Yeremia 43

1Yeremia daa tɔgɛ ba Na'ayenɛ ba Yenɛ n yele en te a yele ba se'em ba'ahɛ la. 2Hosaiah dayɔa Azaria la Karea dayɔa Yohanan la boraa wuruba basɛba nya yele Yeremia yeti, Ho parone mɛ. Na'ayenɛ to Yenɛ la ka tom hɔ te ho yele tomam te to da keŋɛ Mizraim ta kɛn'ɛra. 3Ge Neria dayɔa Baruk n tare hɔ tugula la tomam, te a dekɛ tɔ eŋɛ Kaldeadoma wa nu'uhen te ba ko' tɔ, bii ba nyɔkɛ tɔ keŋɛ Kaldea. 4Bala la, Yohanan, la zaba nɛŋadoma la, la nɛreba la zan'an, ka nam Na'ayenɛ yelehom la n de ba yee bɔna Yuda teŋa poan la. 5Te Yohanan, la zaba nɛŋadoma la, kan'ahɛ Yuda teŋa nɛreba la n gee fiin wa ze'ele ban daa yeregɛ bɔna teŋse'ehe woo poan la kule na te zin'ire la, 6boraahe la pɔgɔhe la kɔma la naba pɔyɔɔhe la nɛra se'em woo te Nebuzaradan, se'em n de Kaldea zaba nɛŋadaana la daa tare na eŋɛ Gedalia nu'uhen la zan'an, ta ta' la nɔtɔgɔha Yeremia la Baruk, Neria dayɔa la. 7Ba ka nam Na'ayenɛ nɔɔrɛ, ge kan'ɛhɛ nɛreba wa yɛ'a Mizraim teŋa poan, wa'ana paɛ Tapanhes teŋa. 8Te Na'ayenɛ tɔgɛ bo Yeremia Tapanhes teŋa poan 9yeti, Dekɛ kugukanra ayi', la ho tun' boko peelom sebo n nɛɛre kɛn'ɛra Naba Faro yire wa Tapanhes teŋa wa poan wa, la ho pin' a boko la poan, bahɛ te Yuda teŋadoma la nyɛta hom n ete bala la, 10ge te ho yele ba yeti, Pɛɛntɛɛnreba Na'ayenɛ la, n de Israel Yenɛ la yeti, N yeti n tare la n tontona Kaldea Naba Nebukadnezar na, te a sɔ'ɔlom wa'ana sɔe kuguse'a te n pin' wa sɔna, tin' a pagahe pin' kuga wa. 11A wan wa'ana damɛ Mizraim teŋa wa, dekɛ sɛba te la pon gan'an te too wan ko' la, bo too. A wan dekɛ sɛba te la pon gan'an te ba nyɔgɛ ba la, bo nyɔkerɛ. A wan dekɛ sɛba te la pon gan'an te so'a wan kɔrom ba la, bo so'a. 12A wan wa'ana kɛn' Mizraim teŋa baga la deto poan, nyɔ' ba, nyɔgɛ ba keŋɛ, a wan pin' a mɛŋa, wo duŋkeena n pin' a mɛŋa la futo se'em la, yehe Mizraim teŋa la, fai. 13A wan wɔnrɛ Heliopolis bagarɛ la n boe Mizraim teŋa poan la, ge wɔnrɛ Mizraim baga zonɔ la, nyɔ' ba la bugum bahɛ.

will be added

X\