Yeremia 37

1Te Kaldea naba, Nebukadnezar, loe Yosia dayɔa Zedekia te a sɔe Yehoiakim dayɔa Yehoiakin, dɛna Yuda teŋa naba. 2Ge dagɛ naba wa, bii a tontoneba la, bii teŋa la poan nɛreba, kɛleha Na'ayenɛ n dole a nɔtɔgɔha Yeremia poan tɔgɔra yelese'a bɔ'ɔra ba la. 3Te naba Zedekia wa ihege tom Selemia dayɔa Yehukal, Maaseiah dayɔa Zepania la n de kema la, te ba ta yele Yeremia yeti, N belone ho mɛ, po'ohɛ Na'ayenɛ la, n de to Yenɛ la, bo to. 4Saŋkaŋa la, te Yeremia nan eere mɛ, ba nan ka nyɔkɛ en pagɛ. 5Saŋkaŋa mea poan te Mizraim teŋa pɛɛntɛɛnreba n sige na, te Kaldea pɛɛntɛɛnreba la n sogɛ gan'an gura ba sagom Yerusalem teŋa la n ta wom ba yele la, ba zɔ mɛ ge bahɛ teŋa la. 6Te Na'ayenɛ tɔgɛ bo Yeremia yeti, 7Yele se'em n wana, yele nɛreba bayi' la, te Yuda teŋa naba tom ba ho zen'an na te ba soke mam behɛ la yeti, Israel Na'ayenɛ la yeti, ba ta en yeti, Mizraim teŋa naba pɛɛntɛɛnreba la n wa'ana te ba soŋɛ hɔ la wan lebe kule, 8ge te Kaldea teŋa pɛɛntɛɛnreba la, lebena zabɛ la teŋa wa, nyaŋɛ ka, nyɔ' ka la bugum. 9Na'ayenɛ yeti, da dagom pan'aha ya mɛhe te Kaldea pɛɛntɛɛnreba la wan zɔ ge bahɛ tɔ, ba kan keŋɛ zen'an ge bahɛ ya. 10Ya han pon zabɛ nyaŋɛ Kaldea pɛɛntɛɛnreba la n zaberɛ la ya la zan'an, ge te sɛba n yee ba poan la pon pɔgɔlom la se'em me, ba wa wan ba'ahom ihege zabɛ nyaŋɛ teŋa wa, nyɔ' ka la bugum. 11Mizraim teŋa pɛɛntɛɛnreba la n wa'ana te Kaldea teŋa pɛɛntɛɛnreba la zɔ la, 12Yeremia yehe Yerusalem teŋa poan mɛ, keŋɛ Benyamin teŋa poan te a ta to'e a lɔgɔrɔ tɔntɛ, nɛreba la n boe bini la zen'an. 13N ta paɛ Benyamin teŋa nayaŋa poan na la, te Hanania dayɔa Selemia me dayɔa Iriya, se'em n behere nayaŋa la, nyɔkɛ nɔtɔgɔha wa, ge yeti, N nyɔkɛ ho mɛ, la hom n boe Kaldeadoma la zuo la. 14Te Yeremia yeti, La dagɛ sera, mam ka boe Kaldeadoma wa zuo. Te Iriya ka kɛleha en, ge tare en na bo kpɛ'ɛndoma la. 15Te kpɛ'ɛndoma la me suunre nyie la Yeremia, te ba ŋmɛ' Yeremia, ge tare ta pagɛ gɔŋgoloha Yonatan yire, zen'sɛka te ba dekɛ lebege paka yire la. 16Ban pagɛ Yeremia yire la poan se'em na bala, te a bɔna paka deo la poan dabeha kekeko. 17Te naba Zedekia tom te ba ta tara en na, te a paana, te a to'e en soŋa, ge nya soke en baanlam a yire la poan yeti, Na'ayenɛ tare la yele dene? Te Yeremia yeti, Yele boe, ba wan nyɔkɛ hɔ bo Kaldea naba. 18Ge nya soke naba la yeti, Mam tuure dela dene, te n tue hom, bii ho tontoneba wa, bii teŋa wa nɛreba, te ya pagɛ mam wa? 19Ho nɔtɔgɔheba sɛba n daa pote bɔ'ɔra hɔ, te Kaldea naba kan zabɛ la hɔ, bii zabɛ la ho teŋa wa la bɛɛ? 20Nananawa n daana naba, kelehe mam n belone ho yelese'ere wa, la ho tom som, da tare mam lebe gɔŋgoloha Yonatan yire la poan te n ta ki bini. 21Te naba la bo nɔɔrɛ, te ba bahɛ te Yeremia nya Yonatan yire la sɔnhega deo la poan, ge te sɛba n sɛn'ɛrɛ boroboro sore la poan la bɔ'ɔra en boroboro deyena daarɛ woo, tara tara te teŋa la dia ta ba'ahɛ. Te Yeremia yee bɛna gura la sɔnhega deo la poan.

will be added

X\