Yeremia 12

1Na'ayenɛ, yelese'ere ne han bɔna mam, la hom teŋasoka, hom n ne di boorɔ. Ge bahɛ te n soke ho yele dena wa yele, bene zuo te potɔpa dɛna dakanpa? Bene n sɔe te sɛba n faanre bɔna fai? 2Hom n sɛ' ba te ba nyɛ' nyɛga, nya zo'e na wom wɔla. Hom boe la ba nɔgbama poan, ge ba sunya poan, ho zaan mɛ la ba. 3Ge hom Na'ayenɛ mi' mam, ho makɛ mam suunre mɛ, nyɛ mam ane se'em la hɔ. Ve'e ba wo piihe te ba vɛ'ɛra yɛ'a kɔrɔŋɔ la, ze'ele ba tɔka gura kɔrɔŋɔ daarɛ la. 4Daan denɛ te teŋa wa wan go'e kaahega, ge te sɛnka woo mɔɔ bahɛ ku'ure? Se'ere n sɔe la, ka poan nɛreba la tone la be'em, la bahɛ te dunhe, la niihe n boe ka poan ki la zan'an. Se'ere n sɔe la, nɛreba la yeti, Na'ayenɛ ka nyɛte to be'em la. 5Hom han zɔ la nɛresaaleba n zote la ba na'ma ge teregɛ, ho nya yeti ho eŋɛ la wane zɔ yiri? Hom han kena peelom poan ge gɛnta luta, ho nya yeti ho eŋɛ la wane keŋɛ Yordan kolaa la n kpanrɛ la poan. 6Ho mɛŋa sɔɔnrɔ, la ho mɛŋa yiredoma n bala tare zɛrɛgɛ ho la. Ba mɔ'ɛ nini tara hɔ ŋma'ara. Ba tɔgɔre la yetɔgɔsomɔ bɔ'ɔra hɔ ge da dekɛ ho mea delom ba. 7Mam zagahɛ n mɛŋa yire wa mɛ. Mam bahɛ n mɛŋa sɔ'ɔlom la mɛ. Mam dekɛ n suunre bonɔ wa eŋɛ la n diŋdoma nu'uhen. 8Mam mɛŋa sɔ'ɔlom wa nya ane mɛ wo gbegenɛ n boe mɔen la bo mam. A zaberɛ mɛ la mam, bala n bahɛ te mam yaɛ en. 9Sanhe n tare koŋkoma'ahom la mam sɔ'ɔlom wa? Mam nɛreba wa nya ane mɛ wo niiŋa te ka niin taaba gilige ka gɔ'ɔra la. Keŋɛ ta lagahɛ mɔen dunhe la zan'an na, te se obe n nɛreba wa. 10Duŋkeema la n sagom mam tiihe va'am wa. Ba nɛ mam sɔ'ɔlom la. Ba sagom mam sɔ'ɔlom soŋa la bahɛ yoo. 11Bo ka le tara vɔnrɛ, bo kele mɛ bɔ'ɔra mam na. Teŋa la zan'an gan' mɛ, se'ere n sɔe la se'em ka boe tona bɔ'ɔra la a. 12Zɔya la n boe pɔgɔtia la poan ha la zuto woo dela diŋdoma sɛba n sagone n bibigera na. Na'ayenɛ so'a wan ze'ele teŋa la logerɛ deyema, kɔrom ta yehe logerɛ deyema, nɛra kan peɛn bini. 13Ba borɛ ki', ta kɛ mɔyiliŋɔ. Ba namehɛ taregɛ mɛ, ge ka nyɛ sɛla. Nyanɛ wan di ba, la ban nya kɛ'ɛre sɛla la. Se'ere n sɔe la, Na'ayenɛ sunsunya n nyie. 14Te Na'ayenɛ yele mam sɔɔnrɔ la yeti, Han dɛna yamam nɛresɛba n de bɛ'ɛhe, lagom fan' sɔ'ɔlom sebo te mam dekɛ bo n nɛreba Israeldoma wa te ba sɔna la, n wan tonhɛ ba mɛ ban boe zen'an woo bahɛ, ge tonhegɛ Yuda yire ba poan na. 15N han tonhɛ ba bahɛ bala, n wan le zɔ ba ninbɔn'ɔn, ge le tare ba zan'an lebe ba teŋa ba teŋa, ba sɔ'ɔlom la poan. 16Ba nya han wan mɔ'ɛ nini zamehɛ mam nɛreba en ete se'em la, tara mam yu'urɛ la te de dɛna ba pɔtɛ, te ba ne yeti, N pɔ' Na'ayenɛ wa, wo bama n yuum zamehɛ mam nɛreba la te ba tara Baal bagarɛ la te de dɛna ba pɔtɛ se'em la, n wan bahɛ ba te ba me tara zin'irego zen'an mam nɛreba la teŋasoka. 17Ge teŋsɛka han kan kelehe, ba n wan voen teŋkaŋa, sagom ka bahɛ. Na'ayenɛ yele se'em n bala.

will be added

X\