Yeremia 26

1Dabeha se'a poan te Yosia dayɔa Yehoiakim nan pɔhɛ di Yuda teŋa na'am dɛna Yuda teŋa naba la te Na'ayenɛ tɔgɛ bo mam. 2Na'ayenɛ n yele se'em n wana, keŋɛ ta ze'ele Na'ayenɛ Yire zenzaka la poan la ho yele nɛresɛba woo n ze'ele Yuda teŋhe woo poan na te ba na'ahe Na'ayenɛ a yire la poan la. Yele ba yelese'a woo te n yele hɔ la, ge da gee yele bahɛ. 3Daanse'ere ba wan kelehe, ge te nɛra woo ŋmɛregɛ yehe a be'em sɔrɔɔ la poan. Ba han eŋɛ bala, n wan bahɛ, n kan bahɛ te too seko n yele ne te bo sige ba zuo na ba tobekpa'a la zuo la sige ba zuo na. 4Yele ba te Na'ayenɛ yeti, Nam mam ge dɔla pa'alegɔ seko te n bo ya la. 5Kelehe mam yamehe, nɔtɔgɔheba la, te mam tona ba ya zen'an daarɛ woo na te ba kan'an ya la ninmɔ'ɔrɛ te ya zagahɛ ba. 6Ya han ka nam mam, n wan sagom Yire wa wo mam n sagom Silo. Ge n wan bahɛ te teŋhe woo nɛreba wan dekɛ Yerusalem kan' kan'be'ero. 7Te malemadoma la nɔtɔgɔheba la nɛreba woo wom Yeremia n yele yelese'a Na'ayenɛ Yire la poan. 8Yeremia n ta tɔgɛ Na'ayenɛ nɔɔrɛ la ba'ahɛ la, malemadoma la nɔtɔgɔheba la nɛresɛba woo n boe bini la gin' en, ge yeti, To ko'ore hɔ mɛ. 9Ane n bo ho sore te ho ze'ele Na'ayenɛ yu'urɛ poan tɔgɛ te yire wa wan sagom wo Silo ge te teŋa wa me lebege daboo te nɛra ka bɔta ka. Ge nɛresɛba woo n boe Na'ayenɛ Yire la poan la daa gilige Yeremia bahɛ teŋasoka. 10Yuda teŋa kpɛ'ɛndoma n daa ta wom yele dena wa la ba daa ze'ele ba naba yire la me ge keŋɛ Na'ayenɛ Yire la poan, ta paɛ zɛ'a Na'ayenɛ Yire la nayaŋa sɛka te ba yi'ira ka te Nayaŋa Paalega la nɔɔrɛn. 11Te malema la nɔtɔgɔheba la nya yɛta kpɛ'ɛndoma la nɛresɛba woo n boe bini te nɛre'ena wa kɔ'ɔn dɛna la a ki. Se'ere n sɔe la, ya mɛhe toba wom en tɔgɛ yetɔgom sebo bahɛ teŋa wa zuo. 12Te Yeremia me yele kpɛ'ɛndoma la nɛra woo yeti, Na'ayenɛ la n tom mam na te n tɔgɛ bahɛ teŋkana wa poan la yire wa poan yelese'a woo te ya wom wa. 13Bala nananawa, malom tee ya ya etegɔ la, ge la ya nana ya Na'ayenɛ ya Yenɛ la. Ya han eŋɛ bala, Na'ayenɛ la wan gu' te namehe seko woo n wan sige ne ya zuo na la kan le sige ya zuo na. 14Ge han dɛna mam mɛŋa wa mam boe la ya nu'uhen, yamam n tɛn'ɛhɛ te la nare ge sona te ya eŋɛ mam se'em la ya eŋɛ mam bala. 15Ge ya mina soŋa te ya han ko mam, ya ka'ɛ la ziim sebo n ka tare taalɛ. Bala la taala la wan dɔla yamam la teŋkana wa, la sɛba woo n kɛn'ɛre ka poan. Mam ka tɔgɛ n mɛŋa yetɔgom. La dela yelemɛŋɛrɛ te Na'ayenɛ n tom mam ya zen'an na te n wa'ana tɔgɛ yelese'a woo te ya wom wa bo ya. 16Te kpɛ'ɛndoma la la nɛresɛba woo n boe bini la yele malemadoma la nɔtɔgɔheba la yeti, Sore ka boe te ya ko boraa wa. A ze'ele Na'ayenɛ n de tomam Yenɛ la yu'urɛ poan tɔgɛ bo to 17Te keendoma ze'ele nɛrekooŋɔ la boe yehe na ze'ele nɛra woo nɛŋan yeti, 18Saŋsɛka te Hezekia yuum dɛna Yuda teŋa naba la Moreset teŋa boraa la n de nɔtɔgɔha te ka yu'urɛ dɛna Mikah la n yuun ze'ele Na'ayenɛ yu'urɛ la poan yeti, Pɛɛntɛɛnreba Na'ayenɛ la yeti, Zion teŋa wan saalom gan'an wo samanɛ la. Yerusalem teŋa wan lebege tampogerɛ. Yenɛ Yire la n yage zoore se'ere zuo la wan yu' la tuntuuro. 19Naba Hezekia la Yudadoma ka ko en. Ge Hezekia na'aha Na'ayenɛ la ɛ a zo'ohogɔ. Bala n sɔe Na'ayenɛ go' namehe seko en wan sige ne ba zuo na la bahɛ. Tomam n ko ena wa la wan bahɛ te namehegɔ n sige to zuo na. 20Bala mea te Kiriat Yearim teŋa boraa Semaiah dayɔa Uria yuun dela boraa kayema mɛ n ze'ele Na'ayenɛ yu'urɛ la poan tɔgɛ, te yeletooro seto taaba te Yeremia tɔgɛ te la wan sige Yerusalem la teŋa wa zuo. 21Ge naba Yehoiakim la a kpɛ'ɛndoma n yuun wom yele ana wa la, ba yuun eere Uria me te ba ko en. Ge Uria me wom te dabeem kɛn' en te a yuun zɔ' loŋe Mizraim teŋa poan. 22Te naba Yehoiakim sina ge tom Akbor dayɔa Elnatan, la nɛreba basɛba te ba keŋɛ Mizraim teŋa poan. 23Te ba keŋɛ ge tare Uria ze'ele Mizraim teŋa poan wa'ana dekɛ en eŋɛ naba Yehoiakim nu'uhen, te a bahɛ te ba ko en la so'a, tare en ta pin' ban pin'ire nɛra woo zen'an la wo a dagɛ la Na'ayenɛ nɔtɔgɔha la. 24Le yɛ'ɛha me, Sapan dayɔa Ahikam me n daa kɔ'ɔn bɔna Yeremia pooren kaŋkaŋe te nɛreba la daa ka nyaŋɛ bahɛ te ba ko en.

will be added

X\