Yeremia 1

1Mam Yeremia dela, Hilkia dayɔa, dɛna malemadoma la n boe Anatot teŋa n boe Benyamin teŋa poan la ayema, yelehom n wana. 2Na'ayenɛ pɔhɛ tɔgɔra bɔ'ɔra mam la saŋsɛka te Yuda teŋa boraa Amon dayɔa Yosia dɛna naba la, a yuum pia, la atan' poan, tare bala ta paɛ se'em ma'an te Yosia mɛŋa dayɔa 3Yehoiakim ta sɔe dɛna naba la, tare bala ta paɛ se'em ma'an te Yosia dayɔa kayema yu'urɛ n de Zedekia me ta sɔe di Yuda teŋa na'am la mɛ, a yuum pia, la deyema poan, la saŋsɛka te teŋa kayema zabɛ nyaŋɛ Yerusalem teŋa, ge pe'e nɛreba la zan'an n boe ka poan tare yehe lebe bama mɛŋa teŋa poan la me ŋmarehe senuu poan. 4Te Na'ayenɛ tɔgɛ bo mam Yeremia yeti, 5Yeremia, se'em ma'an te mam naam hom ho ma pooren la, te mam mi' ho mɛ. Ban ta dɔgɔra ho la, te mam pon yehe ho ze'ele la ho tɔka. Mam n loe ho, te ho dɛna n nɔtɔgɔha bo teŋhe. 6Te mam yeti, N Daana Na'ayenɛ, n ka mi' yetɔgom, n nan dela bia. 7Te Na'ayenɛ yele mam yeti, Da yeti hom dela bia. Keŋɛ se'em woo zen'an te mam wan tom hɔ, ta yele mam n yeti ho yele sɛla la. 8Da zɔta dabeem la ba, mam boe mɛ la hɔ, n wan gu'ura hɔ. Na'ayenɛ yele se'em n bala. 9Te Na'ayenɛ nya tɛɛn a nu'o kalom mam nɔɔrɛ, ge yele mam yeti, Nananawa, n dekɛ n yelehom la, eŋɛ ho nɔɔrɛn. 10Behɛ, zina wa, mam loe ho mɛ te ho beha teŋhe, la sɔ'ɔlom, la ho gɔ'ɔha, ge aanhena baha teŋa na, ho sagom bahɛ, ge sa'ahɛ, ho mɛ', ge borɛ. 11Te Na'ayenɛ lilige sɛla pa'alɛ mam, ge soke mam yeti, Yeremia, hom nyɛ la bem? Te mam lebehe yele en te, Mam nyɛ la *almond tia yile. 12Te Na'ayenɛ yele mam yeti, Ho seren nyɛ ya, mam behere n yelehom la la bala te bo tom mam n bote se'em la. 13Te Na'ayenɛ le lilige sɛla pa'alɛ mam, ge le soke mam yeti, Ho le nyɛ la bem? Te mam lebehe yele en te, mam nyɛ la dokɔ n ze' zuɔ nu'o bɔba wa kɔta la ko'om, ge gbelege te ko'om la bɔna bini te bo ka'ɛ uue na. 14Te Na'ayenɛ yele mam yeti, La dela sera, namehegɔ wan ze'ele zuɔ nu'o bɔba teŋhe wa uue sɛba woo n boe teŋa wa poan wa na. 15Na'ayenɛ yeti, N boe bini lagahera la zuɔ nu'o bɔba sɔ'ɔlom la zan'an nɛreba. Nadoma la wan wa'ana ze'ele ba na'am gɔnɔ la wan bɔna la Yerusalem nayaŋa la nɔɔrɛn, te ba wan wa'ana kae ba dangoone la Yuda teŋhe zan'an mum, zabɛ la ba. 16N wan bahɛ te n gankerɛ sige ba zuo, ba be'em la, ban bire ba pɔya bahɛ mam ge kaanbera baga la, po'ohera sɛla te ba dekɛ ba mɛhe nu'uhe maalɛ la zuo. 17Ge han dɛna hom, ba' ho lea boraanɛ, vaɛ ihege saazuo, la ho yele sɛla woo te n wan yele ho la bo ba. Da zɔta dabeem la ba, ho han zɔta ba, n wan bahɛ te dabeem seren kɛn' hɔ. 18Ge han dɛna mam tɔka, mam eŋɛ ho zina wa, te ho dɛna la teŋa n kpe'em, ho dela kurugo zɛɛnrɛ, dɛna nyɔgom dangoone, zabera la teŋa wa, la Yuda teŋa nadoma la zan'an, la ka nabiihe, la ka malemadoma, la nɛresɛba woo n boe ka poan la. 19Ba wan teregɛ zabɛ la hɔ, ge ba kan nyaŋɛ hɔ. Se'ere n sɔe la, n wan bɔna la hɔ, gu'ura hɔ. Na'ayenɛ yele se'em n bala.

will be added

X\