Yeremia 22

1Te Na'ayenɛ yele mam yeti, Keŋɛ sige Yuda teŋa naba yire, la ho ta tɔgɛ yetɔgom bona wa bini. 2Yele ba yeti Yuda teŋa nadoma wa, yamam sɛba n zin' David na'am koka wa zuo wa, la ya kpɛ'ɛndoma, la ya nɛreba sɛba woo n dole nayahe sena wa poan la kelehe ya Na'ayenɛ yelehom wa. 3Na'ayenɛ n yele se'em n wana. Ete ya sɛla n nare ge dɛna tontɔɔ. Fan' ya se'emdaana te ba fan' en te a bɔna muguhego poan bahɛ. Da tom ya be'em bo saana bii ya pim en. Da tom ya be'em bo keebega, bii pɔkɔɔnrɛ. Da ka'ahere ya ziim sebo a ka tare taalɛ teŋkana wa poan. 4Ya han man'ɛn ya mɛhe ge dɔla ze'elego seko te mam bɔ'ɔra ya wa, saŋa woo David buuri n wan dɛna naba teŋa wa poan, ba ne wan ban'ara ba yiri toroto, la ba yiri zuto te ba kpɛ'ɛndoma dɔla ba poore, la teŋa la nɛreba te ba dɔla naba yire nayaŋa wa poan tɔla. 5Ge ya han ka nam ze'elego kona wa, mam pɔ' la n mɛŋa yu'urɛ wa te naba yire wa wan lebege daboo. Na'ayenɛ yele se'em n bala. 6Na'ayenɛ n yeti, Yuda naba yire la yele se'em n wana. Ho ane soŋa bo mam wo Gilead teŋa la Lebanon zoore la n sobege ana soŋa bo mam se'em la. Ge la bala zan'an n wan sagom ho bahɛ te ho teŋhe lebege daboo. 7N wan dekɛ hɔ tuule la sɛba n sagom ne, te ba woo zanla ba sagaŋɔ lɔkɔ, wa'ana ŋma' ho dɔɔ mɔlɔsonɔ la bahɛ bugum poan. 8Teŋhe woo nɛreba wan wa'ana dɔla tɔla ge sɔkera yeti, Bene n sɔe te Na'ayenɛ la ba tom teŋkantɛ wa toondena wa taaba wa? 9Lebehegɔ la wan dɛna la, ba zagahɛ la nɔbiŋere se'ere te ba Na'ayenɛ la biŋe la ba la, ge ŋmɛregɛ po'oha ge tona bɔ'ɔra yena a se'a. 10Da kele bo naba la kum la, bii en ka boe la, ton kele bo naba se'em te ba pɛnregɛ to tara to loŋe teŋa kayema poan la, enŋa pon kan le malom lebe na, bii a nini le nyɛ a mɛŋa teŋa la le yɛ'ɛha. 11Na'ayenɛ n yele Yosia dayɔa Salum n sɔe a sɔ na'arɛ dɛna Yuda teŋa naba te ba tare en loŋe teŋa kayema poan la se'em n wana, a pon kan malom lebe ka'lam na. 12A wan ki teŋsɛka n zaan poan ha, a nini kan malom muɛ a mɛŋa teŋa wa le yɛ'ɛha. 13Nɛresɛba n dekɛ ŋmɛlema mɛ' a yire, ge dekɛ fan' mɛ' deto togolom, pɛnregɛ a mea nɛreba te ba mɛ' a yire la yoo bo en te a ka yɔ ba ba yɔɔrɛ n de se'em la. Sagaŋɔ boe a zuin. 14A yele bo a mɛŋa yeti, N wan mɛ' yire kantɛ bo n mɛŋa, te saazuo deto la yalegɛ, ge dekɛ maalɛ takɔla kanra kɛn'ɛhɛ, ge golɛ deto la dɔɔ mɔlɔsomɔ. 15Ge ho han tara yikantɛ te ba dekɛ dɔɔ mɔlɔsomɔ maalɛ dɛ, bala n wan bahɛ te ho dɛna naba kantɛ yoi? Dagɛ lɔgɔtona zuo te ho sɔ yuun zin'ire a na'am gɔŋɔ la zuo yue la, la dela a yuun dela nɛresoŋɔ, ge tona sɛla woo a vom poan tontɔɔ. Bala zuo te Na'ayenɛ yuun kan maalɛ en. 16A daa pekɛ la nini behɛ te yelemɛŋɛrɛ, la narehom paara taromdoma, bala zuo te sɛla woo daa ana soŋa bo en la. Dagɛ ete koŋɔ n de nɛra min mam la? Na'ayenɛ yele se'em n bala. 17Ge hom kɔ'ɔn dekɛ ho nini la ho suunre zan'an delom la fan' ma'an lɔgɔrɔ poan, la ziim ka'ahegɔ yore yore, la muguhego, la namehegɔ tooma ma'an poan 18Bala la, Na'ayenɛ la n yele Yuda teŋa naba Yosia dayɔa Yehoiakim se'em n wana, nɛra kan kele ho yele. Nɛra kan kele te ho dela a keema bii a tanya, bii a kpɛ'ɛma, bii ho soŋa yele. 19Ba yeti ba vue ho ta lobe bahɛ la Yerusalem yeŋa ha wo ban pin'ire boŋa se'em la. 20Yerusalem nɛreba, nɛresɛba te ho daa dekɛ ho mɛŋa delom mɛlom ya. Keŋɛ Lebanon ta kaahɛ bilam. Kaahɛ mɛ Basan la Moab teŋhe poan. 21Se'em ma'an te la daa ana ho soŋa la, mam daa kan'ane ho mɛ te ho zagahɛ te hom kan kelehe. Hom n pon ana se'em ho bonbilomen ha n bala, ho ka kelehe kan'ama. 22Nananawa, sabeeo wan pe'e ho duŋkeema la zan'an tare keŋɛ, ge te ba pɛnregɛ sɛba te ho dekɛ ho mɛŋa delom ba la loŋe teŋhe sese'ehe poan te ba dɛna yamehe. Ho toonbe'ero la zuo vi la nyanɛ wan di ho. 23Yamam sɛba n kɛn'ɛre Lebanon teŋa poan dekɛ dɔɔ mɔlɔsomɔ mɛ' yikanra kɛn'ɛra a poan fai la, too kene ya zuo na, too n ane wo pɔka n virige te la tɔna se'em la, ya wan ta kaahɛ mɛ. 24Na'ayenɛ yeti, Mam kɔ'ɔn vɔna wa, Hom naba Yehoiakim dayɔa Yehoiakin n de Yuda teŋa naba wa han pon dɛna mam na'am nu'toa mam wan pirege ho lobe bahɛ. 25N wan dekɛ ho eŋɛ sɛba n eere ho vom la, sɛba te ho zɔta la, Babilon Naba Nebukadnezar, la Kaldea nɛreba nu'uhen. 26N wan sa'ɛ hom, la ho ma se'em n dɔgɛ ho la bahɛ teŋyoo sɛka poan te ba ka dɔgɛ ya bini, te ya ta lagom ki ka poan. 27Ya wan bɔta te ya lebe ya mɛŋa teŋa wa poan na, ge ya kan malom nyaŋɛ lebe na. 28Yehoiakin wa ane me wo sayɛɛhɛ n ka tare tone. Bene n sɔe te ba wan pɛnregɛ enŋa la a kɔma loŋe teŋa? 29Teŋa wa, teŋa wa, kelehe Na'ayenɛ yelehom wa. 30Na'ayenɛ n yeti se'ere n wana, Golehe ya te la gan'an te boraa kana Yehoiakin wa dela kondɔgɔrɛ, a vom la ka tare vɔnrɛ, a bia ka boe wan malom zin'ire David na'am gɔŋɔ la poan dɛna Yuda teŋa naba.

will be added

X\