Yeremia 21

1Saŋsɛka poan te naba Zedekia tom Malkia dayɔa Pasur la Maaseiah dayɔa Zepania se'em n daa de malemadaana la te ba wa'ana tɔgɛ la Yeremia. Te ba wa'ana te ba belom Yeremia yeti, 2To belone ho me sohɛ Na'ayenɛ te a soŋɛ tɔ. Se'ere n sɔe la Babilon Naba Nebukadnezar n zaberɛ la tɔ, te to behɛ daanse'ere a wan zɔ to ninbɔn'ɔn ge tom nyalema wo n yuun tone a se'em deemen deemen ha la, te dabeem kɛn' te a bahɛ da zabɛ la tɔ. 3Te Yeremia lebehe ba yeti, Yele ya Zedekia yeti, 4Na'ayenɛ se'em n de Israel Yenɛ la yeti, mini ya te n yeti n dekɛ la ya zaba lɔgɔseto n boe ya mɛŋa nu'uhen te ya tara zabera la. Kaldea naba la la a nɛreba la n kae ya teŋa la gan'an gura te ba zabɛ la ya la. N wan kan'ahɛ ba kɛn'ɛhɛ ya teŋa wa poan na. 5Mam mɛŋa n wan tɛɛn n nu'o la paŋa la n sunsunyiim zabɛ la ya. 6N wan ko sɛba woo n boe teŋa wa poan, nɛreba la dunhe zan'an, namehe kantɛ n yeti de ko ba. 7Bala han ba'ahɛ n nya wan dekɛ Yuda teŋa naba Zedekia, la a kpɛ'ɛndoma la zan'an, la nɛresɛba woo n boe teŋa wa poan te namehegɔ la, la so'a la kom la ka ko ba la eŋɛ Kaldea Naba Nebukadnezar la a nɛreba la n de diŋdoma ɛɛra ya vom la nu'uhen. A kan zɔ ba ninbɔn'ɔn, a wan kɔrom ba la so'a. 8Le yɛ'ɛha, yele nɛreba wa yeti, Na'ayenɛ yeti, behɛ ya, n dekere la vom sore, la kum sore biŋera ya nɛŋan. 9Hom se'em woo n kɛn'ɛre teŋa wa poan so'a, bii kom, bii namehegɔ n yeti la ko hɔ. Ge hom se'emdaana woo n yehe dekɛ ho mɛŋa bo Babilon nɛreba n kae ya teŋa la mum gan'an gura te ba zabɛ la ya la wan kan ki. 10Mam maahom te be'em n tom teŋkana wa poan ge dagɛ som, Na'ayenɛ yele se'em n bala. N wan dekɛ teŋa wa eŋɛ Kaldea naba la nu'uhen te a sagom ka la bugum. 11Le yɛ'ɛha, yele Yuda teŋa nabiihe la yeti, kelehe ya Na'ayenɛ yelehom wa. 12Na'ayenɛ n yeti, se'em bɔ'ɔra David yiredoma n wana, nɛra se'em n min sɛla n nare wa, gankera nɛreba la lan nare te ho gankera ba se'em, soŋɛ sɛba te ba fan' ba lɔgɔrɔ la, fan' basɛba n tare ba muguhera la nu'uhen bahɛ, eta sɛla n ane soŋa. Han dagana bala, mam sunsunyiim la wan taɛ hɔ di wo bugum la ho be'em la te ho tom la zuo, bo wan taɛ ho dita te nɛra ka bɔna wa keŋɛ bo bahɛ. 13Na'ayenɛ yeti, mam mɛŋa n zaberɛ la hom Yerusalem wa, hom teŋsɛka n mɛ yaga taŋa zoore wa zuo yele bo ho mɛŋa yeti, ane n wan ta'an zom ka'lam na zabɛ la to, bii kɛn' tomam soka zen'an wa na wa? 14N wan namehɛ hɔ wo ho be'em n nare namehegɔ seko la, N wan kiŋe bugum bahɛ ho mɔɔ la poan te bo di sɛla woo n kae hɔ bahɛ teŋasoka la. Na'ayenɛ yele se'em n bala.

will be added

X\