Yeremia 28

1Zedekia n wa di Yuda teŋa na'am te yuunse'ere nya wan pa'ahɛ a yuuma anaahe la, yuun denɛ ŋmarehe senuu poan te Gibeon teŋa boraa boe te ka yu'urɛ dɛna Azur te a dayɔa bɔna dɛna nɔtɔgɔha te ka yu'urɛ dɛna Hanania, te daarɛ deyema te a ze'ele malemadoma la, la nɛresɛba woo n boe bini la nɛŋa yele mam yeti, 2Pɛɛntɛɛnreba Na'ayenɛ la, n de Israel Yenɛ la yeti, N wan kɔ' Kaldea naba yɔgɔhɔga la te a dekɛ yɔgɛ ya la bahɛ. 3Yuuma ayi' poan mam Na'ayenɛ wan tare n Na'ayenɛ Yire wa lɔgɔseto woo te Naba Nebukadnezar fan' tare keŋɛ a teŋa Babilon poan la lebe na. 4N wan le tare Yuda naba Yehoiakim dayɔa Yehoiakin la nɛresɛba woo te ba pɛnregɛ tare keŋɛ Kaldea poan. Se'ere n sɔe la n wan kɔ' Kaldea naba yɔgɔhɔga bahɛ. Na'ayenɛ n yele se'em la. 5Te Na'ayenɛ nɔtɔgɔha Yeremia ze'ele malemadoma la, la nɛresɛba woo n boe Na'ayenɛ Yire la poan nɛŋan lebehe nɔtɔgɔha Hanania yeti, 6La eŋɛ bala, Na'ayenɛ la seren bahɛ te hom n porɛ sɛla wa wa'an yelemɛŋɛrɛ na, a bahɛ te ba zi lɔgɔseto woo n de Na'ayenɛ Yire wa lɔgɔrɔ la, la nɛresɛba woo te ba daa pɛnregɛ tare ba keŋɛ Kaldea poan la lebe na wo hom n porɛ se'em wa. 7Ge kelehe yelese'ere te mam mɛ yeti n yele bo ho nɛreba wa nɛŋan te ba lagom wom wa. 8Mina soŋa te nɔtɔgɔheba sɛba n yuum boe ge te mam la hom nya baŋɛ wa'ana wa yuum pon pota la zaba la namehegɔ la kom la too yɛla bahɛ teŋhe la sɔ'ɔlom kanra zuo te la dɛna ninmɔ'ɔrɛ kan'aŋɔ bɔ'ɔra ba. 9Ge hom han dɛna la nɔtɔgɔha se'em n kɔ'ɔn tɔgɔra la som ma'an yɛla te som la seren dɔla bala te wan baŋɛ te ho dela Na'ayenɛ n nɔtɔgɔha yelemɛŋɛrɛ. 10Te nɔtɔgɔha Hanania nyɔkɛ yɔgɔhɔga la Na'ayenɛ nɔtɔgɔha Yeremia nyugela poan kɔ' yɔgɔhɔga la bahɛ. 11Ge a yele nɛrekooŋɔ la n boe bini la yeti, Na'ayenɛ la yeti yuuma ayi' poan a wan kɔ' Kaldea naba yɔgɔhɔga la te a dekɛ yɔgɛ teŋa woo nɛreba te ba dɛna a yamehe la bahɛ. N eŋɛ bala ba'ahɛ la te nɔtɔgɔha Yeremia keŋɛ a sore. 12Bala n tole la te la maan dabeha te Na'ayenɛ tɔgɛ bo a nɔtɔgɔha Yeremia yeti, 13Na'ayenɛ la yeti, dɔɔrɔ yɔgɔhɔga te ho kɔ' bahɛ la, ka nya wan tee dɛna la kuto yɔgɔhɔga. 14Pɛɛntɛɛnreba Na'ayenɛ la, n de Israel Yenɛ la yeti, Mam dekɛ la kuto yɔgɔhɔga yɔgɛ teŋhe wa woo nyugela ta la Kaldea Naba Nebukadnezar te ba ba dɛna a yamehe. Mam dekɛ sɛla woo mɛ ta ta la mɔɔdunhe eŋɛ a nu'uhen te a sɔna behera. 15Bala te Yeremia ihege keŋɛ ta yele Hanania yeti, Hanania behɛ, Na'ayenɛ ka tom hɔ na, ge te ho dekɛ ho mɛŋa potɛn'ɛrɛ wa'ana pan'ahɛ teŋa wa te ba sakɛ bo ho ponpɔrɔŋɔ la. 16Bala zuo Na'ayenɛ la yeti, N wan bahɛ te mɛlom teŋa wa zuo, yuun dena wa poan hɔ wan ki. Se'ere n sɔe la ho tɔgɛ la pobirega yetɔgom bo Na'ayenɛ. 17Te yuun dene mea poan, ka ŋmarehe seyopɔe poan te Hanania ki.

will be added

X\