Yeremia 30

1Te Na'ayenɛ le tɔgɛ bo Yeremia yeti, 2Golehɛ yetɔgom sebo woo te mam tɔgɔra bɔ'ɔra ho wa biŋe. Mam n de Na'ayenɛ la, n de Israel Yenɛ la. 3Dabeha kene na te n wan foe n nɛreba Israel la Yuda teŋadoma te ba nyɔkɛ keŋɛ Babilon poan la, n wa tare ba lebe na bahɛ te ba zin'ire teŋsɛka poan te mam dekɛ bo ba sɔyaabdoma te ka dɛna ba dene. Na'ayenɛ la n tɔgɛ. 4Na'ayenɛ la n yele Israel la Yuda teŋhe se'em n wana, 5Na'ayenɛ la yeti, Mam wone la kaahe dɔɔrɔ ma'an. Dabeem, te sunma'ahom ka bɔna. 6Soke ya bahɛ. Boraa wan ta'an dɔgɛ bia? Ge bene n sɔe te mam nyɛta te boraahe wa nɛhe pelege ge te ba dekɛ ba nu'uhe gin' ba poya ŋmɛɛla wo pɔgɔpoadaana n virige wa? 7Lan pin'ilom na, dabaherɛ nan ka tabelɛ ana bala, dabaherɛ me pon kan le malom bɔna bala. De yeti de dɛna la dabaherɛ too bo Yakob wa, ge la bala zan'an a wan nyɛ faanrɛ. 8Pɛɛntɛɛnreba Na'ayenɛ la yeti, daanden daarɛ n wan kɔ' yɔgɔhɔga sɛka te ba dekɛ yɔgɛ ba la, ge kɔ bahe se'ehe te ba dekɛ ba ba la bahɛ. Saama kan le malom dɛna mam nɛreba wa kpɛ'ɛndoma le yɛ'ɛha. 9Se'ere n sɔe la Mam wan dɛna ba Na'ayenɛ te ba po'oha mam, ge te n bo ba naba David te a behera ba. 10Bala zuo la Yakob, da bahɛ te dabeem tara hɔ, Israel da bahɛ te ho suunre sagom. Na'ayenɛ yele se'em n bala. N wan fan' ya teŋse'ehe n zaan la woo poan tare ya lebe na, ge tare ho yaahe se'ehe woo n boe teŋse'ehe woo poan dɛna yamehe la lebe na Yakob wan lebe na zin'ire a teŋa wa poan la sunma'ahom te sɛla ka bɔna wan vuuhe en. 11Mam boe la hɔ, n wan fan' ho bahɛ. N wan sagom teŋse'ehe woo te n yeregɛ ho bahɛ se poan la ge n kan sagom ta hɔ. Ge n wan dɔnlegɛ ho toberɛ, n kan bahɛ hɔ. Na'ayenɛ yele se'em n bala. 12Na'ayenɛ la yeti, Ho nɔtɛ la ka tare tebegɔ. Ho ba pɔgɔlom gaŋɛ mɛ. 13Se'em ka boe wa ze'ele belom bo ho tiim ka boe wa ze'ele belom ho nɔtɛ la tebegɔ ka boe wan tebɛ hɔ. 14Ho zɔdoma la zan'an la tamɛ hɔ yele mɛ, ba ka le tɛnra hɔ yele. Mam tɛn ho me wo diŋdaana n wan tɛn ne ho se'em la, ge namehɛ hɔ wo potɔya n wan namehɛ ne ho se'em la. Se'ere zuo ho be'em la n ba gaŋɛ, te ho yelebe'ero la me ba zo'e. 15Bene n sɔe te ho kɛla ho nɔtɛ la zuo, ho too la ka tare tebegɔ. Ho geere la n ba gaŋɛ, ge te ho yelebe'ero la me ba zo'e la zuo te n dekɛ daaŋɔ kona wa woo bahɛ ho zuo na la. 16Ge n wan sagom sɛba woo n daa sagom hɔ la, ge te ho diŋdoma woo wan lomehe teŋhe ta dɛna yamehe. Ba wan fan' sɛba woo n da fan' hɔ, ge zabɛ la sɛba woo n zabɛ la hɔ. 17N wan lebe dekɛ ho sunma'ahom bo ho, ge tebɛ ho nɔtɛ la. Na'ayenɛ yele se'em n bala. N wan eŋɛ bala. Se'ere n sɔe la, ba yi'ire ho la Zion n bahɛ yoo te nɛnɛra ka behera hɔ. 18Na'ayenɛ yeti, N wan malom mɛ' Yakob yaabdoma daboo la, Ninbaanlega n tare mam la ba yiya la, Ba wan malom mɛ' teŋhe woo n de daboto la, Ge malom mɛ' naba woo yire ze'ele de ze'elego zen'an. 19Nyeeŋɔ nya wan bɔna te ba yoon pɛnka yooma. N wa bahɛ te n nɛreba wa wi'ɛ pa'ahɛ, ge te n eŋɛ ba te ba dɛna teŋkantɛ n tare zuo. 20La wan le ana Yakob yaahe wa soŋa wo lan yuum pon ana se'em la. N wan sɛ ba te ba dɛna teŋkantɛ zɛ'a te hom se'em woo n daam ba, n wan namehɛ hon daana. 21Ba mɛŋa nɛra n wan dɛna ba nɛŋadaana. Ba mɛŋa nɛra n wan dɛna ba naba. N wan yi' en te a lɛm mam na te a me wan seren lɛm mam. Ane wan foe zuo lɛm mam na, mam han ka bo a daana sore? Na'ayenɛ yele se'em n bala. 22Ya wan dɛna mam nɛreba, te mam me dɛna ya Na'ayenɛ. 23Behɛ, Na'ayenɛ la sunsunyiim vukure mɛ wo saabeeokeŋɔ la pɛbila potɔpa la yɛ'a. 24Na'ayenɛ la sunsunyiim la kan malom man'ɛn han dagana bo tom la bon nyie se'ere zuo la ba'ahɛ. Dabeha kene na te ho wan bɔkɛ dena wa.

will be added

X\