Yeremia 18

1Te Na'ayenɛ tɔgɛ bo mam Yeremia yeti, 2Wa'ana keŋɛ sige yagombaha daana la yire ha, te n pa'alɛ ho sɛla bini. 3Te mam keŋɛ sige bini wo enŋa n yele mam se'em la, ta paɛ te yagombaha daana la boe bini yagona mɛ. 4Ge dokɔ seko te a yagom na la ka doohe enŋa n bote ko se'em la, te a ŋmɛ' kɔ lagom taaba, le malom pɔhɛ maalegɔ. 5Te Na'ayenɛ nya tɔgɛ bo mam bilam yeti, 6Mam kan ta'an eŋɛ Israel buuri wa wo yagombaha daana wa en eŋɛ a yagom baherɛ wa se'em wa mɛ yoi? Wo yɔgɔrɔ wa n boe yagombaha daana wa nu'uhen se'em la, ya boe n nu'uhen la bala. 7Saŋsɛka han bɔna te n ta yele teŋa, bii sɔ'ɔlom sebo yeti, N wan voen ka sagom ka zan'an bahɛ. 8Ge teŋsɛka te n yele ka bala la han tee ka mɛŋa yehe ka be'em la poan, n wan tee n potɛn'ɛrɛ mam yele ne te n tare sagaŋɔ seko wa'an ka zuo na la poan. 9Ge saŋsɛka me han bɔna te n yele teŋsɛka bii sɔ'ɔlom sebo yeti, N wan sɛ' ka ze'ele, ge mɛ' ka soŋa soŋa. 10Te teŋkana wa, bii sɔ'ɔlom bona wa, ŋmɛregɛ tona be'em mam nɛŋan, ge ka kɛleha mam yelehom, n wan tee n potɛn'ɛrɛ, te mam yele ne te n ka'ɛ som sebo bahɛ ka zuo na la. 11Bala zuo, yele Yudadoma wa, la Yerusalem teŋa nɛreba wa yeti, Na'ayenɛ n yele se'em la, behɛ ya, mam maala be'em tabela ya. N maahene la sagaŋɔ sore biŋera ya. Ya zan'an ŋmɛregɛ nananawa yehe ya be'em sɔya la poan, la ya malom tee ya etegɔ la. 12Nɛreba wa wan zagahɛ, ge yele ho yeti, bana dela yoo, tomam kɔ'ɔn yeti te ana la tomam n ane se'em wa, te kɔ'ɔn yeti to dɔla la to mɛhe sunya n bote be'em sebo la. 13Na'ayenɛ yeti ya, Soke ya tenhe wa behɛ, ane n tabelɛ wom sɛla bala? Israel n de pɔgɔsa'arɛ se'ere n nan ka min boraa la ganlom la galeŋɔ seko n ka ta'an beha. 14Lebanon teŋa saakuga la tabelɛ yelegɛ ge bahɛ ka bɔn'ɔrɔ la? Ko'niho sebo n tanhɛ n tanhɛ teŋa na, lebege kolega zɔta, wan keen? 15Ge mam nɛreba wa tamɛ mam yele mɛ, ge dekɛ ba mɛhe bo baga. Ba bahɛ sɔrɔɔ kɛka la n de som sore la mɛ, ge ŋmɛregɛ dɔla be'em sore la n de bɛngerɔ la poan. 16Bala zuo te ba teŋa la lebege daboo, ka wan lebege kɛhega lɔkɔ. La wan eŋɛ sɛba woo n dole tɔla la pakera, te ba lɔbera ba zuto la teŋa la n sagom se'em la. 17N wan yeregɛ n nɛreba bahɛ ba diŋdoma poan wo dapɔya bɔba sabeeo n ne yeregɛ puuhugo se'em la. Ba daaŋɔ la wo poan, n wan bire n poore bahɛ, ba n kan be'e behɛ ba sunsagaŋɔ la. 18Nɛreba basɛba nya daa yeti, Lagahɛ ya na, te to eŋɛ nɔyene zabɛ la Yeremia wa. To wan ba'ahom tara malemadoma te ba pa'ala tɔ pa'alegɔ la, ge tara yamdoma te ba kan'ana tɔ, ge tara nɔtɔgɔheba, te ba tɔgɔra Na'ayenɛ nɔɔrɛ bɔ'ɔra tɔ. Bala bahɛ ya te to eŋɛ nɔɔrɛ la to dekɛ yelebe'o zuunhe Yeremia wa, ge da pon kɛleha sɛla woo te a wan yele to. 19Na'ayenɛ, kelehe mam, ge behɛ mam bɛ'ɛ ba wa n maahene te ba eŋɛ mam se'em wa. 20La ane soŋa te ba dekɛ be'em yɔ som? Ba ga'ɛ la baŋa biŋe, te ka nyɔkɛ mam. Tɛnra mam n ne ze'ele ho nɛŋan, po'ohera ɛɛra ba som se'em, bɛlena hom te ho da bahɛ te namehegɔ sige ba zuo na se'em. 21Bala zuo, bahɛ te ba kɔma vibe la kom. Bahɛ te so'a kɔrom ba te ba. Bahɛ te ba pɔgɔba lebege kɔma zan'an ki, te ba lebege kondɔgɔreba, ge dɛna pɔkɔnpa. Bahɛ te woŋerɛ paɛ ba bonkoroba te ba ki, te ba bonbilipaalehe han doohe sige pɛɛnbɔn'en, ba da doohe lebe na. 22Ho han ta kooreba la pɔnra ba na, ho bahɛ te yire woo kaahera kaahe dɔɔrɔ, te zen'an woo wom. Se'ere n sɔe la, ba tun' la boko biŋe mam, ge ga'ahɛ banhe bɛnrɛ te ba nyɔkɛ mam. 23Ge hom n Na'ayenɛ wa, mi' ban dole sɔrɔɔ seko woo te ba ko mam la, da di sugurom bo ba, ba tuure wa, da saalom ba yelebe'o wa ho nɛŋan bahɛ. Sina ge beha, te ba diŋdoma la nyaŋɛ ba. Bahɛ te la wuŋɛ ba la ho sunsunyiim la.

will be added

X\