Yeremia 38

1Te Matan dayɔa Sepatia, la Pasur dayɔa Gedalia, Selemia dayɔa Yehukal, la Malkia dayɔa Pasur, wom Yeremia n yeti nɛreba la yeti, 2Na'ayenɛ yeti, Nɛresɛba n wan yee teŋa wa poan la, so'a wan kɔrom ba, bii kom ko' ba, bii too wa'ana ko' ba. Ge sɛba n wan yehe na dekɛ ba mɛhe eŋɛ Kaldeadoma wa nu'uhen la, bama n wan vɔna. 3Na'ayenɛ yeti, Teŋkana wa wan lu Babilon naba pɛɛntɛɛnreba la nu'uhen, te ba nyaŋɛ ka, to'e ka. 4Te kpɛ'ɛndoma la yele naba la yeti, Boraa kana wa kɔ'ɔn dɛna la ka ki. Se'ere n sɔe la, a yetɔgɔ'ana wa, kɔ'ɔhere la pɛɛntɛɛnreba sɛba n yee teŋa wa poan wa, la teŋa wa nɛreba zan'an. Boraa kana wa ka malom tɔgɔra nɛreba wa som yɛla, a tɔgɔre la ba sagaŋɔ yɛla ma'an. 5Te Naba Zedekia yele ba yeti, Boraa la n wana, ka boe la ya nu'uhen, mam naba wa pon ka tara paŋa la yamam. 6Te ba nyɔkɛ Yeremia lo' a nu'uhe la mi'inhe, ta bahɛ naba la dayɔa Malkia bulega n boe gu'ura la zenzaka poan. Bala ma'an la te ko'om keenhɛ bulega la poan mɛ, ge gee bɛngerɔ ma'an, te Yeremia ferɛ bɛngerɔ la poan. 7Te Ebed Melek, se'em n de Kus teŋa kpɛ'ɛma, ge me bɛna naba la yire la, ta wom te ba tare Yeremia ta bahɛ la bulega poan. Te naba la ta zin'an Benyamin zanɔɔren, 8te Ebed Melek yehe naba la yire na, nya sɔnhɛ bo naba la yeti, 9n daana naba, boraahe sena wa tom la be'em, la ban tare nɔtɔgɔha Yeremia ta lobe bahɛ bulega la poan te a ki kom. Se'ere n sɔe la, dia dia ka le bɔna teŋa wa poan. 10Te naba la bo en nɔɔrɛ yeti, dekɛ boraahe setan' ka'lam, pa'ahɛ a mea poan, te ya keŋɛ ta ve'e Yeremia bulega la poan doe na, te a nan ka ki wa. 11Te Ebed Melek dekɛ boraahe setan' pa'ahɛ a mea poan, te ba kɛn' naba la yire, ta kɛn' lɔgɔrɔ biŋere deo la poan, ɛ nyɛ fuzana, nya degehɛ aŋa ta lo'ta mi'inhe, bo Yeremia bulega la poan ha, 12ge yele Yeremia yeti, Dekɛ fuzana la gabɛ ho bɔgɔrɔ, ta la mi'an la, te a eŋɛ bala. 13Te ba ve'e Yeremia la mi'inhe la bulega la poan doe na, te Yeremia kelom yee bɔna gu'ura la zenzaka la poan. 14Te naba Zedekia tom te ba tare Yeremia na, te a paana, te naba la to'ohɛ en koleŋa sɛka n pa'ahɛ setan' yɛ'a kɛn'ɛra Na'ayenɛ po'ohe deo la poan la na. Nya yele Yeremia yeti, Mam tare la se'ere te n soke ho, da sogɛ mam se'ere. 15Te Yeremia yele en yeti, N han yele ho yelemɛŋɛrɛ la, ho yeti ho ko mam mɛ, n parom mɛ? N me han le kan'an hɔ, ho kan wom. 16Te naba Zedekia pɔ' nɔɔrɛ baanlam la Yeremia yeti, N pɔ' Na'ayenɛ se'ere n bo'ore tomam vom wa yeti, te n kan ko hɔ, bii n dekɛ ho eŋɛ potɔpa sɛba n eere ho kum wa nu'uhen. 17Te Yeremia yeti, Na'ayenɛ la, se'ere n de Paŋa Zan'an Yenɛ la, dɛna Israel Yenɛ la, yeti, Ya han wan dekɛ ya mɛŋa eŋɛ Kaldea naba wa nu'uhen, ya kan ki. Ba me kan nyɔ' teŋa wa la bugum, hom mɛŋa, la ho yire nɛreba zan'an wan vɔna. 18Ge ya han ka sakɛ dekɛ ya mɛŋa eŋɛ Kaldea naba kpɛ'ɛndoma wa nu'uhen, teŋa wa wan lu' Kaldeadoma wa nu'uhen, te ba nyɔ' ka la bugum, te hom mɛŋa kan nyaŋɛ peɛn ba nu'uhen. 19Te naba Zedekia yele Yeremia yeti, Dabeem n tare mam la Yuda teŋadoma sɛba n pon dekɛ ba mɛŋa bo Kaldeadoma wa, mam han dekɛ n me bo ba, ba wan kɛhɛ mam mɛ. 20Te Yeremia yele en yeti, Bala kan bɔna bini. Ton nam Na'ayenɛ nɔɔrɛ la, wo mam n yeti ho se'em wa, ge bala wan ana soŋa bo ho, te ho me kan ki. 21Ge ho hon eŋɛ ho suunre poan te ho kan eŋɛ bala, Na'ayenɛ n pa'alɛ mam sɛla dela, 22a lilige pa'alɛ mam, te mam nyɛ te Yuda naba yire la poan, pɔgɔhe ma'an n yee bini, te ba tara ba yɛra na bɔ'ɔra Kaldea naba kpɛ'ɛndoma wa, ge yɛta te, Hon daa dekɛ ho mea delom zɔdoma sɛba la, n pan'ahɛ hɔ te ho bɔregɛ wa. Hom n nya ferɛ bɛngerɔ poan la, zɔdoma bana wa zɔ mɛ ge bahɛ hɔ. 23Ban wan nyɔkɛ ho pɔgɔba, la ho kɔma, bo Kaldeadoma wa, hom mɛŋa kan peɛn ba nu'uhen, Kaldea naba wan nyɔkɛ hɔ, ge te ba nyɔ' teŋa wa la bugum. 24Te naba Zedekia yele Yeremia yeti, Da bahɛ te nɛra se'em wom sonhe kana wa, ho han eŋɛ bala, ho wan ki. 25Kpɛ'ɛndoma wa han wom te mam tɔgɛ mɛ la hɔ, wa'ana sɔkera hɔ te yele to hom n sɔnhɛ sɛla bo naba la, da sogɛ tɔ, ho han sogɛ tɔ to wan ko hɔ, bii naba la yele ho la bem? 26Ho yele ba yeti, Mam yeen belone la naba la, te a da tare mam lebe Yonatan yire te n ta ki. 27Te kpɛ'ɛndoma la zan'an seren wa'an Yeremia zen'an na, soke en, te a dekɛ naba la n pa'alɛ en te a yele se'em la, yele ba, te ba to'e ka le soke en se'ere. Se'ere n sɔe la, naba la, la Yeremia sɔnhega la te ba sɔnhɛ la ka yehe yeŋa na. 28Te Yeremia yee bɔna gu'ura la zenzaka la poan tara tara la daanse'ere te ba wa'ana zabɛ nyaŋɛ Yerusalem teŋa la, to'e ka la.

will be added

X\