Yeremia 40

1Na'ayenɛ n doohe Nebuzaradan poan tɔgɛ se'em bo Yeremia, se'em ma'an te Nebuzaradan, tara Yeremia, te a nu'uhen ba' la banhe, enŋa, la Yuda, la Yerusalem teŋa nɛresɛba te ba nyɔkɛ ba keŋɛ Kaldea la lebe na paɛ Aramah teŋa poan na la, 2te nɛŋadaana Nebuzaradan nya tɔgɛ bo Yeremia yeti, Na'ayenɛ ho Yenɛ la, n damɛ zen'kana wa, la sagaŋɔ kona wa. 3Nananawa, Na'ayenɛ bahɛ te enŋa n daa yele se'em la, wa'ana tom se'ere zuo, ya zan'an daa tone la be'em, ge ka kɛleha Na'ayenɛ nɔɔrɛ, bala n sɔe te yele dena wa sige ya zuo na wa. 4Zina, n ba'ɛ banhe se'ehe te ba dekɛ ba' ho wa bahɛ, ho han bɔta te ho doohe mam lebe Kaldea poan, ho ta'an doohe lebe, mam wan ta behera hɔ, ho han ka le bɔta, ho yee ka'lam. Teŋa la n bala gan'an la, hom behɛ te zen'sɛka ane soŋa bo ho, ho ta'an keŋɛ bilam. 5Ho han yeera, ho ta'an bɔna la Sapan dayɔa Ahikam me dayɔa Gedalia, enŋa te Naba Nebukadnezar loe te a sɔna Yuda teŋhe behera, ho ta'an bɔna la en, la nɛreba la, bii hom bote zen'an, ho kena. Ge pɛɛntɛɛnreba zuodaana nya bo en dia la lɔgɔrɔ ge bahɛ en te a keŋɛ. 6Te Yeremia keŋɛ Ahikam dayɔa Gedalia zen'an, Mizpa teŋa poan, ta bɔna la en, la nɛresɛba woo n yee teŋa la poan la. 7Teŋa wa nɛŋadoma la, la ka pɛɛntɛɛnreba la n ta wom te Kaldea naba loe la Ahikam dayɔa Gedalia te a sɔna teŋa la beha, ge wom te boraahe la pɔgɔhe la kɔma, nɛresɛba woo n de taromdoma ka tara sɛla yee bɔna la teŋa la poan la, 8te ba ihege lebe Mizpa teŋa poan na bɔna Gedalia nu'uhen. Sɛba n lebe na, la ba pɛɛntɛɛnreba dela, Netania dayɔa Ismael, Karea dayɔa Yonatan, Tanhumet dayɔa Seraiah Netopa teŋa boraa, Epai dayɔɔhe la, Yaazania, se'em sɔ n de Maakat teŋa nɛra la. 9Te Gedalia pɔ' bo bama, la ba pɛɛntɛɛnreba la yeti, Da zote ya, la yan n tone bɔ'ɔra Kaldeadoma wa. Bone ya teŋa wa poan, la ya tona bɔ'ɔra Kaldea naba wa, ge bala te sɛla woo wan ana soŋa bɔ'ɔra ya. 10Han dɛna mam, mam boe Mizpa teŋa wa poan la n yamam zuo, n tara ya yele paara Kaldea kpɛ'ɛndoma la n kene ka'lam na la. Ge han dɛna yamam, teŋa la dela ya denɛ, lebehe ya teŋhe poan, ta kɛ' ya dia, la ya daam, la ya kaam, la ya dia zo'e zo'e la. 11Bala mea te Yudadoma sɛba zɔ loŋe Moab, Ammon, Edom, la teŋhe zo'e zo'e poan zaberɛ la saŋa la, n ta wom te Kaldea naba loe la Gedalia, te a beha Yuda teŋa la, ge le wom te nɛresɛba n boe teŋa la poan la, ka zo'e la, 12te ba ze'ele ban boe teŋse'ehe woo poan la, lebe kule Yuda teŋa na, Gedalia nu'uhen, Mizpa teŋa poan, lagom soŋɛ soŋɛ ba tiihe wɔla dia kɛ'a la, n wom gaŋɛ yuun denɛ mea poan la. 13Te Karea dayɔa Yohanan, la sɛba woo n de teŋa la poan zaba nɛŋadoma la, wa'an Gedalia zen'an na, Mizpa teŋa poan na, 14soke en yeti, Ho mi' te Ammon teŋa naba Baalis n tom Netania dayɔa Ismael, te a wa'ana ko hɔ? Te Gedalia ka sakɛ bo ba. 15Te Yohanan a ma'an keŋɛ ta tɔgɛ la Gedalia a ma'an Mizpa teŋa poan yeti, Mam belone ho mɛ, bo mam ma'an sore te n ko' Ismael wa, nɛra kan baŋɛ, han dagana bala, a bote a ko ho mɛ, ge te Yuda teŋa nɛreba wa n yee fiin bɔna la ho wa mɛlom. 16Te Gedalia yele Yohanan yeti, Da tom toonbe'o kona wa taaba, ho parone bɔ'ɔra Ismael wa mɛ.

will be added

X\