Yeremia 11

1Na'ayenɛ yelehom wa'an Yeremia zen'an na n wana. 2Kelehe nɔbiŋere wa yɛla wa, la ho dekɛ tɔgɛ bo Yuda, la Yerusalem teŋa nɛreba wa. 3Yele ba yeti, Na'ayenɛ la n de Israel Yenɛ la yeti, nɔpɔtɛ n dole hom se'emdaana n ka nam nɔbiŋere yɛla wa zuo. 4Nɔbiŋere dena wa dela nɔbiŋere se'ere te mam yuun ze'ele la ya sɔyaabdoma, se'em ma'an te mam yuun tare ba ze'ele Mizraim teŋa poan, zen'sɛka te ba yuun bɔna te la ana wo ba boe la kuta bugumen. Te mam yuun foe ba na, yele ba yeti, kelehe ya mam yelehom, la ya ete mam bo ya nɔɔrɛ te ya eta sɛla woo se'em la. Bala te ya wan dɛna mam nɛreba, te mam me dɛna ya Yenɛ. 5Ge te n ta'an tom nɔpɔtɛ se'ere te mam pɔ' la ya sɔyaabdoma, te n wan dekɛ teŋa te iilom, la seerom zɔta ka poan wo ko'om bo ba la, teŋsɛka te ya pon bɔna ka poan wa la. Te mam lebehe yeti, Naa, n Na'ayenɛ. 6Te Na'ayenɛ yele mam yeti, Mɔɔlɛ Yuda teŋhe poan, la Yerusalem sɔya zuto yeti, kelehe ya Na'ayenɛ nɔbiŋere la yɛla wa, la ya dɔla a. 7Pɔhɛ se'em ma'an te mam tare ya sɔyaabdoma ze'ele Mizraim teŋa poan yehe na la, mam kan'ane ba mɛ la ninmɔ'ɔrɛ saŋa woo te, nane ya mam yelehom wa. 8Ge ba ka nam, bii ba pon kelehe mam, ba ton dɔla la ba mɛhe sunkanberɛ la n bote toonbe'seto la. Bala n sɔe te mam bahɛ te mam nɔbiŋere la ganleŋɔ n tare sagaŋɔ seko la woo sige ba zuo na. 9Te Na'ayenɛ yele mam yeti, Yuda teŋa la Yerusalem teŋa nɛreba naɛ la nɔɔrɛ zabera mam. 10Ba ŋmɛregɛ lebe la ba sɔyaabdoma sɛba n yuun zagahɛ, ka nana mam yelehom la ganleŋɔ la poan. Ba dole la baga, tona bɔ'ɔra a Israeldoma la Yudadoma kɔ' nɔbiŋere se'ere te mam yuun biŋe la ba sɔyaabdoma la mɛ. 11Bala n sɔe, te mam Na'ayenɛ yele wana, n wan bahɛ te sagaŋɔ sige ba zuo na, sagaŋɔ seko te ba mina mina kan zɔ peɛn kɔ. Ba wan ta kaaha bɔ'ɔra mam na, ge n kan kelehe ba. 12Yuda teŋhe la Yerusalem nɛreba nya wan keŋɛ ta kaahɛ bo ba yena se'a te ba kaanbera bɔ'ɔra a la, ge yena la kan nyaŋɛ fan' ba bahɛ ba namehegɔ dabeha la poan bahɛ. 13La ana wo Yuda nɛreba tare yena la zo'e mɛ wo ba teŋkanra la n zo'e se'em la. Te Baal bimbina la me zo'e wo Yerusalem teŋa sɔrɔtɔ n zo'e se'em la. 14Han dɛna hom Yeremia, da makɛ po'ohɛ bo nɛrebana wa, bii ho belom mam nɛrebana wa zuo. Se'ere n sɔe la, namehegɔ la han sige ba zuo na te ba pon yi mam, n kan kelehe ba. 15Mam pɔga wa n zagahɛ mam, ge doohe tom a toonfɛn'ɛha wa le tara la bene boonrɔ mam yire poan? Ya tɛn'ɛhe ya nɔya biŋere, la dunhe zo'e zo'e kaanbegɔ wan ta'an fan' ya ya sagaŋɔ dabeha la poan bahɛ mɛ bii? Bala te ya nyeena wa? 16Na'ayenɛ tabelɛ yi ya te, ya ane me wo kaam tia n sobege la vɔntɔ, ana soŋa, ge wom wɔla zo'e zo'e la. Ge la kan yuue, Na'ayenɛ wan tanhɛ a sunsunyiim tuluga bahɛ ya zuo na, te bugum taɛ ka di, te ka yila la zan'an di bugum. 17Pɛɛntɛɛnreba Na'ayenɛ la, se'em n sɛ ho ze'ele la, n dekɛ ho tuule la namehegɔ, Israel, la Yuda yiredoma be'em la te ba tom la zuo. Ba nyiihe mam sunsunya, la bama n kaanbere Baal bagarɛ la. 18Se'ere n sɔe Na'ayenɛ n lilige ba potɛn'be'o la pa'alɛ mam, te mam baŋɛ, saŋkana poan la a pa'alɛ mam ba be'emtooma me. 19Ge mam ane mɛ wo pebila te ba tara yɛ'a kɔrɔgerɛ la. Mam ka mi' te ba eere la mam n bala ne yɛta te, bahɛ ya te to sagom ya tia la, la ka wɔla la. Bahɛ ya te to ŋmaɛ ya en vɔpa poan bahɛ, te a yu'urɛ da le malom pota la. 20Ge hom Pɛɛntɛɛnreba Na'ayenɛ wa, hom gankere yɛla la tontɔɔ, hom n de se'em n makere nɛra potɛn'ɛrɛ, la a suunre behera, bahɛ te n nyɛ hom mɛŋa leregere, te ho lerege ba, mam dekɛ n yela wa zan'an eŋɛ la hom nu'uhen. 21Bala zuo, Na'ayenɛ yeti Anatot teŋa nɛreba wa n eere ho kum la, ge yɛta ho yeti, Ho han ze'ele Na'ayenɛ yu'urɛ la poan porɛ bo tomam, tomam mɛŋa wan ko ho la, 22Bala zuo, Pɛɛntɛɛnreba Na'ayenɛ la yeti, N wan namehɛ ba, so'a wan kɔrom ba boraahe ge te ba dayɔɔhe, la ba pɔyɔɔhe me vibe la kom. 23Ba fiin wa pon kan gee. Se'ere n sɔe la, Anatot teŋa namehegɔ yuunɛ la han ta paɛ, n wan bahɛ te ko sige ba zuo na.

will be added

X\