Yeremia 4

1Israel han lebe ne na, Israel han ŋmɛregɛ ne lebe n zen'an na, ho han yehe ne ho ganleŋɔ lɔgɔrɔ wa n nɛŋan, ge ze' ne kaŋkaŋe. Na'ayenɛ yele se'em n bala. 2Ya han pɔte ne mam yu'urɛ wa la, yelemɛŋɛrɛ, la narehom, la tontɔɔ vom poan, enŋa zuo te kan'an wan sige ne teŋhe woo zuo, te ba tare enŋa ŋmɛ'ɛra ba nyɔn'ɔn. 3Se'ere n sɔe la, Na'ayenɛ yeti Yuda la Yerusalem teŋhe doma yeti, Kɔ ya ya zen'se'ehe n ku'e gan'an ka kɔɔra la, da tare ya ya bonbora bota gɔn'ɔhe poan. 4Dekɛ ya mɛhe bo Na'ayenɛ, ŋma ya ya sunya la, Yuda, la Yerusalem teŋa nɛreba wa, han dagana bala, n wan ka'ɛ n sunsunyiim la wo bugum la, te bo dita, te nɛra ka bɔna wan kiinhe bo, ya toonbe'ero la zuo. 5Mɔɔlɛ Yuda, la Yerusalem teŋhe poan yeti, Peebe ya tentanɛ kae teŋa la zan'an. Kaahɛ ya tagurega, ge soolom bo nɛra woo yeti, lagahe na te to kɛn' teŋse'ehe te dangɔɔma kae se wa poan. 6Zɛnkɛ ya Zion danlehom la, zɔ ya keŋɛ bilam fan' ya mɛhe bahɛ, da go'om ya. N dekɛ la be'em ze'ele zuɔ nu'o bɔba teŋhe la kene na, sagaŋɔ kantɛ n kene na. 7Gbegenɛ n ze'ele de soka zen'an bɔna, teŋsagana n maahom yehe na. A ze'ele la a bɔŋa zen'an yehe na, te a sagom ya teŋa wa. Ya teŋkanra wa wan lebege daboto, te nɛra ka bɔna se poan. 8Wana n yeti la eŋɛ la zuo, yɛ ya sunsagaŋɔ futo. Fabele ya, ge kɛla. Se'ere n sɔe la Na'ayenɛ la sunsunyiim la, kɔ'ɔn kelom bɔna la to zuo. 9Na'ayenɛ yeti, Daanden daarɛ, naba, la a kpɛ'ɛndoma la giinla wan kɔ'ɔhɛ, te la eŋɛ malemadoma pakerɛ, te nɔtɔgɔheba gbi'ira la dabeem. 10Te mam yeti, To Daana Na'ayenɛ, behɛ nɔtɔgɔheba wa n pan'ahɛ Yerusalem nɛreba wa se'em, yɛta ba te som wan bɔna, ge ka mina te so'a n boe ba konkɔyai. 11Saŋkana poan, ba wan ta yɛta nɛreba wa, la Yerusalem teŋa nɛreba wa yeti, Na'ayenɛ n bahɛ te sabeeo kantɛ tuluga, ze'ele ko pɔgɔtia zɔya wa zuo, vuke bahɛ n nɛreba wa n de taromdoma wa zuo na. Ko ka wa'ana te ko yeele mɛ, bii ko duuhe. 12Ko dela sabeeo seko n kpe'em gana bala. La dela mam n gankere ba. 13Behɛ a kene me na wo saŋgbanɛ la, a zaba yiri toroto la vukure mɛ na wo sabeeo kantɛ la, ge te a zaba yiri la suŋera na wo yebega la. Yele boe tomam zuo, to sagom ba'ahɛ mɛ n bala. 14Yerusalem, pee be'em la n boe ho suunre poan la bahɛ, ge ta'an nyɛ faanrɛ. Daan denɛ te hom wan bahɛ be'em tɛn'ɛhegɔ ho suunre wa poan. 15Konkore n ze'ele Dan teŋa mɔɔla baha na, sagaŋɔ mɔɔlegɔ n ze'ele Epraim zɔya la zuo mɔɔla baha na. 16Yele teŋhe la, te ban wana. Mɔɔlɛ bo Yerusalem teŋa la. Pɛɛntɛɛnreba n ze'ele sateŋa n zaaɛ kena na. Ba tanhere la hom Yuda teŋa wa. Na'ayenɛ yele se'em n bala. 17Ba gum en mɛ kae, wo nɛreba n gure ba va'am la, enŋa n bire pɔya bahɛ mam la zuo, Na'ayenɛ yele se'em n bala. 18Ho mɛŋa sɔrɔtɔ, la ho etegɔ la, n tare yele ana wa wa'an ho zuo na wa. Ho sagaŋɔ n bala, ko me tɔe mɛ. La vɛnkɛ la ho suunre. 19La wune mam mɛ, la wune mam mɛ. N kan ta'an sina. Mam suunre sagom me. Mam wom zaba tentanɛ n peebe, te pɛɛma sakerɛ sakɛ. 20Sagaŋɔ n ba'ahere, teŋa la zan'an gan' la voore. La kan yuue la mam sogorɛ la sagom. Mam soka zen'an la sagom mɛ wana kalam. 21Wane ma'an te zaba dɔya wa wan sige teŋa, te zaba tentana wa go'e peebego? 22Na'ayenɛ lebe yeti, Mam nɛreba wa gerege mɛ, ba ka mi' mam. Ba dela kɔmgɔɔnɔ, ba ka tare bɔkerɛ. Ba nyaŋɛ la be'emtooma toŋa, ge ton ka mina som n ete se'em. 23Mam behɛ teŋa wa te ka sagom mɛ, gan' voore, te mam gorege behɛ saazuo me, te bilam me dɛna lika te nɛɛhom ka'na. 24Te mam behɛ zɔya zuto te bama me miina, te zobibihe la me gbita lɛbera pooren la nɛŋa. 25Te mam behɛ wuu, te nɛre beeliho la ayena me, ka boe teŋa wa zuo, te niihe woo, mɛlom. 26Te mam behɛ, te teŋsoŋa wa, lebege la pɔgɔtia, te teŋkanra la zan'an gbirige lebege daboto gan'an Na'ayenɛ nɛŋan, n eŋɛ sunsunya la zuo. 27Na'ayenɛ la yeti, Teŋa wa wan gan'an voore bala, ge n ka dagɛ ka ba'ahegɔ n bala. 28Wana wa zuo, teŋa wa wan kele, te saazuo me lebege lika gbatire. Mam n tɔgɛ, n me maahom bala n eŋɛ, n kan lebe pooren, bii n bahɛ. 29Yiri dameŋa la pɛɛntɛɛnreba dabeem wan bahɛ te teŋa woo zɔ. Ba wan zɔ kɛn' zen'an n kpanrɛ, te sɛba zɔ zom tahe zuto ta sogɛ, ge bahɛ teŋkanra la. Nɛra nɛra kan kɛn'ɛra se poan. 30Ho teŋsɛka n ka le tara vɔnrɛ wa, ho nonɔm la ka tare vɔnrɛ. Hom n dekɛ sanlema yɛ ho mɛŋa wa dela bem? Hom n kɔkɛre ho nini, ge kɔkera ho nɔɔrɛ la wan bo ho la bem? Ho nɔne la yoo, ho zabadoma la zagahɛ ho mɛ. Ba eere la ba kum. 31Mam wom la kaahega wo pɔka n virige la kaahega wo pɔka n yeti a dɔgɛ a sare sare la. Zion pɔyɔa vo'oha nyonha mɛ, ge tɛɛn a nu'uhen ɛɛra soŋorɛ, ge kɛla yeti yele boe mam zuo, mam ki mɛ. Ba koora mam.

will be added

X\