Yeremia 35

1Saŋsɛka poan te Yosia dayɔa Yehoiakim dɛna Yuda teŋa naba la, te Na'ayenɛ tɔgɛ bo Yeremia yeti. 2Keŋɛ la ho ta yi Arekab buuri wa tare ba na kɛn'ɛhɛ doo koyema poan mam Yenɛ yire wa poan, la ho bo ba daam te ba nyu'. 3Te mam keŋɛ ta yi Yeremia dayɔa Yaazania se'em sɔyaaba n de Habazinia la a sɔɔnrɔ la a dayɔɔhe la zan'an na, Arekabdoma buuri la zan'an n bala. 4Te mam tare ba na kɛn'ɛhe Na'ayenɛ nɛra Igdalia dayɔa Hanan dayɔɔhe la bɔ'en, deo koŋɔ n daa tagalɛ Yenɛ yire kpɛ'ɛndoma deo la, deo koŋɔ yage la Salum dayɔa Maaseiah la n de gura la deo la zuo. 5Te n nya yooɛ daam perɛ la laahe ze'ele ge degehɛ wama ze'ele ba ge yele Arekab buuri wa yeti, Nyu' ya daam la. 6Te ba lebehe yele mam yeti ya, Tomam ka nyuure daam. Se'ere n sɔe la tomam sɔyaaba Arekab dayɔa Yonadab n yuum bo tomam nɔɔrɛ yeti, Tomam bii te yaahe poan, se'em da nyu daam 7te me da mɛ yiya, bii te bota, bii te sɛɛra tiihe se'ehe n wan wɔna dia te la dɛna va'am bɔ'ɔra tɔ. Te da tara lɔgɔtona wa, ge te tin'ira sogora kɛn'ɛra to poan. Te han ana bala, te wan kɛn' te teŋsɛka poan te ya dɛna saama wa. 8Sɛla woo te tomam sɔyaaba Arekab dayɔa Yonadab yele tomam la, tomam nam a me. Tomam mɛŋa bii to pɔgɔba, bii to dayɔɔhe bii to pɔyɔɔhe n ihege na, to ka tabelɛ nyu' daam, 9bii mɛ te mɛhe yiya bii kɔ vatɔ, bii borɛ. 10Tomam tin' la sogora kɛn'ɛra, ge me dɔla sɛla woo te to sɔyaaba la yele to la. 11Ge Nebukadnezar n yuun wa'ana gbirige te teŋa la zuo te to yuun eŋɛ nɔɔrɛ la to mɛhe wa'ana zin'ire Yerusalem teŋa wa poan te Nebukadnezar da nyaŋɛ sagom tɔ. Bala n sɔe te tomam yare yee Yerusalem teŋa wa poan wa. 12Te Na'ayenɛ tɔgɛ bo Yeremia yeti, 13Mam n de Pɛɛntɛɛnreba Na'ayenɛ la, Israel Yenɛ la, keŋɛ ta yele Yuda teŋadoma, la Yerusalem teŋadoma wa yeti, behɛ ya yele dena wa, la ya zamehɛ ya wan nana mam yelehom se'em. 14Arekab dayɔa Yonadab yuum bo a yaahe la nɔɔrɛ, te ba da nyuura daam, te a yizuo la nɛreba zan'an, seren nam ba yaaba la nɔɔrɛ la, ka nyuura daam, la zina. Ge te mam mɛŋa tɔgɔra saŋa woo la ninmɔ'ɔrɛ bɔ'ɔra yamam, ge te ya ka malom nana mam. 15Mam tone n nɔtɔgɔheba la bala ya zen'an na, te ba kena na yɛta ya yeti, Bahɛ ya ya be'emtooma la, ge te nɛra woo tee a etegɔ, la ya da po'oha baga, ge bala te wan ta'an bɔna teŋsɛka te mam dekɛ bo yamam, la ya sɔyaabdoma la poan. Ge la pon ka lu ya tobai, bii ya nam mam. 16Arekab dayɔa Yonadab yaahe yuum wa'ana nam ba sɔyaaba nɔɔrɛ la te a bo, ba la mɛ, ge yamam ka nam mam. 17Bala zuo, Pɛɛntɛɛnreba Na'ayenɛ la, Yenɛ n de Israel Yenɛ la yeti, N wan bahɛ te namehe seko woo te mam yeti ko wan sige sɛba n ka nane mam la zuo na la, sige Yuda la Yerusalem nɛra woo zuo. Se'ere n sɔe la, mam tɔgɛ bo ba mɛ, te ba ka kelehe. Mam yi ba mɛ, te ba zagahɛ. 18Te Yeremia yele Arekab buuri la yeti, Pɛɛntɛɛnreba Na'ayenɛ la, Israel Yenɛ la yeti, yamam n nam ya yaaba Yonadab, ge tɛnra en bo ya nɔse'ere la, ge tom a nɔɔrɛ la te a bo ya la zuo, 19Pɛɛntɛɛnreba Na'ayenɛ la n de Israel Yenɛ la yeti, Arekab dayɔa Yonadab buuri wa poan nɛra, kan malom koŋe mam nɛŋan tona bɔ'ɔra mam.

will be added

X\