Yeremia 3

1Boraa han lebehe ka pɔga, te ka lebe ta malom ele boraa kayema, a serakora la wan ta'an lebe ta di ka mɛ yoi? Toondena taaba wa kan ganlom teŋkaŋa? Yamam dekɛ la baga ganlom ya mɛŋa. Ya yeti ya eŋɛ la wane lebe mam zen'an na? Na'ayenɛ yele se'em n bala. 2Behɛ zɔya wa zan'an zuto, bɛ te ba ka gan'arɛ la hɔ bini? Ho zin' sɔrɔtɔ zuo la bala gura zabɛ doma, wo ligiri kaara n zin' gura te ba dekɛ en la. Ya sagom teŋa la mɛ, la ya yalomtooma la, la ya pototooma la. 3Bala zuo, te saa kan ni, sigisaa kan ni. Ge ya zuto ku'e mɛ wo yalomtooma daana la, te vi ka tara ya. 4Ho ka yi' mam mɛ nananawa te, n sɔ, ho dela mam zɔ n bonbilomen na, ho wan kɔ'ɔn eŋɛ suunre la mam bala yɛ'ɛha yoi wa? 5Ho suunre wan kɔ'ɔn nyie la bala yɛ'ɛha yoi? Ho wan kɔ'ɔn zɛrɛgera to la bala yɛ'ɛha yoi? Yamam n sokere yelese'a n bala, ge ya ton ka bɔta te ya bahɛ ya be'em la. 6Saŋsɛka te Yosia dɛna Yuda naba la, te Na'ayenɛ tɔgɛ bo mam yeti, Ho nyɛ be'em sebo te Israel wa n de a ka tare sakerɛ seradaana wa tom? Ho nyɛ en doohe zom zoore woo zuo, la tikantɛ woo teŋa tom yalomtooma se'a? 7Te mam tɛn'ɛhe yeti en tom toon ana wa wo la, a wan ŋmɛregɛ lebe mam zen'an na, te a me ka eŋɛ bala, te a sɔɔn Yuda n de ponpɔrɔma daana la nyɛ bala. 8N nyɛ Israel n de a ka tare sakerɛ seradaana la, n doohe tom a bagakaanbegɔ la woo la, mam dekɛ la a wanɛ tare en ta lebehe. Ge la bala zan'an, dabeem ka kɛn' Yuda, te enŋa me kɛn' yaalegɔtooma la poan. 9Yuda n ka behɛ nyɛ te Israel dɛngerɔ tooma la ka ane soŋa la zuo, te a me pɔhɛ sagom a teŋa la, dɔla kugure la tia woo n boe a teŋa la, ganlona a mɛŋa. 10Ge la yele ana wa woo la, Israel sɔɔn Yuda wa ka ŋmɛregɛ lebe mam zen'an na la a suunre zan'an, a yeen eta mɛ. Na'ayenɛ yele se'em n bala. 11Te Na'ayenɛ yele mam yeti, Israel teŋa wa n ka tare sakerɛ sera wa ba' tom a be'em la te bo nɛɛ gana Yuda teŋa wa n de ponpɔrɔma wa. 12Keŋɛ ho zuɔ nu'o bɔba la ta mɔɔlɛ bahɛ ha yeti, A ka tare sakerɛ sera Israel wa, lebe na. N kan le eta suunre la hɔ, mam dela ninbɔn'zɔta. N kan eŋɛ suunre bala kɔ'ɔn yɛ'ɛha. Na'ayenɛ yele se'em n bala. 13Hom yeem baŋɛ ho tue mɛ, la hom n bire poore bahɛ, ho Na'ayenɛ ho Yenɛ la, ge dɔla tikantɛ woo teŋa kaanbera baga, ge ka nana mam la. Na'ayenɛ yele se'em n bala. 14A ka tare sakerɛ sera kɔma wa, lebe ya na. Mam n de ya sera. N wan doohe teŋkanra poan loohe ya bayi', ya ba tan', lagahɛ ya wa'an Zion na. Na'ayenɛ yele se'em n bala. 15N wan bo ya duŋkeema sɛba n tare mam mɛŋa suunre la, te ba tara yam la bɔkerɛ ugura ya. 16Te dabeha aŋa poan la, ya han yi'ɛ ya kanlɛ poan, teŋa la poan, ba kan le tɔgɔra Na'ayenɛ nɔbiŋere daka la yele. La pon kan wa'an ya potɛn'ɛra poan na, bii ya tɛnra ka yele, bii ka yele pakɛ ya, bii ya malom maalɛ kayema. 17Saŋkaŋa poan la, ba wan yi'ira Yerusalem la Na'ayenɛ la na'am teŋa, te teŋhe woo nɛreba lagaha ka poan na, na'aha Na'ayenɛ, ge kan le dɔla ba sunkanberɛ la n bote be'em sebo taaba la. 18Dabeha aŋa poan, Yuda teŋa wan naɛ nɔɔrɛ la Israeldoma, te ba zan'an ze'ele zuɔ bɔba teŋa la na, to'e teŋsɛka te mam dekɛ bo ya sɔyaabdoma te ka dɛna ba sɔ'ɔlom la. 19Mam ne tɛn'ɛhɛ la, mam n wan dekɛ ya zin'ire la n kɔma wa se'em, la n bo ya teŋa n ane soŋa, n bo ya teŋsɛka n ba' ana soŋa teŋhe wa woo poan, te ka dɛna ya sɔ'ɔlom. 20Ge la bala zan'an, hom Israel bahɛ mam mɛ, wo pɔka n ka tare sakerɛ sera ge bahɛ a sera se'em la. Na'ayenɛ yele se'em n bala. 21Kaahega n surene zoore zuo baha na. Israel nɛreba n bala kɛla yena na wa. Se'ere n sɔe la, ba bahɛ ba sore la mɛ. Ba tamɛ Na'ayenɛ ba Yenɛ la mɛ. 22A ka tare sakerɛ sera kɔma wa, lebe ya na, n wan tebɛ yan ka tare sakerɛ sera la. Tomam n wana lɛbera ho zen'an na wa. Se'ere n sɔe la, hom ma'an n de Na'ayenɛ to Yenɛ la. 23Yelemɛŋɛrɛ, zɔya wa zuo baga kaanbegɔ la, la voole la woo a zuo la dela yoo. Yelemɛŋɛrɛ, Na'ayenɛ to Yenɛ la, n de Israel faanrɛ. 24Ge pɔhɛ tomam bonbilomen na, to vitooma te to na'aha Baal baga la di to sɔyaabdoma murugere lɔgɔrɔ, ba piihe la ba nii la ba dayɔɔhe la la ba pɔyɔɔhe zan'an. 25Bahɛ tɔ te to gan'an to nyanɛ la poan bala, te to de lerom tɔ bala. Tomam tom la be'em to Na'ayenɛ to Yenɛ wa nɛŋan, tomam, la to yaabdoma zan'an ha, ze'ele bilomen ha ta paɛ zina, to kelom ka nana Na'ayenɛ to Yenɛ wa yelehom la.

will be added

X\