Yeremia 15

1Te Na'ayenɛ yele mam yeti, Behɛ, mam yamehe Moses la Samuel han pon wa'ana pa'ahɛ hom te ya ŋmɛ' nu'po'ɔ bo mam nɛreba wa zuo, mam suunre pon kan ŋmɛregɛ lebe ba poan na. Bahɛ te ba fɔnregɛ n nɛŋan. 2Ba han soke ho yeti, Ho yeti te keŋɛ la bɛ ha? Yele ba yeti, Na'ayenɛ yeti, sɛba n wan doohɛ ban'ahe poan ki la, bama keŋɛ ban'ahe poan. Sɛba n wan ki pɛɛnbɔn'ɔn poan la, bama keŋɛ pɛɛnbɔn'ɔn poan. Sɛba n wan vibe, bama keŋɛ vibera. Sɛba te ba nyɔkɛ ba loŋe teŋa te ba dɛna da'aba la, bama me keŋɛ bilam. 3Na'ayenɛ yeti, N wan bahɛ te namehegɔ sugumnɔɔren bonaahe n sige ya zuo na sagom ya. So'a wan kɔrom ya bahɛ te baahe vuura ya, te ziiro dita ya, te mɔen dunhe ŋma' ya konba. 4Toonbe'o seko te Hezekia dayɔa Manase se'em n de Yuda naba tom Yerusalem teŋa poan la zuo, te namehegɔ kona wa kena ya zuo na wa. 5Yerusalem, ane n yeti a zɔ ho ninbɔn'ɔn, bii kele bo ho? Ane n wan ze'ele soke ho gɔɔm? 6Na'ayenɛ yeti, Mam nɛreba wa, ya zagahɛ mam mɛ. Ya kɔ'ɔn lɛbera la pooren saŋa woo. Bala zuo, n wan namehɛ ya, ta sagom ya. Mam taregɛ mɛ, la n zɔta ya ninbɔn'ɔn. 7N ze'ele la teŋa la nayahe nɔɔrɛn, dekɛ n wanɛ yeele ya wo ki la. N wan sagom mam nɛreba la ko' ba kɔma wa. Se'ere n sɔe la, ba ka tee ba mɛŋa yehe ba sɔrɔɔ be'ero la te ba dɔla la poan. 8N wan bahɛ te ba pɔkɔnpa kanlɛ malom pa'ahɛ wo kolaa tentɔnbin'ihegɔ la, ka tara kanlɛ. Wontɛɛŋa, n ne wan bahɛ te sagaŋɔ sige pɔgɔse'ehe n tare sereba la zuo na, te ba kɛla ba boraa paalehe la zuo. Ban ne wan zɛ'a zɛ'a ta din'e sagaŋɔ. 9Pɔka ne wan zɛ'a zɛ'a ta din'e te ba ko a bodibinto toyopɔe. Ka popeelom wan lebege sunsagaŋɔ La wan dɛna vi bo ka. N wan dekɛ ka kɔmsɛba n gee la bo ba diŋdoma so'a. Na'ayenɛ yele se'em n bala. 10Mam ma dɔgɛ mam la yore. Mam dela nɛra se'em te teŋa la zan'an zabera la mam. N ka tabelɛ tara dekɛ peŋe nɛra, bii n ba nameha keŋɛ nɛra zen'an ta peŋe sɛla, ge la bala zan'an, nɛra woo yaɛ mam mɛ. 11Na'ayenɛ yeti, Mam wan fan' ho bahɛ la fai. Sera, mam n ne dekɛ diŋdoma tuunle ho na, ho namehegɔ saŋa, bii ho sunsagaŋɔ saŋa la poan. 12Wo nɛra n ka ta'an dekɛ a nu'o kɔ'ɛ kuto bii nyɔgom seto n ze'ele zuɔ bɔba teŋhe poan na la, bala mea te ya kan ta'an nyaŋɛ ya diŋdoma la n ze'ele zuɔ bɔba teŋhe poan yɛ'a na te ba zabɛ la ya la. 13Ya lɔgɔrɔ la, la ya tarega la wan dekɛ bo la ya dima la yoo, ya toonbe'ero la te ya doohe tom to kae ya teŋa wa la zuo. 14N wan bahɛ te ya keŋɛ ta tona bɔ'ɔra ya diŋdoma, teŋsɛka te ya ka tabelɛ mina poan. Se'ere n sɔe la, mam sunsunyiim wa wan laŋɛ bugum, te bo dita ya ka malom tara kiŋire. 15Na'ayenɛ ho mi', tɛnra n yele, la ho wa'ana behɛ mam, ge lerege n diŋdoma wa bo mam. Hom n ta'an din'inha suunre la zuo, da bahɛ mam. Behɛ toorɛ se'a woo te mam nyɛta hom yu'urɛ wa zuo. 16Na'ayenɛ, ho han ne bo mam ho yelehom la, mam ne to'e bo di mɛ la popeelom, te la ana mam suunre nyɛlom, la mam n po'ohere ho yu'urɛ la zuo. 17Mam ka tabelɛ zin'an la nɛresɛba n tone ba mɛhe n bote se'em, bii mam la bama lagom tara popeelom boyena. Ho nu'o la n tebegɛ page mam zuo la, n bahɛ te mam zin'an n ma'an, Ho perɛ mam la nɛreba la be'em la n bo ho sunsunyiim sebo la zuo, mam kɔ'ɔn bɔna la n ma'an. 18Bene zuo te mam ɛnregɔ wa ka malom bahera mam, te n nɔtɛ wa ka malom tara tebegɔ? Hom yeti ho bahɛ mam mɛ wo kolezɔtega ko'om n ne perɛ seeo poan, ge ne keenhɛ oonɛ se'em la? 19Bala, Na'ayenɛ yeti, Ya han ŋmɛregɛ lebe na, n wan le to'e ya, te ya tana zɛ'ɛta n nɛŋan. Ya nɔya la han go'e ka tɔgɔra yele pon'oha, ge tɔgɔra la yelesoma ma'an, n wan bahɛ te ya dɛna ana wo mam nɔɔrɛ. Nɛreba la ŋmɛregɛ lebe hom zen'an na, ge dagɛ hom ton ŋmɛregɛ lebe bama zen'an. 20N wan eŋɛ hɔ te ho ana wo kuto dangoone la, ba wan zabɛ la hɔ, ge ba kan malom nyaŋɛ hɔ. Se'ere n sɔe la, mam boe mɛ la hɔ, n wan fan' ho bahɛ. Na'ayenɛ yele se'em n bala. 21N wan fan' hɔ potɔpa la nu'uhen bahɛ, ge to'e nɛre wuruba nu'uhen bahɛ.

will be added

X\