Yeremia 10

1Israel yire nɛreba wa, kelehe ya Na'ayenɛ yelehom wa. 2Na'ayenɛ yeti, Da tɔgɔhɛ ya teŋhe wa etegɔ la, bii ya tara dabeem la sɛla n ete saazuo wa, wo teŋhe wa n tare dabeem la ba se'e la. 3Nɛreba wa malema la dela ponpɔrɔŋɔ, ba ne ŋmaɛ la tia mɔen ha, te nɛra dekɛ a nu'o peehe la n bote ko se'em, 4nya dekɛ sanlenpeelega la sanlema takɛ dɔɔ la, ge dekɛ zaanrɛ la kpa'arehe kpa' kɔ ze'ele te ko zɛ'a da luta. 5Bagarɛ, la sɛla te ho maalɛ ze'ele va'amen te la sa'aha dayuuro la, dela boyena. Ba baga la ka ta'an tɔgɔra, ba ka ta'an kena. Nɛreba n ziire ba. Da tara dabeem la ba. Ba kan ta'an eŋɛ ho be'em sebo bii ba tom yelesonɛ se'ere. 6Mam yeti, Na'ayenɛ, se'em ka boe ana wo hom Na'ayenɛ. Ho kanregɛ mɛ, te ho yu'urɛ la me dɛna paŋa yu'urɛ. 7Teŋhe zan'an Naba wa, ane n boe kan zɔta hom? Hom n nare se'em n bala. Yamdoma wa woo n boe ba teŋhe la ba sɔ'ɔlom wa poan wa, se'em ka boe ana wo hom. 8Ba zan'an ka tare yam, ba gerege mɛ. Baga kan'aŋɔ woo ka gaŋɛ dɔɔrɔ. 9Sanlenpeelega ze'ele la Tarsis teŋai na, te sanlema me zɛ'ɛta Upaz teŋai na. Ba ne tare mɛ na, te kuta la nya nyɛlegɛ ba maalɛ bagarɛ, nya dekɛ sɔbele pɔɔnhegɔ fuo, la fumɔlɔgɔ pɛ yɛɛlɛ bagarɛ la. 10Ge Na'ayenɛ n de Yenɛ la, enŋa ma'an n de Yenɛ vɔe la. Enŋa n de Naba sɛka n ka tare ba'ahegɔ. A suunre han nyie, teŋa wa ne miina mɛ, te teŋhe kan ta'an ŋmibe zɛ'a a sunsunyiim la poan. 11Yele ba yeti, yena la ka maalɛ saazuo la teŋa wa, bala, yena wa wan mɛlom teŋa wa zuo, la teŋa teŋa ha. 12Na'ayenɛ n dela se'em n dekɛ a mɛŋa paŋa naam teŋa wa la, ge dekɛ a mɛŋa yam sɛ teŋa wa ze'ele la, ge dekɛ a mi'ilom yeregɛ saŋgbanɛ wa la. 13A han ne tanhɛ, ko'om n boe saazuo ha ne suna mɛ na, enŋa n bahere te saŋgbana ne pɔhɛ teŋa wa zen'an kayema ha zom na, enŋa n bahere te saadameŋa, ge niira, ge yu'ura sabeeo bahe na. 14Nɛra woo dela gerego ka tara yam, vi di kuta woo mɛ, la bagarɛ se'ere woo te a kure la. Ba baga la dela ponpɔrɔŋɔ ma'an, vo'ohom ka boe ba poan. 15Baga la dela zaŋa, toon yore n de ba. Ba gankerɛ daarɛ han paɛ, ba wan mɛlom. 16Na'ayenɛ wa n de Yakob Tɔntɛ wa ka ane wo bana wa. Enŋa n naam sɛla woo. Te Israel dɛna a sɔ'ɔlom. A yu'urɛ dela Pɛɛntɛɛnreba Na'ayenɛ. 17Yamam sɛba te diŋdoma gilige ya teŋa gan'an gura ka wa, maahom ya vaɛ ya lɔgɔrɔ zan'an yehe. 18Na'ayenɛ yeti, Saŋkana wa poan, n yeti n kpan' teŋkana wa nɛreba wa bahɛ mɛ wo kalɔbega n kpan' kugure bahɛ se'em la. N wan bahɛ te sunsagaŋɔ nyɔkɛ ba, te ba zɔ yehe ka poan. 19Yele boe mam zuo la n pogoleŋɔ wa, Mam nɔtɛ la ka tare tebegɔ. Mam mɛŋa baŋɛ ya, te mam n namehegɔ n bala, n wan ŋmibe. 20Ba sagom mam sogorɛ la bahɛ mɛ, tonhɛ ko mi'inhe la bahɛ. Mam dayɔɔhe la zan'an tole ya, ka le bɔna n zen'an, se'em ka yee wan malom tin' mam sogorɛ la, bii a tin' paka. 21Duŋkeema la ka tare yam, ba ka sokere Na'ayenɛ behera. Bala zuo, ba ka tare, ge te ba piihe la zan'an me yeregɛ. 22Kɛleha. Voole wa, la kene na. Gbirigere kantɛ n ze'ele zuɔ nu'o bɔba teŋa la poan kena na. Bahɛ te Yuda teŋa lebege daboo. Ka lebege sanhe bɔŋa zen'an. 23Na'ayenɛ, tomam mi' te nɛresaala vom dagɛ a mɛŋa denɛ. Nɛresaala kan ta'an n wan kena se'em. 24Na'ayenɛ, dekɛ ho sunpogohom la pa'alɛ tɔ, to wan kena se'em, ge da eŋɛ suunre la mam. Han dagana bala, n kan vo'e. 25Ka'ɛ ho sunsunyiim bahɛ teŋse'ehe n ka mi' hom la zuo. Ka'ɛ bo bahɛ nɛresɛba n ka yi'ire hom yu'urɛ la zuo. Se'ere n sɔe la, bama obe Yakob. Ba vagɛ en mɛ ba'ahɛ zan'an, ge te a teŋa la lebege daboo.

will be added

X\