14Ze'ele Mizraim teŋa poan, mɔɔlɛ te la paɛ Migdol, Mempis, la Tapanhes teŋhe la n boe Mizraim teŋa poan la, yeti, maahom ya yehe na ze'ele, so'a la wan kɔrom sɛba woo n kae ya bahɛ teŋasoka la, 15Bene n sɔe te ba nyaŋɛ ya pɛɛntɛɛnreba? Bene n sɔe te ya paŋadaana la ka ze'ele? Na'ayenɛ n damɛ en bahɛ teŋa. 16N wan bahɛ nɛreba zo'e zo'e pɛrɛ taaba, luta taaba zuto te ba yɛta taaba yeti, Ihege ya te to lebe to mɛŋa nɛreba n boe zen'an la, to lebe to mɛŋa teŋa poan. Se'ere n sɔe la, so'a n kɔrɔne tɔ. 17Segɛ Mizraim teŋa naba wa yu'urɛ yeti, A tɔgɛ zo'e zo'e ge kan loe yele. 18Naba se'em yu'urɛ n de Pɛɛntɛɛnreba Na'ayenɛ la yeti, Mam n vɔe wa, sagona la wan wa'ana wo Tabor zowoko la n ganɛ zɔya la zan'an la, ana wo Karmel zoore n boe ko'kantɛ bɔba la. 19Yamam sɛba n boe Mizraim teŋa wa, bobe ya lɔgɔrɔ, la ya nɔgɛ. Se'ere n sɔe la ba wan nyɔ' Mempis teŋa wa, te ka lebege daboo gan'an, te nɛra ka kɛn'ɛra ka poan. 20Mizraim teŋa som mɛ wo nagapole la, te diŋdaana ze'ele zuɔ nu'o bɔba teŋa wa ha, wa'ana damɛ en. 21Pɛɛntɛɛnresɛba n toohe ligiri ge zabera la n boe ya teŋasoka la, kanrɛ mɛ saalom wo nagabibihe la. Bama zan'an ŋmɛregɛ mɛ zɔ, ge ka ze'ele. Ba nɔyalegerɛ dabeha la n sige ba zuo, ba sagaŋɔ dabeha la n paɛ. 22Mizraimdoma la wan zɔ' mɛ wo bonsɛla la, ba diŋdoma la digere ba. Diŋdoma la tare la leehe wo dɔkɛ'ɛreba n ye'ehe tiihe kɛ'a la. 23Ge mam Na'ayenɛ yeti, ba wan kɛ' Mizraim teŋa tiihe n ane wo mɔɔ n kpanrɛ te ko poan ka tana kɛn'ɛra la. Diŋdoma wan zo'e gana sonwa'ara mɛ, ba ka tare kanlɛ. 24Nyanɛ wan di Mizraim teŋa wa. A wan lu' diŋdaana wa n ze'ele zuɔ nu'o bɔba teŋa wa nu'uhen. 25Te Pɛɛntɛɛnreba Na'ayenɛ la n de Israel Yenɛ la, yeti, N yeti n namehɛ Tebes teŋa bagarɛ Amon mɛ, la Faro la Mizraim teŋa la mɛŋa, la ka baga la, la ka nadoma la zan'an mɛ, n wan namehɛ Faro la sɛba woo n dekɛ ba mɛŋa delom en la. 26N wan dekɛ ba eŋɛ Nebukadnezar Kaldea naba, la a kpɛ'ɛndoma wa n pon ɛɛra te ba ko' ba la nu'uhen. Ge pooren, Mizraim teŋa, wan le tara nɛreba wo lan yuun pon ana se'em la. Na'ayenɛ yele se'em n bala. 27Ge han dɛna mam tontona Yakob wa, da zɔta dabeem, mam tontona Israel, da bahɛ te ho suunre sagom, ho han pon zaaɛ la se'em me, n wan fan' ho bahɛ, n wan fan' ho kɔma n de yamehe bɔna teŋse'ehe woo poan bahɛ. Yakob wan ta lebe na, bɔna la popeelom, la sunma'ahom, te nɛra ka bɔna wan vuunhe en te a paleŋa ɛnkɛ. 28Na'ayenɛ yeti, Han dɛna mam tontona Yakob wa, da zɔta dabeem, ge mam boe mɛ la hɔ. Mam han sagom teŋse'ehe woo te mam sa'ɛ hɔ bahɛ se poan la, n kan sagom hɔ zan'an. N wan magahɛ ho tobedɔnlegerɛ wo la nare se'em, ge la ka boe te n kan dɔnlegɛ ho toberɛ.

will be added

X\