Yeremia 17

1Kurugo n dekɛ golehɛ Yuda teŋa be'em la, ba dekɛ la pin' kpa'a konregɛ golehɛ Yuda be'em la eŋɛ ba sunya la poan, ge golehɛ bɔ lamenɛ ba kaanbegɔ dagahe iila la. 2Ba kɔma tɛnre ba baga bimbina la ba Aserah bagarɛ dɔɔrɔ la n sɛ' ba teŋa la tikantɛ woo teŋa la, la ba zɔya la woo zuto kaanbera la yele mɛ. 3Bala, n wan dekɛ mam mɛŋa zoore la n boe ya teŋa la poan la, la mɛŋa n tare sɛla zan'an, la ya lɔgɔrɔ zan'an bo ya diŋdoma, te la dɛna ban nyaŋɛ ya ge fan' lɔgɔseto n bala. Ya toonbe'ero la te ya tom kae teŋa wa zan'an mum la zuo te la wan eŋɛ ya wana wa. 4Ya mɛŋa etegɔ n bahɛ te mam dekɛ sɔ'ɔlom sebo bo la wan yehe ya nu'uhen, ge te n bahɛ te ya keŋɛ teŋsɛka poan te ya ka tabelɛ mina poan, ta dɛna yamehe bo ya diŋdoma la. Se'ere n sɔe la, mam sunsunyiim la taɛ la bugum dita ka tara kiŋire. 5Na'ayenɛ yeti ya, Yele boe se'emdaana n dekɛ a mɛŋa delom nɛresaaleba, ge ton yehe ba sunya Na'ayenɛ zen'an la zuo. 6Ena daana wan ana wo tia n yehe kangerɛ poan la, tebehom han yɛ'a na, a kan lagom paɛ. Ena daana bɔŋa zen'an dela pɔgɔtia teŋa la zuo, zen'sɛka n de yaarom ma'an te sɛsɛla ka kɛn'ɛra bini la. 7Ge popeelom boe me la se'emdaana n dekɛ a mɛŋa delom Na'ayenɛ, se'emdaana sakerɛ sera n boe Na'ayenɛ poan. 8Enŋa daana ane mɛ wo tia n sɛ lɛm ko'om, te ka tɛɛn' ka yeŋa bahɛ ko'om la poan na la, Warɛ han ze'ele, tikaŋa ka fabele. Ka vɔntɔ kɔ'ɔn dɛna la vɔn man'aha saŋa woo. Warɛ han ze'ele yuum se'ere, la ka daane tikaŋa, ka wone la saŋa woo. 9Nɛresaala suunre pan'ahere en mɛ sɛla woo poan, de ka tare maalegɔ. Ane n wan ta'an baŋɛ nɛresaala suunre n ane se'em? 10Mam Na'ayenɛ ma'an n magahe nɛra potɛn'ɛrɛ beha, mina a suunren, ge yɔɔra nɛra woo la a etegɔ, la tooma yɔɔrɛ n de se'ere. 11Hom se'emdaana n piim tara, ane mɛ wo noa n umene gɛla yoo yeke ge ka sɔna a se'em la. Ena daana ha yuue fiin wa, sɛla woo ne mɛlom mɛ ge bahɛ en, a ba'ahegɔ poan, a nya ne de'a la gerego. 12Pin'ileŋɔ poan ba pon zɛnkɛ Yenɛ na'am gɔŋɔ wa. Zen'an la dela tomam toolom zen'an. 13Na'ayenɛ, hom te Israel dɛla. Nyanɛ wan di sɛba woo n zagahɛ hom mɛ. Sɛba n bire ba pɔya bahɛ hom yu'ura golehɛ pa'ahɛ la ke'endoma poan, ban zagahɛ hom Na'ayenɛ se'ere n de vom kolega la zuo. 14Na'ayenɛ, hom han tebɛ mam, n seren wan nyɛ tebegɔ, Hom han fan' mam, n seren wan tara faanrɛ. Se'ere n sɔe la hom n de se'em te mam pɛngera 15Behɛ ban yeti ma se'em, Na'ayenɛ yeti, Na'ayenɛ yeti la, la bɛɛ? Bahɛ te hom tɔgɔre Na'ayenɛ yelese'a la tom te to nyɛ. 16Ge mam ka zagahɛ hom n loe mam te n keena nɛreba wa la, bii n bɔta te sagaŋɔ daarɛ la sige nɛreba wa zuo na. Hom mi' yetɔgom sebo n ze'ele mam nɔɔrɛ wa poan yehe na bo nɛreba wa. Bo ka sogɛ hom nɛŋan. 17Na'ayenɛ, da bahɛ mam daaŋɔ daarɛ, hom n de mam soka zen'an. 18Bahɛ te nyanɛ di mam diŋdoma wa, ge da bahɛ te nyanɛ la di mam. Bahɛ te sunsagaŋɔ paɛ bama, ge da bahɛ te sunsagaŋɔ malom paɛ mam. Bahɛ te sagaŋɔ dabaherɛ la sige ba zuo na, ta' sagaŋɔ la sugumnɔɔren boyi' bahɛ ba zuo na. 19Te Na'ayenɛ tɔgɛ bo mam yeti, Keŋɛ ta ze'ele nayaŋa sɛka te Yuda teŋa nadoma dɔla kɛn'ɛra ge yɛha la Yerusalem teŋa nayahe la woo nɔɔrɛn. 20Mɔɔlɛ yeti, Wom ya Na'ayenɛ yelehom wa, Yuda teŋa nadoma la ka nɛreba wa la Yerusalem teŋa nɛreba wa n dole ka nayahe poan kɛn'ɛra daarɛ woo wa. 21Na'ayenɛ yeti, Ya mɛhe mini ya soŋa soŋa, la ya da ziira zeero, bii ya tara tɔ dɔla Yerusalem teŋa nayahe wa poan yɛhera, bii kɛn'ɛra na Vo'ohogo Daarɛ la poan. 22Da pon ɔnbegɛ lɔkɔ ho yire poan yehe na bii ho tom toonse'ere Vo'ohogo Daarɛ la poan. Bahɛ ya te de dɛna toolom daarɛ, wo mam n bo ya sɔyaabdoma nɔɔrɛ se'em la. 23Ge te ya sɔyaabdoma la yuun ka kelehe bii nam mam, mam n pa'alɛ ba se'em la, ge eŋɛ ba mɛŋa akanbikedoma. 24Na'ayenɛ yeti, Yamam han wan nana mam ge ka ziira lɔgɔrɔ dɔla teŋa wa nayahe kɛn'ɛra Vo'ohogo Daarɛ la poan na, ge tara Vo'ohogo Daarɛ wa te de dɛna toolom daarɛ te ya bahɛ ka tona de daarɛ. 25Te nadoma la n zin'inta David na'am gɔŋɔ wan kɛn'ɛra teŋkana nayahe, bama la ba kpɛ'ɛndoma. Ba wan yaga ba yiri toroto la ba yiri zuo, la Yuda la Yerusalem teŋhe nɛreba zan'an wan lagom la ba. Te teŋkana wa wan perɛ la nɛreba bala yɛ'ɛha. 26Nɛreba wan zɛ'ɛta Yuda teŋhe la Yerusalem kenkɛlehe teŋhe la Benyamin teŋhe la nɛŋa bɔba zobibihe teŋhe la teŋse'ehe n yage zoore zuo la te sɛba me yehe Negev pɔgɔtia teŋhe la poan. Te ba wan tara ba nyɔ'an bo'olom la ba kaanbegɔ lɔgɔrɔ kena na. Ba me wan tara ba boom bo'olom la ba ko'ɛnka bo'olom la fara bo'olom kena Na'ayenɛ Yire wa poan na. 27Ge ya han kan kelehe, kan dekɛ Vo'ohogo Daarɛ la te de dɛna toolom daarɛ, ka bahɛ ya ziira lɔgɔrɔ Vo'ohogo Daarɛ la dɔla Yerusalem nayahe la poan kɛn'ɛra na, n wan taɛ bugum sebo n dite ka kiŋira bahɛ na, te bo di yikanra la zan'an.

will be added

X\