Yeremia 16

1Te Na'ayenɛ tɔgɛ bo mam yeti, 2Da di pɔga bii ho tara kɔma teŋkana wa poan. 3Se'ere n sɔe la, Mam Na'ayenɛ n tɔgɛ kɔma te ba wan dɔgɛ ba teŋkana wa poan la ba madoma la ba sɔdoma yɛla. 4Ban'kanra n wan nyɔkɛ ba, te ba ki. Ba kan kele ba bii ba pin' ba. Ba wan gan'an wo nagombeto la zen'an woo. So'a la kom wan ko ba, te ba te dɛna dia bo ziiro, la mɔen dunhe. 5Mam Na'ayenɛ me yeti, Da keŋɛ yire se'ere te ba maala koorɛ bini bii ho keŋɛ ta lagom kɛla kum bii ho suunre lagom sagom la nɛra kum teŋa wa poan. Se'ere n sɔe la, mam Na'ayenɛ foe n sunma'ahom la n zo'ohogɔ la n ninbɔn'zɔrɛ la nɛrebana wa zuo mɛ. Mam Na'ayenɛ yele se'em n bala. 6Dakanpa la nahadoma wan lagom ki gan'an teŋkana wa poan bala. Te se'em ka bɔna wan pin' ba bii kele ba zuo bii siie zuo ba zuo. 7Nɛra ka boe wan dogɛ dia bo kooma sɛba n kele la, ba bogelɛ ken'ema la suunre. Ba ka bo sɛba n kele ba ma bii ba sɔ kum la ko'om te ba yire ba nɛŋa bii daam wanɛ te ba nyu'. 8Da kɛn' yire se'ere te de'eŋɔ bɔna bini, te ho ta lagom nyu' ge di la ba. 9Se'ere n sɔe la mam Pɛɛntɛɛnreba Na'ayenɛ la n de Israel Na'ayenɛ la yeti n bahɛ zen'kana wa mɛ ya saŋa wa poan, te ya nini nyɛ. N wan bahɛ te ya nyeema la ya popeelom la ya pɔgɔdire voole la zan'an yee suram zen'kana wa poan. 10Ho han yele nɛreba wa yele ana wa zan'an, te ba sokɛ ho yeti, bene zuo te Na'ayenɛ maahom sagaŋɔ kona taaba bahɛ tomam zuo na? To tuure dela denɛ? Toonbe'o kone te tomam tom bo Na'ayenɛ to Yenɛ wa? 11Ho lebehe ba te Na'ayenɛ yeti, la ya sɔyaabdoma n zagahɛ mam n de ya Na'ayenɛ la, ge dɔla baga, tona bɔ'ɔra ba, ge kaanbera ba, ge zagahɛ mam, ka dɔla mam pa'alegɔ la. 12Ge yamam me wa'ana tom pototooma gana ya sɔyaabdoma la. Behɛ ya woo n ane se'em, ya woo zagahɛ mam mɛ, ge dɔla ya sunya la n bote toonbe'ero seto la. 13Bala zuo, n wan pɔgɔlom ya bahɛ teŋsɛka poan te yamam bii ya sɔyaabdoma la ka tabelɛ mina. Bilam te ya tona bolika la yu'uŋɔ bɔ'ɔra yena se'a te ya ka tabelɛ mina. Se'ere n sɔe n kan zɔ ya ninbɔn'ɔn. 14Ge mam Na'ayenɛ yeti, Dabeha la seren kene na te nɛreba kan' ne le yi' yeti, Na'ayenɛ vɔa wa n tare Israeldoma ze'ele Mizraim teŋa poan yehe na wa. 15Ba nya ne wan yi' yeti, Na'ayenɛ se'ere n fan' tomam yehe zuɔ bɔba teŋhe la te a daa dekɛ to eŋɛ ba nu'uhen la bahɛ la. Saŋkaŋa wa, mam wan tare lebe ba teŋa wa te n yuun dekɛ bo ba sɔyaabdoma wa. 16Ge nananawa, mam Na'ayenɛ yeti, n wan ɛ diŋdoma na, te ba nyɔkɛ ba wo zim la, ge tom ton'ohereba na te ba ɛ zoore woo la tanhe woo poan ko ba. 17Se'ere n sɔe la, mam nini nyɛte sɛla woo te ba eta la me. Sɛla ka boe sogɛ mam, ba be'em la gan' la mam nini kpai. 18Yia n wan lebehe yɔ ba tuure la, la ba be'emtooma la sugumnɔɔren boyi'. Se'ere n sɔe la, ba ganlom mam teŋa la mɛ la ba bagayooro la, ge ganlom mam teŋa la, la baga kpi'ima la. 19Na'ayenɛ, hom de mam paŋa la mam kpe'eŋo zen'an daaŋɔ daarɛ. Hom zen'an te teŋhe wan ze'ele zuɔ la gɔbega wa'ana yele ho yeti, tomam sɔyaabdoma daa to'e la ponpɔrɔŋɔ yena ma'an. Ba dela bagayooro se'a te nyoonrɔ ka bɔna ba poan. 20Nɛresaala ta'an maalɛ ba mɛhe yena? Aai, ba dagɛ seren yena. 21Na'ayenɛ yeti, Bala zuo, n wan pa'alɛ ba saŋkana wa poan, n wan pa'alɛ ba n paŋa la n kpe'eŋo. Te ba baŋɛ te mam yu'urɛ n de Na'ayenɛ.

will be added

X\