Yeremia 24

1Kaldea Naba Nebukadnezar n daa ta wa'ana zabɛ nyaŋɛ teŋa la ge pɛnregɛ tare Yuda teŋa naba Yehoiakim dayɔa Yehoiakin la a kpɛ'ɛndoma la teŋa la poan gɔnɔ min'ilom doma la sɛba n de kuteba la mɛteba la kpa'areba tare ba zan'an keŋɛ Babilon poan la, te Na'ayenɛ lilige mu'uro pitɔ toyi' n ze Na'ayenɛ Yire la nɛŋan pa'alɛ mam. 2Te pi'ɔ koyema dɛna mu'uro soma zaŋa, te pi'ɔ koyema la mɛ dɛna mu'uro pon'oha. 3Bilam te Na'ayenɛ soke mam yeti, Yeremia ho nyɛ' la bem? Te mam lebehe Na'ayenɛ yeti, Mu'uro te mam nyɛ', te basɛba ana soŋa, te basɛba mɛ kɔ'ɔn pon'ɛn kan ta'an di. 4Te Na'ayenɛ tɔgɛ bo mam yeti, 5Na'ayenɛ la se'em n de Israel Yenɛ la yeti, Nɛresɛba te mam bahɛ te ba pɛnregɛ ba tare keŋɛ Kaldea poan ha wa ane la soŋa mam nɛŋan wo mu'uro soma wa. 6Mam mɛŋa wan beha ba bini, ha, te la ana ba soŋa te n tare ba lebe teŋa wa poan na. N wan mɛ' ba te ba zom n kan gbi ba bahɛ, n wan sɛ ba ze'ele, n kan voen ba bahɛ. 7N wan bo ba suunre se'ere te ba wan ta'an baŋɛ mam te mam na de ba Na'ayenɛ. Ba wan dɛna mam nɛreba, te mam dɛna ba Na'ayenɛ. Se'ere n sɔe la ba yeti ba ŋmɛregɛ me la ba suunre zan'an lebe mam zen'an na. 8Na'ayenɛ yeti, ge han dɛna mu'uro seto n sagom kan ta'an di la, bala mea te n wan namehɛ Yuda teŋa naba Zedekia la a kpɛ'ɛndoma, la nɛresɛba woo n yee bɔna Yerusalem teŋa wa poan la Mizraim teŋa poan. 9N wan eŋɛ ba te ba dɛna dabeem la be'em lɔkɔ teŋa wa woo zuo. Zen'an woo te n bahɛ te ba keŋɛ bini, nyanɛ wan di ba, te nɛreba kɛhɛ ba ge namehɛ ba ge pɔ' nɔya bahɛ ba zuo. 10N wan bahɛ te zaba, kom, la ban'ahe sige ba zuo bala na tara tara te ba ta mɛlom teŋsɛka te mam dekɛ bo bama la ba yaahe la poan.

will be added

X\